Garvita Odia
ନୂଆଦିଲ୍ଲୀ: ଇସ୍ରାଏଲ ଏବଂ ଇରାନ ମଧ୍ୟରେ ଯୁଦ୍ଧକୁ ୯ଦିନ ବିତିଲାଣି । ଯୁଦ୍ଧର ୧୦ମ ଦିନରେ ଉଭୟ ଦେଶ ପରସ୍ପରକୁ ଧ୍ୱଂସ କରିବା ଜିଦ୍ ରେ ଅଟଳ ରହିଛନ୍ତି । ଇସ୍ରାଏଲ ଦାବି କରିଛି ଯେ ଯେର୍ପ୍ୟନ୍ତ ସେ ତାର ଲକ୍ଷ୍ୟ ହାସଲ କରିନାହିଁ, ସେପର୍ୟ୍ୟନ୍ତ ଇରାନ ଉପରେ ଇସ୍ରାଏଲ ଆକ୍ରମଣ ବନ୍ଦ କରିବ ନାହିଁ । ସେହିପରି ଇରାନ ଦାବି କରି କହିଛି ଯେ ଯଦି ଇସ୍ରାଏଲ ଆକ୍ରମଣ ବନ୍ଦ କରେ, ତେବେ ସେ ପ୍ରତିଶୋଧ ନେବା ମଧ୍ୟ ବନ୍ଦ କରିବ । ନଚେତ ସେ ତାର ସମସ୍ତ ଶକ୍ତି ଲଗାଇ ପ୍ରତିଶୋଧ ନେବ । ଯୁଦ୍ଧ ଭିତରେ ଇରାନରେ ୭୦ଘଣ୍ଟା ହେବ ଇଣ୍ଟରନେଟ ବନ୍ଦ ରହିଛି । ଫଳରେ ଇଣ୍ଟରନେଟ୍ କାରବାର ଏବଂ ସରକାରୀ କାମ ସମ୍ପୂର୍ଣ୍ଣ ବନ୍ଦ ରହିଛି ।
ସୂଚନା ଅନୁସାରେ ଯୁଦ୍ଧ ଯୋଗୁଁ ଇରାନର ପରମାଣ କାର୍ୟ୍ୟକ୍ରମ ୨-୩ବର୍ଷ ପଛକୁ ଠେଲି ହୋଇଯାଇଛି । ସେହିପରି ଇସ୍ରାଏଲ ମଧ୍ୟ ବିକାଶ ପଥରେ ପୁଣି ଥରେ ନିଜକୁ ଫେରାଇ ଆଣିବାକୁ କଷ୍ଟକର ହେବ । ଇରାନୀ ମାନବାଧିକାର ଗୋଷ୍ଠୀଙ୍କ ତଥ୍ୟ ଅନୁସାରେ ୯ଦିନିଆ ଯୁଦ୍ଧରେ ଏଯାବତ ଇସ୍ରାଏଲୀ ଆକ୍ରମଣରେ ୬୫୦ରୁ ଅଧିକ ଇରାନୀ ଲୋକ ପ୍ରାଣ ହରାଇଛନ୍ତି ଏବଂ ୨୦୦୦ରୁ ଅଧିକ ଲୋକ ଆହତ ହୋଇଛନ୍ତି । ସେପଟେ ଇରାନର ଆକ୍ରମଣରେ ପ୍ରାୟ ୨୫ଇସ୍ରାଏଲୀ ଲୋକ ପ୍ରାଣ ହରାଇଛନ୍ତି ଏବଂ ୧୦୦୦ ଲୋକ ଆହତ ହୋଇଛନ୍ତି ।
