Garvita Odia
ବ୍ରହ୍ମପୁର: ଶିଳ୍ପ କ୍ଷେତ୍ରରେ ଗଞ୍ଜାମ ଜିଲ୍ଲା ନୂଆ ମାଇଲ ଖୁଣ୍ଟ ହାସଲ କରିବ । ଶିଳ୍ପ ପ୍ରତିଷ୍ଠାରେ ଏହି ଜିଲ୍ଲା ଅଗ୍ରଣୀ ଭୂମିକା ଗ୍ରହଣ କରି ଓଡ଼ିଶାର ଶିଳ୍ପ ମାନଚିତ୍ରରେ ସ୍ଵତନ୍ତ୍ର ସ୍ଥାନ ପାଇବ । ଛାତ୍ରପୁରରେ ୧୨ଟି ଶିଳ୍ପ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏଭଳି କହିଛନ୍ତି । ଏହି ପ୍ରକଳ୍ପ ମାଧ୍ୟମରେ ଜିଲ୍ଲାରେ ୨୮, ୦୮୪ କୋଟି ଟଙ୍କାର ପୁଞ୍ଜି ନିବେଶ ହେବ ଏବଂ ୧୫ହଜାର ନିଯୁକ୍ତି ସୁଯୋଗ ସୃଷ୍ଟି ହେବ । ପୂର୍ବ ସରକାର ୨୪ବର୍ଷ ଭିତରେ ଶିଳ୍ପ ପ୍ରତିଷ୍ଠା ସ୍ଥାପନ କରିବାର ହାୱା ତିଆରି କରିଥିଲେ । ଆଉ କମ୍ପାନୀ ମାନଙ୍କ ସହ ଏମଓୟୁ ସ୍ବାକ୍ଷର କରି ଚୁପ୍ ଥିଲେ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ସେ ଆହୁରି ମଧ୍ୟ କହିଛନ୍ତି, ରାଜ୍ୟରେ ବିଜେପି ସରକାର ଶିଶୁ ଅବସ୍ଥାରେ ରହି ମଧ୍ୟ ଶିଳ୍ପ ପ୍ରକଳ୍ପକ ଭିତ୍ତି ପ୍ରସ୍ତର ସ୍ଥାପନ କରିଛି । ଏବେ ଗଞ୍ଜାମ ଜିଲ୍ଲାର ଶିଳ୍ପର ବିକାଶ ହେବ ଏବଂ ନିଯୁକ୍ତି ସୃଷ୍ଟି ହେବ। ଆର୍ଥିକ ଅଭିବୃଦ୍ଧି ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଜିଲ୍ଲରେ ଅର୍ଥକାରୀ ଫସଲ ବୃଦ୍ଧି କରିବାକୁ ସରକାର ଗୁରୁତ୍ବ ଦେଉଛନ୍ତି । କିଛି ଲୋକ ସରକାରଙ୍କୁ ବଦନାମ କରିବାକୁ ଚେଷ୍ଟା କରୁଛନ୍ତି । ମୁଖ୍ୟମନ୍ତ୍ରୀଙ୍କ ଗସ୍ତ ଅବସରରେ ବ୍ରହ୍ମପୁର ସାଂସଦ ଡ. ପ୍ରଦୀପ କୁମାର ପାଣିଗ୍ରାହୀ କହିଥିଲେ, ଜୁନ୍ ୪ ତାରିଖରେ ପୂର୍ବ ସରକାରଙ୍କ ଲେଖା ଛିଣ୍ଡିଥିଲା । ଆଉ ଓଡ଼ିଶାରେ ନୂଆ ସରକାର ଆସିଥିଲେ। ମୋଦି ସରକାର କଥା ରଖିଛନ୍ତି । ଆଜି ଜୁନ୍ ୫ ତାରିଖରେ ମୁଖ୍ୟମନ୍ତ୍ରୀ ଗଞ୍ଜାମରେ ଶିଳ୍ପ ପ୍ରତିଷ୍ଠା ପାଇଁ ଭିତ୍ତି ପ୍ରସ୍ତର ସ୍ଥାପନ କରିଛନ୍ତି । ସେହିପରି ଶିଳ୍ପ ଓ ବୈଷୟିକ ଶିକ୍ଷା ବିଭାଗ ମନ୍ତ୍ରୀ ସମ୍ପଦ ସ୍ୱାଇଁ କହିଥିଲେ, ସରକାର ଏକ ସମୃଦ୍ଧ ଓଡ଼ିଶା ଗଠନ କରିବାକୁ ସଂକଳ୍ପ ନେଇଛନ୍ତି । ବର୍ଷକ ଭିତରେ ସରକାର ଅନେକ ଜନହିତକର କାର୍ୟ୍ୟ କରିଛନ୍ତି।
ମୁଖ୍ୟମନ୍ତ୍ରୀଙ୍କ ଗସ୍ତ କାର୍ୟ୍ୟକ୍ରମରେ ବାଣିଜ୍ୟ ଓ ପରିବହନ ବିଭାଗ ମନ୍ତ୍ରୀ ବିଭୂତି ଭୂଷଣ ଜେନା, ମତ୍ସ୍ୟ ଓ ପଶୁ ସମ୍ପଦ ବିଭାଗ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ, ବ୍ରହ୍ମପୁର ସାଂସଦ ପ୍ରଦୀପ କୁମାର ପାଣିଗ୍ରାହୀ, ବ୍ରହ୍ମପୁର ବିଧାୟକ କେ ଅନିଲ କୁମାର, ଚିକିଟି ବିଧାୟକ ମନୋରଞ୍ଜନ ଦ୍ୟନସାମନ୍ତରା, ଖଲ୍ଲିକୋଟ ବିଧାୟକ ପୂର୍ଣ୍ଣ ଚନ୍ଦ୍ର ସେଠୀଙ୍କ ସହ ବହୁ ନେତା ଓ କର୍ମୀ ଉପସ୍ଥିତ ଥିଲେ । ଛତ୍ରପୁର ବିଧାୟକ କୃଷ୍ଣ ଚନ୍ଦ୍ର ନାୟକ ଧନ୍ୟବାଦ ଅର୍ପଣ କରିଥିଲେ। ଗଞ୍ଜାମରେ ଶିଳ୍ପ ପ୍ରତିଷ୍ଠା କରି ଆମ ସରକାର ଶିଳ୍ପ ପ୍ରଗତିର ପରିଚୟ ଦେଇଛନ୍ତି । ଏହା ପୂର୍ବରୁ ରମ୍ଭା ହାଇସ୍କୁଲ ପଡ଼ିଆରେ ହ୍ୟାଲିପେଡରେ ପୂର୍ବାହ୍ନ ୧୧ଟା ୩୦ରେ ଅବତରଣ କରି ଶୋଭାଯାତ୍ରାରେ ରମ୍ଭା ବାଳକ ଉଚ୍ଚ ବିଦ୍ୟାଳୟକୁ ମୁଖ୍ୟମନ୍ତ୍ରୀ ଯାଇଥିଲେ। ସେଠାରେ ମୁଖ୍ୟମନ୍ତ୍ରୀଙ୍କୁ ସଂଗ୍ରାମୀ ସ୍ମାରକୀ ସ୍ମୃତି କମିଟି ପକ୍ଷରୁ ସମ୍ବର୍ଦ୍ଧନା ଦିଆଯାଇଥିଲା। ସେଠାରେ ପ୍ରତିଷ୍ଠା ହୋଇଥିବା ୪୧ଜଣ ମହାପୁରୁଷଙ୍କ ପ୍ରତିମୂର୍ତ୍ତି ଉନ୍ମୋଚନ କରିଥିଲେ ମୁଖ୍ୟମନ୍ତ୍ରୀ ।
