ଅକ୍ଷୟ ତୃତୀୟା: ଆଜିଠୁ ମହାପ୍ରଭ୍ରୁଙ୍କ ରଥ ନିର୍ମାଣ ଅନୁକୂଳ

ପୁରୀ: ବଡ଼ଦାଣ୍ଡକୁ ଓହ୍ଲାଇ ଆସିବେ କାଳିଆ ସାଆନ୍ତେ । ଆଗକୁ ଆସୁଛି ବିଶ୍ବ ପ୍ରସିଦ୍ଧ ଘୋଷଯାତ୍ରା । ରଥଯାତ୍ରାର ପ୍ରାରମ୍ଭିକ ପର୍ବ ଭାବେ ଆଜି ଅକ୍ଷୟ ତୃତୀୟାରୁ ରଥକାଠ ଅନୂକୁଳ । ମହାପ୍ରଭୁଙ୍କ ନିକଟରୁ ଆଜ୍ଞାମାଳ ଆସିବା ପରେ ତିନି ରଥର ମୁଖ୍ୟ ମହାରଣା ପାରମ୍ପରିକ ପୂଜାର୍ଚ୍ଚନା କରିବା ପରେ ତିନିଟି ଧଉରା କାଠକୁ ପାରମ୍ପରିକ ହତିଆର ବାରିଶି, କୁରାଢି ସେ ସ୍ପର୍ଶ କରିବା ପରେ ରଥ ନିର୍ମାଣ କାର୍ୟ୍ୟ ଆରମ୍ଭ ହୋଇଥାଏ ।
ମହାପ୍ରଭୁ ରଥ ନିର୍ମାଣକୁ ନେଇ ସବୁ ଭକ୍ତ ଓ ସେବାୟତ ମାନେ ବେଶ୍ ଉତ୍ସାହିତ ଅଛନ୍ତି । ତେବେ ମହାପ୍ରଭୁଙ୍କ ରଥ ନିର୍ମାଣ କାର୍ୟ୍ୟ ପବିତ୍ର ଅକ୍ଷୟ ତୃତୀୟାରୁ ଆରମ୍ଭ ହୋଇ ନେତ୍ରୋତ୍ସବରେ ଶେଷ ହୋଇଥାଏ । ମୋଟ ୫୮ ଦିନ ଲାଗେ ତିନି ରଥ ନିର୍ମାଣ ପାଇଁ । ପ୍ରାୟ ଦୁଇ ମାସ ଲାଗେ ମହାପ୍ରଭୁଙ୍କ ରଥ ନିର୍ମାଣ ପାଇଁ । ରଥ ନିର୍ମାଣରେ ୭ ପ୍ରକାର ସେବକ କାର୍ୟ୍ୟ କରିଥାନ୍ତି । ମହାରଣା, ଭୋଇ, ରୂପକାର, ଚିତ୍ରକର, କମାର, କରତି, ଦରଜି । ରଥ ଅମିନ ଉପସ୍ଥିତ ରହି ରଥ ନିର୍ମାଣରେ ସହଯୋଗ କରିଥାନ୍ତି । ତିନି ରଥ ନିର୍ମାଣରେ ମୋଟ ୮୬୫ ଖଣ୍ଡ କାଠ ଆବଶ୍ୟକ ହୋଇଥାଏ ।ଅକ୍ଷୟ ତୃତୀୟାରେ ତିନି ରଥର ନିର୍ମାଣ କାର୍ୟ୍ୟ ଆରମ୍ଭ ହୋଇଥାଏ । ରଥଖଳାରେ ପ୍ରଥମ ପର୍ୟ୍ୟାୟରେ ରଥର ଚକ ପାଇଁ ତୁମ୍ବ ନିର୍ମାଣ କାର୍ୟ୍ୟ ଆରମ୍ଭ କରିଥାନ୍ତି ବିଶ୍ଵକର୍ମା ମହାରଣା ସେବକ । କରତି ସେବକ ମାନେ କାଠକୁ କରତରେ କାଟି ବିଶ୍ଵକର୍ମା ମହାରଣାଙ୍କୁ ଯୋଗାଇ ଥାଆନ୍ତି । ପରେ ନୃସିଂହ ଚତୁର୍ଦ୍ଦଶୀରୁ ଗୁଜ ଅନୁକୂଳ ହୋଇଥାଏ । ଭଉଁରୀ ତିଥିରେ ତିନୋଟି ଅଖରରେ ୬ଟି ଚକଡେରା ନୀତି ହୋଇଥାଏ । ଏହିଭଳି ଭାବରେ ପର୍ୟ୍ୟାୟ କ୍ରମେ ରଥ ବିଭିନ୍ନ କାର୍ୟ୍ୟ କରାଯାଇ ଶ୍ରୀଗୁଣ୍ଡିଚା ଯାତ୍ରା ପୂର୍ବରୁ ପଡ଼ୁଥିବା ନେତ୍ରୋତ୍ସବ ତିଥିରେ ତିନି ରଥର ନିର୍ମାଣ କାର୍ୟ୍ୟ ଶେଷ କରାଯାଇ ରଥ ଖଳାରୁ ତିନି ରଥକୁ ନିଆଯାଇ ଶ୍ରୀମନ୍ଦିର ସିଂହ ଦ୍ୱାର ନିକଟରେ ଲଗାଯାଇଥାଏ ।