Garvita Odia
ଭୁବନେଶ୍ୱର: ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଗସ୍ତ ପାଇଁ କମିଶନରେଟ ପୁଲିସର ସୁରକ୍ଷା ପ୍ରସ୍ତୁତି ଶେଷ ପର୍ୟ୍ୟାୟରେ ପହଞ୍ଚିଛି । ରବିବାର ସନ୍ଧ୍ୟାରେ ଭୁବନେଶ୍ୱର ବିମାନବନ୍ଦରରୁ ଏମ୍ସ ଯାଏଁ କାରକେଡ୍ ରିହର୍ସାଲ କରାଯାଇଛି । ରାଷ୍ଟ୍ରପତିଙ୍କ ସୁରକ୍ଷା ପାଇଁ ୫୦ ପ୍ଲାଟୁନ୍ ଫୋର୍ସ ମୁତୟନ କରାଯିବ । ଭୁବନେଶ୍ୱର ଏମ୍ସ ପରିସର ସମେତ, କଟକ ରେଭେନ୍ସା ବିଶ୍ୱବିଦ୍ୟାଳୟ, ରେଭେନ୍ସା ବାଳିକା ଉଚ୍ଚ ବିଦ୍ୟାଳୟ ଓ ଇଣ୍ଡୋର ଷ୍ଟାଡିୟମରେ ତନ୍ନତନ୍ନ କରି ସୁରକ୍ଷା ଯାଞ୍ଚ କରାଯାଇଛି । ରାଷ୍ଟ୍ରପତିଙ୍କ ଗସ୍ତକୁ ନଜରରେ ରଖି ଭୁବନେଶ୍ୱରରେ ଟ୍ରାଫିକ୍ କଟକଣା ଜାରି ହୋଇଛି । ସୋମବାର ଓ ମଙ୍ଗଳବାର ସନ୍ଧ୍ୟାରେ କୌଣସି ଭାରୀଯାନ ଭୁବନେଶ୍ୱର ଭିତରକୁ ପଶିପାରିବନି ବୋଲି କମିଶନରେଟ୍ ପୁଲିସ ସୂଚାଇଛି । ଖୋର୍ଦ୍ଧା ପଟୁ ଆସୁଥିବା ଭାରୀଯାନଗୁଡିକ ପିତାପଲ୍ଲୀ ଛକରୁ ଚନ୍ଦକା ଦେଇ କଟକ ଛୁଇଁବ । କଟକ ପଟୁ ଆସୁଥିବା ଭାରୀଯାନ ବାଲିକୁଦା ଛକରୁ ଚନ୍ଦକା ଦେଇ ପିତାପଲ୍ଲୀରେ ବାହାରିବ ।
ସୋମବାର ସନ୍ଧ୍ୟା ୫ଟା ୨୦ ମିନିଟ୍ରେ ଭାରତୀୟ ବାୟୁସେନାର ସ୍ୱତନ୍ତ୍ର ବିମାନରେ ରାଷ୍ଟ୍ରପତି ବିମାନବନ୍ଦରରେ ଓହ୍ଲାଇବା ପରେ ସିଧା ଏମ୍ସକୁ ଯିବେ । ଏୟାରପୋର୍ଟ ଛକରୁ କାରକେଡ୍ଟି କ୍ୟାପିଟାଲ ହସ୍ପିଟାଲ ଛକ, ଏଜି ଛକ, ରାଜଭବନ ଛକ, ପାୱାର ହାଉସ ଛକ, ଶାସ୍ତ୍ରୀନଗର ଛକ, ବେହେରା ସାହି ଛକ, କଳିଙ୍ଗ ଷ୍ଟାଡିୟମ ଛକ ଦେଇ ଜୟଦେବବିହାରରେ ପହଞ୍ଚିବ । ସେଠାରୁ ଏନ୍ଏଚ୍ ୧୬ ଦେଇ ରାଷ୍ଟ୍ରପତିଙ୍କ କାରକେଡ୍ ଖଣ୍ଡଗିରି ଫ୍ଲାଏଓଭର ବ୍ରିଜ୍ରେ ଓହ୍ଲାଇ କସ୍ମୋପଲିସ୍ ଛକ, ଏମ୍ସ ଅଣ୍ଡରପାସ୍ ଦେଇ ଏମ୍ସ ହସ୍ପିଟାଲରେ ପହଞ୍ଚିବ । ସନ୍ଧ୍ୟା ୫ଟାରୁ ୧୦ ମିନିଟ୍ରୁ ୫ଟା ୫୦ ମିନିଟ୍ ଯାଏଁ ଏହି ରୁଟ୍କୁ ବନ୍ଦ କରାଯିବ ।ଏମ୍ସରେ ସମାବର୍ତ୍ତନ ଉତ୍ସବରେ ଯୋଗ ଦେବା ପରେ ରାଷ୍ଟ୍ରପତି ରାଜଭବନକୁ ଯାଇ ରାତ୍ରୀଯାପନ କରିବେ । ଏଥିପାଇଁ ଏମ୍ସ ହସ୍ପିଟାଲରୁ କାରକେଡ୍ ବାହାରି ଆଇଗିଣିଆ ଅଣ୍ଡରପାସ ଦେଇ କସ୍ମୋପଲିସ୍ ଛକରେ ଏନ୍ଏଚ୍-୧୬କୁ ଉଠି କ୍ରାଉନ୍ ହୋଟେଲର ସର୍ଭିସ ରୋଡ ଦେଇ ନିୟୁ ପାଲହାଇଟ୍ କଟ୍ ଦେଇ ୟୁ-ଟର୍ଣ୍ଣ ନେବ । ଏହାପରେ ରାଷ୍ଟ୍ରପତି ଜୟଦେବ ବିହାର ଛକ, ବେହେରା ସାହି ଛକ, ଶାସ୍ତ୍ରୀନଗର ଛକ, ପାୱାର ହାଉସ୍ ଛକ ଦେଇ ରାଜଭବନକୁ ଯିବେ । ଏଥିପାଇଁ ସନ୍ଧ୍ୟା ସାଢ଼େ ୬ଟାରୁ ସନ୍ଧ୍ୟା ୭ଟା ଯାଏଁ ଏହି ରୁଟ୍କୁ ବନ୍ଦ କରାଯିବାକୁ ପୁଲିସ ନିଷ୍ପତ୍ତି ନେଇଛି ।
ମଙ୍ଗଳବାର ସକାଳ ସାଢ଼େ ୯ଟାରେ ରାଜଭବନରୁ ରାଷ୍ଟ୍ରପତି ବାହାରି ପାୱାରହାଉସ୍ ଛକ, ଶାସ୍ତ୍ରୀନଗର ଛକ, ବେହେରା ସାହି ଛକ, ଜୟଦେବବିହାର ଛକରୁ ବାମ ମୋଡ଼ ଦେଇ ନୂଆପଲ୍ଲୀ ଅଣ୍ଡରପାସରୁ ୟୁ-ଟର୍ଣ୍ଣ ନେଇ ଏନ୍ଏଚ୍-୧୬କୁ ଛୁଇଁ କଟକ ଲିଙ୍କ ରୋଡରେ ପହଞ୍ଚିବେ । ସକାଳ ସାଢ଼େ ୯ଟାରୁ ରାଷ୍ଟ୍ରପତିଙ୍କ ଯିବା ଯାଏଁ ଏହି ରାସ୍ତାକୁ ବନ୍ଦ ରଖାଯିବ । ଅପରାହ୍ଣ ୪ଟା ୫୦ ମିନିଟ୍ରେ ରାଷ୍ଟ୍ରପତି କଟକ ଇଣ୍ଡୋର ଷ୍ଟାଡିୟମରୁ ବାହାରି ଏନ୍ଏଚ୍-୧୬ରେ ଜୟଦେବ ବିହାରରେ ପହଞ୍ଚି ଭୁବନେଶ୍ୱର ବିମାନବନ୍ଦରକୁ ଯିବେ । ଏଥିପାଇଁ ସନ୍ଧ୍ୟା ୬ଟା ୧୦ ମିନିଟ୍ ଯାଏଁ ଏହି ରୁଟ୍କୁ ବନ୍ଦ କରାଯିବ ।
