Garvita Odia
ବିଶାଖାପାଟଣା: ଆଜି ୧୧ତମ ‘ଅନ୍ତର୍ଜାତୀୟ ଯୋଗ ଦିବସ’ ପାଳନ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଶାଖାପାଟଣାରେ ଉପସ୍ଥିତ ରହି ଏକ କାର୍ୟ୍ୟକ୍ରମରେ ଯୋଗ ଦେଇଛନ୍ତି। ପ୍ରାୟ ପାଞ୍ଚ ଲକ୍ଷ ଲୋକ ବନ୍ଦର ସହରର ଆରକେ ବିଚ୍ – ଗୋଟିଏ ସ୍ଥାନରେ ମୋଦିଙ୍କ ସହ ଯୋଗ ଆସନ କରିଛନ୍ତି। ଏଥିପାଇଁ ବେଳାଭୂମିରୁ ଭୀମଲି ପର୍ୟ୍ୟନ୍ତ ବିସ୍ତାରିତ ୨୬ କିଲୋମିଟର ରାସ୍ତା ବ୍ୟାରିକେଡ୍, ଲାଇଟ୍ ଏବଂ ବିଶାଳ ସ୍କ୍ରିନ୍ ସହିତ ସଜ୍ଜିତ ହୋଇଛି। ଯାହା ପୂର୍ବର ଯେକୌଣସି ସାମୁହିକ ଯୋଗ କାର୍ୟ୍ୟକ୍ରମକୁ ପଛରେ ପକାଇ ଅନ୍ତର୍ଜାତୀୟ ରେକର୍ଡ ପୁସ୍ତକରେ ସ୍ଥାନ ପାଇବା ପାଇଁ ଲକ୍ଷ୍ୟ ରଖାଯାଇଛି।
ଯୋଗଆନ୍ଧ୍ରା ୨୦୨୫ ନାମକ ଏହି କାର୍ୟ୍ୟକ୍ରମରେ କେନ୍ଦ୍ର ଆୟୁଷ ମନ୍ତ୍ରୀ ପ୍ରତାପରାଓ ଜାଧବ ଏବଂ ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଏବଂ ଉପମୁଖ୍ୟମନ୍ତ୍ରୀ ପବନ କଲ୍ୟାଣ ମଧ୍ୟ ଯୋଗ ଦେଉଛନ୍ତି।୨୦୨୫ ମସିହାର ଅନ୍ତର୍ଜାତୀୟ ଯୋଗ ଦିବସରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆନ୍ଧ୍ରପ୍ରଦେଶର ବିଶାଖାପାଟଣାରେ ଆୟୋଜିତ ଏକ କାର୍ୟ୍ୟକ୍ରମରେ ଯୋଗ ଦେଇଥିଲେ। ଏହି ଅବସରରେ, ସେ ଦେଶ ଏବଂ ବିଶ୍ୱର ଲୋକମାନଙ୍କୁ ଅନ୍ତର୍ଜାତୀୟ ଯୋଗ ଦିବସରେ ତାଙ୍କର ହୃଦୟସ୍ପର୍ଶୀ ଶୁଭେଚ୍ଛା ଜଣାଇଥିଲେ। ସେ କହିଛନ୍ତି ଯେ, ୧୧ତମ ଥର ପାଇଁ ଜୁନ୍ ୨୧ ତାରିଖରେ ସମଗ୍ର ବିଶ୍ୱ ଯୋଗ ଅଭ୍ୟାସ ପାଇଁ ଏକାଠି ହେଉଛି। ଯୋଗର ଅର୍ଥ କେବଳ ‘ଏକତ୍ରିତ ହେବା’ ଏବଂ ଯୋଗ କିପରି ସମଗ୍ର ବିଶ୍ୱକୁ ଏକତ୍ରିତ କରିଛି ତାହା ଦେଖିବା ଏକ ଆନନ୍ଦର କଥା।
ପ୍ରତିବର୍ଷ ୨୧ ଜୁନ୍ ରେ ପାଳିତ ହେଉଥିବା ଅନ୍ତର୍ଜାତୀୟ ଯୋଗ ଦିବସ ଶରୀର ଏବଂ ଆତ୍ମାକୁ ପୋଷଣ କରୁଥିବା କାଳଜୟୀ ଅଭ୍ୟାସକୁ ପାଳନ କରେ। ଏହା ପ୍ରଥମେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୦୧୪ରେ ମିଳିତ ଜାତିସଂଘ ସାଧାରଣ ସଭାରେ ପ୍ରସ୍ତାବ ଦେଇଥିଲେ।
