ଶିବୁ ସୋରେନଙ୍କ ପରଲୋକ

ନୂଆଦିଲ୍ଲୀ : ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଶିବୁ ସୋରେନଙ୍କ ସୋମବାର ପରଲୋକ ଘଟିଛି। ଗଙ୍ଗାରାମ ହସ୍ପିଟାଲରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ଜୁନ୍ ୧୯ ତାରିଖରେ ଶିବୁ ସୋରେନଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବା ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ଶିବୁ ସୋରେନ ଅନେକ ରୋଗରେ ପୀଡିତ ଥିଲେ।ଆଜି ସକାଳ ୮:୫୬ରେ ଶିବୁ ସୋରେନ ଶେଷ ନିଶ୍ୱାସ ତ୍ୟାଗ କରିଛନ୍ତି। ସେ ଦୀର୍ଘ ଦିନ ଧରି ଅସୁସ୍ଥ ଥିଲେ। କିଡନୀ ରୋଗରେ ମଧ୍ୟ ପୀଡିତ ଥିଲେ ଏବଂ ଦେଢ଼ ମାସ ପୂର୍ବରୁ ତାଙ୍କୁ ଷ୍ଟ୍ରୋକ ମଧ୍ୟ ହୋଇଥିଲା। ତାଙ୍କ ମୃତ୍ୟୁ ସମ୍ପର୍କରେ ସୂଚନା ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ଏକ୍ସରେ ଦେଇଛନ୍ତି ।
ମୃତ୍ୟୁ ବେଳକୁ ତାଙ୍କୁ ୮୧ ବର୍ଷ ବୟସ ହୋଇଥିଲା । ଦୀର୍ଘ ୧ ବର୍ଷ ଧରି ତାଙ୍କର ଡାଏଲିସିସ୍ କରାଯାଉଥିଲା। ବ୍ରେନ୍ ଷ୍ଟ୍ରୋକ୍ ମଧ୍ୟ ହୋଇଥିଲା। ଏହା ପୂର୍ବରୁ ତାଙ୍କର ହୃଦ୍‌ରୋଗ ଜନିତ ଅସ୍ତ୍ରୋପଚାର ମଧ୍ୟ କରାଯାଇଥିଲା। ସେ ଦୀର୍ଘ ଦିନ ଧରି ମଧୁମେହରେ ମଧ୍ୟ ପୀଡିତ ଥିଲେ।
ଶିବୁ ସୋରେନ ଅନେକ ରୋଗରେ ପୀଡିତ ଥିଲେ ମଧ୍ୟ ତାଙ୍କ ମୃତ୍ୟୁର ମୁଖ୍ୟକାରଣ କିଡନୀ ସମ୍ବନ୍ଧୀୟ ସ୍ୱାସ୍ଥ୍ୟ ସମସ୍ୟା ବୋଲି କୁହାଯାଉଛି। କିଡନୀ ରୋଗ ଯୋଗୁଁ ତାଙ୍କୁ ବ୍ରେନ୍‌ ଷ୍ଟ୍ରୋକ ମଧ୍ୟ ହୋଇଥିଲା।ପୂର୍ବତନ ମୁଖ୍ୟମନ୍ତ୍ରୀ ରାମଗଡ଼ ଜିଲ୍ଲାର ନେମରା ଗାଁରେ ଜନ୍ମଗ୍ରହଣ କରିଥିଲେ। ମୁଖ୍ୟମନ୍ତ୍ରୀ ହେବା ବ୍ୟତୀତ ସେ ମନମୋହନ ସରକାରରେ କୋଇଲା ମନ୍ତ୍ରୀ ଭାବରେ ମଧ୍ୟ କାର୍ୟ୍ୟ କରିଛନ୍ତି। ସେ ୧୯୭୦ ମସିହାରେ ରାଜନୀତିରେ ପ୍ରବେଶ କରିଥିଲେ।
ଶିବୁ ସୋରେନ ୪ ଦଶନ୍ଧିରୁ ଅଧିକ ସମୟ ଧରି ରାଜନୀତିରେ ସକ୍ରିୟ ଥିଲେ । ସେ ଝାଡଖଣ୍ଡର ୩ ଥର ମୁଖ୍ୟମନ୍ତ୍ରୀ, ୮ ଥର ଲୋକସଭା ସାଂସଦ ଓ ୩ ଥର ରାଜ୍ୟସଭା ସାଂସଦ ଭାବେ ନିର୍ବାଚିତ ହୋଇଥିଲେ । ୟୁପିଏ ସରକାରରେ ସେ କେନ୍ଦ୍ରମନ୍ତ୍ରୀ ଭାବେ ଦାୟିତ୍ୱ ମଧ୍ୟ ନିର୍ବାହ କରିଥିଲେ ।