Garvita Odia
ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଉପରେ ୨୫ ପ୍ରତିଶତ ଟାରିଫକୁ ୭ ଦିନ ପର୍ୟ୍ୟନ୍ତ ମହଲତ ଦେଇଛନ୍ତି । ଆଜି ଠାରୁ ଲାଗୁ ହେବାକୁ ଥିବା ଟାରିଫ ଅଗଷ୍ଟ ୭ ତାରିଖରୁ ଲାଗୁ ହେବ । ଏହି କ୍ରମରେ ଟ୍ରମ୍ପ ୯୨ ଟି ଦେଶ ଉପରେ ଟାରିଫ୍ ଲଗାଇବା ନେଇ ଲିଷ୍ଟ ଜାରି କରିଛନ୍ତି । ଏଥିରେ ଭାରତ ଉପରେ ୨୫ ପ୍ରତିଶତ ଓ ପାକିସ୍ତାନ ଉପରେ ୧୯ ପ୍ରତିଶତ ଟାରିଫ୍ ଘୋଷଣା କରିଛନ୍ତି । ହେଲେ କାନାଡା ଉପରେ ସର୍ବାଧିକ ୩୫ ପ୍ରତିଶତ ଟାରିଫ୍ ଲଗାଇଛନ୍ତି ଟ୍ରମ୍ପ । ଦକ୍ଷିଣ ଏସିଆ ଦେଶ ମଧ୍ୟରେ ସବୁଠାରୁ କମ୍ ଟାରିଫ୍ ପାକିସ୍ତାନ ଉପରେ ଲାଗିଛି । ଏହି କ୍ରମରେ ସବୁଠାରୁ ଅଧିକ ଟାରିଫ୍ ସିରିୟା ଉପରେ ୪୧ ପ୍ରତିଶତ ଲାଗିଛି । ଏବେ ଆମେରିକାର କଷ୍ଟମ ସିଷ୍ଟମ ପ୍ରତି ଦେଶ ଉପରେ ଭିନ୍ନ ଭିନ୍ନ ଟ୍ରାକିଙ୍ଗ କରିବ । ଏପର୍ୟ୍ୟନ୍ତ ଅନେକ ଦେଶକୁ ଗୋଟିଏ ଗ୍ରୁପରେ ରଖି ଆମେରିକା ସମାନ ଟାରିଫ୍ ଲଗାଉଥିଲା । ଏବେ ପ୍ରତିଦେଶ ପାଇଁ ଭିନ୍ନ ଭିନ୍ନ ଟାରିଫ୍ ରେଟ୍ ଘୋଷଣା କରିଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ସେପଟେ ଚୀନ ସିଧାସଳଖ ଆମେରିକାକୁ ସାମଗ୍ରୀ ରପ୍ତାନୀ ନକରି ଅନ୍ୟ ଦେଶମାନଙ୍କ ସହାୟତାରେ ଆମେରିକାକୁ ସାମଗ୍ରୀ ରପ୍ତାନୀ କରୁଛି । ଆମେରିକା କହିଛି କି, ଚୀନ ଉପରେ ସିଧାସଳଖ କୌଣସି ଟାରିଫ୍ ଲଗାଯାଇନାହିଁ । ହେଲେ ଅନ୍ୟ ଦେଶ ସହାୟତାରେ ଆମେରିକାକୁ ଆସୁଥିବା ସାମଗ୍ରୀ ମଧ୍ୟରେ ଯଦି ଚୀନ ସାମଗ୍ରୀ ଚିହ୍ନଟ ହୁଏ ତେବେ ତା ଉପରେ ଅଧିକ ଟାରିଫ୍ ଲାଗିବ । ଏହାସହ ଯଦି କୌଣସି ରପ୍ତାନୀକାରୀ କମ୍ପାନୀ ଭୁଲ ଦେଶର ନାମ କହି ଆମେରିକାକୁ ସାମଗ୍ରୀ ରପ୍ତାନୀ କରେ ତେବେ ତା’ର ସିପ୍ମେଣ୍ଟକୁ ସିଜ୍ କରାଯିବ ।
ସୂଚନା ଥାଉକି, ଟାରିଫ୍ ଏବେ ଲାଗିନାହିଁ । ଏହା ପୂର୍ବରୁ ମଧ୍ୟରେ ଏପ୍ରିଲ ୨ ତାରିଖରୁ ଟ୍ରମ୍ପ୍ ଅନେକ ଦେଶ ଉପରେ ଟାରିଫ୍ ଲଗାଇସାରିଛନ୍ତି ।
