୧୬ରେ ରଜ ମହୋତ୍ସବ ପାଳନ କରିବେ ରାଷ୍ଟ୍ରପତି

ନୂଆଦିଲ୍ଲୀ: ରାଷ୍ଟ୍ରପତି ଦ୍ରୌପଦୀ ମୁର୍ମୁ ଜୁନ୍‌ ୧୬ରେ ରଜ ମହୋତ୍ସବ ରାଷ୍ଟ୍ରପତି ଭବନରେ ପାଳନ କରିବେ । ଏହି ଅବସରରେ ରାଷ୍ଟ୍ରପତି ଭବନର ସାଂସ୍କୃତିକ କେନ୍ଦ୍ରଠାରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ହେବ । ଦୋଳିଖେଳ ହେବ ମୁଖ୍ୟ ଆକର୍ଷଣ । ପୋଡ ପିଠାରୁ ଆରମ୍ଭ କରି ଓଡିଶାର ବିଭିନ୍ନ ସୁସ୍ୱାଦୁ ଖାଦ୍ୟ ଆୟୋଜନ କରାଯାଇଛି। ଦେଶର ରାଷ୍ଟ୍ରପତି ପଦରେ ଆସୀନ ହେବା ପରଠାରୁ ଦ୍ରୌପଦୀ ମୁର୍ମୁ ରାଷ୍ଟ୍ରପତି ଭବନରେ ଓଡିଶାର ବିଭିନ୍ନ ପର୍ବପର୍ବାଣୀ ପାଳନ କରିଆସୁଛନ୍ତି ।

ତେବେ ଗତ ଦୁଇ ବର୍ଷ ଧରି କେତେକ ପ୍ରାକୃତିକ ବିପର୍ଯ୍ୟୟ କାରଣରୁ ରାଷ୍ଟ୍ରପତି ରଜ ମହୋତ୍ସବ ପାଳନ ନ କରିବାକୁ ସ୍ଥିର କରିଥିଲେ । ରାଷ୍ଟ୍ରପତି ଭବନ ଛଡା ଦିଲ୍ଲୀର ଓଡିଆସଂଗଠନଗୁଡ଼ିକ ମଧ୍ୟ ରଜ ପାଳନ କରିବା ପାଇଁ ବିଭିନ୍ନ ଆୟୋଜନ କରିବାରେ ଲାଗିଛନ୍ତି । କଳିଙ୍ଗ ଭାରତୀ ଫାଉଣ୍ଡେସନ୍‌ ଗୁରୁଗ୍ରାମଠାରେ ଏନେଇ ବ୍ୟାପକ ଆୟୋଜନ କରୁଛି ।
କଳିଙ୍ଗ ଭାରତୀ ଫାଉଣ୍ଡେସନର ଅଧ୍ୟକ୍ଷ ଅକ୍ଷୟ ସାମଲ କହିଛନ୍ତି, ଏ ବର୍ଷର ରଜ ପର୍ବ ବିକଶିତ ଭାରତ ୨୦୪୭ ପାଇଁ ସର୍ମପିତ ହେବ । ଏହି ଅବସରରେ ଓଡିଶାର ଲୋକ ସଂସ୍କୃତି, ପାରମ୍ପରିକ ନୃତ୍ୟ ଓ ହସ୍ତକଳାର ଝଲକ ଦେଖିବାକୁ ମିଳିବ ବୋଲି ସେ କହିଥିଲେ ।