ବୃଦ୍ଧଙ୍କୁ ଠେଙ୍ଗାରେ ପିଟିପିଟି ମାରିଦେଲେ

ପାଳଲହଡା : ଅନୁଗୁଳ ଜିଲ୍ଲା ପାଳଲହଡା ଥାନା ବନ୍ଧାଭୂଇଁ ପାଞ୍ଚୟତ ଭୀମକାଣ୍ଡ ଗ୍ରାମରେ ହତ୍ୟା। ବୃଦ୍ଧଙ୍କୁ ଠେଙ୍ଗାରେ ପିଟିପିଟି ମାରିଦେଲେ ଦୁଇ ଭାଇ। ଘଟଣାସ୍ଥଳରେ ପହଞ୍ଚି ଶବ ଜବତ କରି ତଦନ୍ତ କରୁଛି ପୁଲିସ। ଦୁଇ ଅଭିଯୁକ୍ତ ଫେରାର୍। ଗୁରୁବାର ବନ୍ଧାଭୂଇଁ ପାଞ୍ଚୟତ ଭୀମକାଣ୍ଡ ଗ୍ରାମରେ ରଜ ପାଇଁ ଦୋଳି ତିଆରି ଚାଲିଥିଲା। ଏହି ସମୟରେ କାଠ ଛାଲି ଘରକୁ ନେବା ପାଇଁ ଗ୍ରାମ ସମାଜରୁ ବାସନ୍ଦ ହୋଇଥିବା ନକୁଳ ପ୍ରଧାନ (୫୭ ବର୍ଷ) ଓ ଦୁଇ ଭାଇ ଜିତୁ ପ୍ରଧାନ ଏବଂ କାହ୍ନା ପ୍ରଧାନଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ସେମାନେ ନକୁଳ ପ୍ରଧାନଙ୍କୁ କାଠ ଛାଲି ଦେଇନଥିଲେ। ଯାହାଫଳରେ ନକୁଳ ରାଗିଯାଇ ସେମାନଙ୍କ ବାପାକୁ ସାପ କାମୁଡି ଦେବ ବୋଲି କହିଥିଲା। ଦୁର୍ଭାଗ୍ୟବଶତଃ ଗଣ୍ଡଗୋଳ ପରେ ଗତକାଲି ଅପରାହ୍ନରେ ଜିତୁ ଓ କାହ୍ନାଙ୍କ ବାପା ଇଶ୍ୱର ପ୍ରଧାନଙ୍କୁ ସାପ କାମୁଡ଼ି ଦେଇଥିଲା। ଏଥିରେ ଉତ୍ତ୍ୟକ୍ତ ହୋଇ ରାତିରେ ଦୁଇ ଭାଇ ନକୁଳଙ୍କୁ ଘରୁ ଟାଣି ଆଣି ଠେଙ୍ଗାରେ ମାଡ଼ ମାରିଥିଲେ। ଘଟଣାସ୍ଥଳରେ ନକୁଳଙ୍କ ମୃତ୍ୟୁ ହୋଇଥିଲା।

ଏନେଇ ଖବର ପାଇବା ପରେ ପାଳଲହଡା ପୁଲିସ ଏସଡିପିଓ କୈଳାସ ଚନ୍ଦ୍ର ସେଠୀ ଓ ଥାନା ଅଧିକାରୀ ପ୍ରଦୀପ କୁମାର ମହାନ୍ତ ଘଟଣାସ୍ଥଳରେ ପହଞ୍ଚି ଶବ ଜବତ କରିବା ସହିତ ତଦନ୍ତ ଆରମ୍ଭ କରିଛନ୍ତି। ମୁଖ୍ୟ ଅଭିଯୁକ୍ତ ଦୁଇ ଭାଇ ଫେରାର ହୋଇଯାଇଛନ୍ତି। ଦୁଇ ଭାଇଙ୍କ ମଧ୍ୟରୁ ସାନ ଭାଇ ନାବାଳକ ବୋଲି ଜଣାପଡ଼ିଛି।