ସାନଭାଇକୁ ହାଣିଲା ବଡ଼ଭାଇ

ଭୋଗରାଇ: ପୂର୍ବ ଶତ୍ରୁତାରୁ ସାନଭାଇକୁ ଅତି ବିଭତ୍ସ ଭାବରେ ହାଣି ହତ୍ୟା କରିଥିବା ଅଭିଯୋଗ ହୋଇଛି । ବାଲେଶ୍ଵର ଜିଲ୍ଲା ଭୋଗରାଇ ଥାନା ଅଧୀନ ଅନଳିଆ ପଞ୍ଚାୟତର ମାନକୁଣ୍ଡା ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି । ମୃତକ ହେଉଛନ୍ତି ମାନକୁଣ୍ଡା ଗ୍ରାମର ସ୍ୱର୍ଗତ ଗୌରାଙ୍ଗ ମଣ୍ଡଳଙ୍କ ମଝିଆ ପୁଅ ନିମାଇଁ ମଣ୍ଡଳ (୫୦ବର୍ଷ) ।ଅଭିଯୋଗ ଅନୁଯାୟୀ, ଗୁରୁବାର ରାତି ପ୍ରାୟ ୧୨ଟା ସମୟରେ ବଡ଼ଭାଇ ନିଆଁସ ମଣ୍ଡଳ ନିଜ ସାନଭାଇ ନିମାଇଁକୁ କୌଣସି କାରଣରୁ ଘରୁ ଡାକି ନେଇଥିଲେ । ପରେ ନିମାଇଁ ଘରକୁ ନ ଫେରିବାରୁ ପରିବାର ଲୋକେ ବହୁ ଖୋଜାଖୋଜି କରିଥିଲେ । ହେଲେ ତାଙ୍କର କୌଣସି ପତ୍ତା ମିଳିନଥିଲା । ତେବେ ଆଜି ସକାଳେ ନିଆଁସଙ୍କ ଘର ସମ୍ମୁଖରେ ନିମାଇଁଙ୍କ ରକ୍ତ ଜୁଡୁବୁଡୁ ମୃତଦେହ ପଡ଼ିଥିବା ଗାଁଲୋକେ ଦେଖି ପରିବାର ଲୋକଙ୍କୁ ଖବର ଦେଇଥିଲେ । ପରେ ଖବରପାଇ ଭୋଗରାଇ ପୁଲିସ ଘଟଣାସ୍ଥଳରେ ପହଞ୍ଚି ସାଇଣ୍ଟିଫିକ ଟିମ୍‌ ସହାୟତାରେ ତଦନ୍ତ ଆରମ୍ଭ କରିଥିବା ଜଣାପଡିଛି । ଅନ୍ୟପକ୍ଷରେ ଉକ୍ତ ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ।