ମହାନଦୀ ଜଳ ବିବାଦ ସମାଧାନ ସମ୍ଭାବନା : ଡିସେମ୍ବରରେ ମୋହନ-ବିଷ୍ଣୁଦେଓ ବୈଠକ

ଭୁବନେଶ୍ୱର,30/08: ମହାନଦୀ ଜଳ ବିବାଦର ସମାଧାନ ଲାଗି ଓଡ଼ିଶା ଏବଂ ଛତିଶଗଡ଼ ମଧ୍ୟରେ ଆଲୋଚନା ଆଗକୁ ବଢ଼ିଛି। ଦୁଇ ରାଜ୍ୟର ମୁଖ୍ୟ ସଚିବମାନେ ବୈଠକ କରିଛନ୍ତି। ଆଲୋଚନା ଏବଂ ସହଯୋଗ ଜରିଆରେ ଆନ୍ତରିକତାର ସହିତ ଶାନ୍ତିପୂର୍ଣ୍ଣ ଭାବେ ବିବାଦର ଆପୋସ ସମାଧାନ ଲାଗି ଉଭୟ ରାଜ୍ୟ ସହମତି ପ୍ରକାଶ କରିଥିବା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ(ସିଏମଓ) ପକ୍ଷରୁ ଶନିବାର ସାମାଜିକ ଗଣମାଧ୍ୟମରେ ଏକ ପୋଷ୍ଟ ଜରିଆରେ ସୂଚନା ଦିଆଯାଇଛି। ଆସନ୍ତା ଡିସେମ୍ବର ମାସରେ ଦୁଇ ରାଜ୍ୟର ମୁଖ୍ୟମନ୍ତ୍ରୀଙ୍କ ମଧ୍ୟରେ ବୈଠକ ବସିପାରେ ବୋଲି କୁହାଯାଇଛି। ସିଏମଓ ଦେଇଥିବା ସୂଚନା ଅନୁସାରେ, ଆଗାମୀ ସେପ୍ଟେମ୍ବରରେ ଇଆଇସି ନେତୃତ୍ଵରେ ଉଭୟ ରାଜ୍ୟର ବୈଷୟିକ କମିଟି ପ୍ରତି ସପ୍ତାହରେ ବୈଠକ କରିବା ନେଇ ରାଜି ହୋଇଛନ୍ତି। କମିଟି ସମସ୍ୟା ଖୋଜି ତାହାର ସମାଧାନ ଦିଗରେ ପଦକ୍ଷେପ ନେବ। ମହାନନୀ ଜଳ ଆବଣ୍ଟନ ନେଇ ଦୁଇ ରାଜ୍ୟ ମଧ୍ୟରେ ଦୃଢ଼ ସହଯୋଗ ଲାଗି ଏକ ଆନୁଷ୍ଠାନିକ ଢାଞ୍ଚା ଗଠନ ପାଇଁ ଆଲୋଚନା କରିବ। ଆସନ୍ତା ଅକ୍ଟୋବର ମାସରେ ଦୁଇ ରାଜ୍ୟର ମୁଖ୍ୟ ସଚିବସ୍ତରୀୟ ବୈଠକ ହେବ। ଏଥିରେ ଉଭୟ ରାଜ୍ୟର ଜଳସମ୍ପଦ ସଚିବ ମଧ୍ୟରେ ଉପସ୍ତିତ ରହିବେ। ସମସ୍ୟା ସମାଧାନର ଅଗ୍ରଗତି ନେଇ ସମୀକ୍ଷା କରିବା ସହିତ ଆଲୋଚନାକୁ ଆଗକୁ ବଢ଼ାଇବେ। ଆଗାମୀ ଡିସେମ୍ବର ମାସରେ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁଦେଓ ସାଇଙ୍କ ମଧ୍ୟରେ ବୈଠକ ବସିପାରେ। ଉଭୟଙ୍କ ମଧ୍ୟରେ ଏକ ସମୀକ୍ଷା ବୈଠକ ବସିବ। ଉଭୟ ରାଜ୍ୟର ବାସିନ୍ଦାଙ୍କ ସ୍ଵାର୍ଥରକ୍ଷା ଲାଗି କିପରି ବିବାଦର ଶାନ୍ତିପୂର୍ଣ୍ଣ ଏବଂ ଦୀର୍ଘସ୍ଥାୟୀ ସମାଧାନ ହୋଇପାରିବ ତାହାର ବାଟ ବାହାର କରିବେ।