Garvita Odia
ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ନିଜ ଦେଶର ଅଦାଲତଙ୍କ ଦ୍ୱାରା ଏକ ବଡ ଝଟକା ଲାଗିଛି । ଆମେରିକା ସଂଘୀୟ ଆପିଲ୍ କୋର୍ଟ ଟ୍ରମ୍ପଙ୍କ ଦ୍ୱାରା ଲାଗୁ ହୋଇଥିବା ଅତିରିକ୍ତ ଶୁଳ୍କକୁ ଅବୈଧ ଘୋଷଣା କରିଛନ୍ତି । ଏହା ବେଆଇନ ବୋଲି ଶୁକ୍ରବାର ଦିନ ଆମେରିକା ଫେଡେରାଲ ଆପିଲ୍ କୋର୍ଟ ରାୟ ଦେଇଛନ୍ତି । ରାୟ ଦେବା ବେଳେ କୋର୍ଟ କହିଛନ୍ତି ଯେ ଟ୍ରମ୍ପ ସରକାର ଦ୍ୱାରା ଲାଗୁ କରାଯାଇଥିବା ଅଧିକାଂଶ ଶୁଳ୍କ ଆଇନ ଅନୁଯାୟୀ ନୁହେଁ । ବିଚାରପତି କହିଛନ୍ତି ଯେ ଶୁଳ୍କ ଲାଗୁ କରି ରାଷ୍ଟ୍ରପତି ନିଜ କ୍ଷମତାର ଅପବ୍ୟବହାର କରୁଛନ୍ତି । କାରଣ ଆନ୍ତର୍ଜାତୀୟ ଜରୁରୀକାଳୀନ ଅର୍ଥନୈତିକ କ୍ଷମତା ଆଇନ ତାଙ୍କୁ ଶୁଳ୍କ ଲାଗୁ କରିବାର ଅଧିକାର ଦେଉନାହିଁ ।କୋର୍ଟ କହିଛନ୍ତି ଯେ ରାଷ୍ଟ୍ରପତି ଭାବେ ଟ୍ରମ୍ପଙ୍କୁ ବୁଦ୍ଧିମାନ ଭାବରେ ତାଙ୍କର କ୍ଷମତା ବ୍ୟବହାର କରିବା ଉଚିତ । ଏହା ନ୍ୟାୟପୂର୍ଣ୍ଣ ଏବଂ ଯୁକ୍ତିଯୁକ୍ତ ହେବ । ରାଷ୍ଟ୍ରପତି ଟ୍ରମ୍ପ ବାଣିଜ୍ୟ ନିଅଣ୍ଟକୁ ଦର୍ଶାଇ ଶୁଳ୍କ ଲାଗୁ କରିଛନ୍ତି, ଯାହା ଯୋଗୁଁ ଅନେକ ଦେଶ ଆମେରିକା ବିରୋଧରେ ହୋଇଛନ୍ତି । ପ୍ରତିଶୋଧ ସ୍ୱରୂପ, ଆମେରିକା ଉପରେ ମଧ୍ୟ ଟିକସ ଲାଗୁ ହୋଇପାରେ, ଯାହାର ଭାର ଆମେରିକୀୟ କମ୍ପାନୀ ଏବଂ ଲୋକଙ୍କୁ ବହନ କରିବାକୁ ପଡିପାରେ । ଯଦି ଦେଶଗୁଡିକ ଉପରେ ଶୁଳ୍କ ଲଗାଯିବା ଜାରି ରହେ, ତେବେ ଏହା ଆମେରିକା ପାଇଁ କ୍ଷତିକାରକ ପ୍ରମାଣିତ ହେବ ।
ସେପଟେ ଫେଡେରାଲ୍ କୋର୍ଟର ନିଷ୍ପତ୍ତି ଶୁଣିବା ପରେ ରାଷ୍ଟ୍ରପତି ଟ୍ରମ୍ପ ପ୍ରତିକ୍ରିୟା ରଖିଛନ୍ତି । ସୋସିଆଲ ମିଡ଼ିଆ ଏକ୍ସରେ ପୋଷ୍ଟ କରି ଟ୍ରମ୍ପ କହିଛନ୍ତି ସମସ୍ତ ଦେଶ ଉପରେ ଲାଗୁ ହୋଇଥିବା ଶୁଳ୍କ ପ୍ରଯୁଜ୍ୟ ଏବଂ ଏହା ସେହିପରି ରହିବ । ଫେଡେରାଲ କୋର୍ଟ ଅତ୍ୟନ୍ତ ପକ୍ଷପାତିତା କରିଛନ୍ତି । କୋର୍ଟ କହିଛନ୍ତି ଯେ ଶୁଳ୍କ ହଟାଇବା ଉଚିତ, କିନ୍ତୁ ମୁଁ ଜାଣେ ଯେ ଆମେରିକା ଶୁଳ୍କ ଯୁଦ୍ଧରେ ଜିତିବ । ଯଦି ୯୦ଟି ଦେଶ ଉପରେ ଲାଗୁ ହୋଇଥିବା ଶୁଳ୍କ ହଟାଇ ଦିଆଯାଏ , ତେବେ ଏହା ଆମେରିକା ପାଇଁ ଏକ ବଡ଼ ବିପର୍ୟ୍ୟୟ ହେବ ।ଟ୍ରମ୍ପ କହିଛନ୍ତି ଯେ ଆମେରିକା ଆଉ ବାଣିଜ୍ୟ ନିଅଣ୍ଟକୁ ସହ୍ୟ କରିବ ନାହିଁ । ବନ୍ଧୁ ହୁଅନ୍ତୁ କି ଶତ୍ରୁ, ସେମାନଙ୍କ ଦ୍ୱାରା ଆମେରିକା ଉପରେ ଲଗାଯାଇଥିବା ଶୁଳ୍କ ଅନ୍ୟାୟ । ସେମାନଙ୍କର ଶୁଳ୍କ ଆମେରିକାର କମ୍ପାନୀ, ଉତ୍ପାଦକ, ଚାଷୀ ଏବଂ ଲୋକଙ୍କୁ ଦୁର୍ବଳ କରୁଛି । ସେମାନେ ଆମ ଉପରେ ଆର୍ଥିକ ବୋଝ ଏବଂ ଚାପ ପକାଉଛନ୍ତି । ଯଦି ଶୁଳ୍କ ହଟାଯାଏ, ତେବେ ଆମେରିକାର ଲୋକମାନେ ଧ୍ୱଂସ ପାଇଯିବେ । ଶୁଳ୍କକୁ ଆମେରିକା ବିରୋଧରେ ବ୍ୟବହାର କରାଯାଇଛି, ଏବେ ଆମେରିକା ଜାତୀୟ ସ୍ୱାର୍ଥରେ ସେଗୁଡିକୁ ବ୍ୟବହାର କରିବ ।
