ଆଜିଠୁ ସଂସଦର ମୌସୁମୀ ଅଧିବେଶନ

ନୂଆଦିଲ୍ଲୀ: ଆଜିଠୁ ଠାରୁ ସଂସଦର ମୌସୁମୀ ଅଧିବେଶନ ଆରମ୍ଭ ହେବ। ଅଗଷ୍ଟ ୨୧ ତାରିଖ ପର୍ୟ୍ୟନ୍ତ ଏହା ଚାଲିବ।ଅଗଷ୍ଟ ୨୧ ପର୍ୟ୍ୟନ୍ତ ଚାଲିବାକୁ ଥିବା ଏହି ଅଧିବେଶନ କାଳରେ ସରକାର ୧୫ଟି ନୂଆ ଓ ପୁରୁଣା ବିଧେୟକକୁ ଗୃହୀତ କରିବାକୁ ଯୋଜନା କରିଛନ୍ତି। ଏହା ମଧ୍ୟରେ ରହିଛି ଆୟକର ବିଧେୟକ ୨୦୨୫। ଏହି ବିଧେୟକକୁ ଗତ ବଜେଟ୍ ଅଧିବେଶନ କାଳରେ ଆଗତ କରାଯାଇଥିଲା। ଏହି ବିଧେୟକ ଦ୍ବାରା ସରକାର ୧୯୬୧ରୁ ପ୍ରଚଳିତ ଆୟକର ଆଇନରେ ବ୍ୟାପକ ପରିବର୍ତ୍ତନ ଆଣିବାକୁ ଲକ୍ଷ୍ୟ ରଖିଛନ୍ତି।

ମୌସୁମି ଅଧିବେଶନ କାଳରେ ଗୃହୀତ କରାଯିବାକୁ ଥିବା ଅନ୍ୟାନ୍ୟ ବିଧେୟକ ମଧ୍ୟରେ ରହିଛି ଲ୍ୟାଣ୍ଡିଂ ବିଲ୍‌, କୋଷ୍ଟାଲ ସିପିଙ୍ଗ ବିଲ୍‌, ମର୍ଚ୍ଚାଣ୍ଟ ସିପିଙ୍ଗ ବିଲ୍‌, ଇଣ୍ଡିଆନ ପୋର୍ଟସ୍ ବିଲ୍‌, ଜନ ବିଶ୍ବାସ ବିଲ୍‌, ଇଣ୍ଡିଆନ ଇନଷ୍ଟିଚ୍ୟୁଟ୍ ଅଫ୍ ମ୍ୟାନେଜମେଣ୍ଟ ବିଲ୍‌, ଦ ଟ୍ୟାକ୍ସେସନ୍ ବିଲ୍‌, ମାଇନ୍ସ ଆଣ୍ଡ ମିନେରାଲ୍ସ ବିଲ୍‌, ନ୍ୟାସନାଲ ସ୍ପୋର୍ଟସ୍ ଗଭର୍ଣ୍ଣାନ୍ସ ବିଲ୍‌ ଓ ନ୍ୟାସନାଲ ଆଣ୍ଟି ଡୋପିଙ୍ଗ ବିଲ୍‌ ଇତ୍ୟାଦି।

ବିଭିନ୍ନ ପ୍ରସଙ୍ଗରେ ସରକାରଙ୍କୁ ଘେରିବା ପାଇଁ ପ୍ରମୁଖ ବିରୋଧୀ ଦଳ ରଣନୀତି ପ୍ରସ୍ତୁତ କରିଛନ୍ତି। ଏହି କ୍ରମରେ ରାଜ୍ୟରେ ବିପର୍ୟ୍ୟସ୍ତ ଆଇନଶୃଙ୍ଖଳା ଓ ନାରୀ ନିର୍ୟାତନାକୁ ବିଜେଡି ଓ କଂଗ୍ରେସ ପ୍ରମୁଖ ପ୍ରସଙ୍ଗ କରିବେ ବୋଲି ଜଣାପଡ଼ିଛି। ଗୋପାଳପୁର ବେଳାଭୂମିରେ ଛାତ୍ରୀଙ୍କୁ ଗଣଦୁଷ୍କର୍ମ, ବାଲେଶ୍ବର ଛାତ୍ରୀଙ୍କ ଆତ୍ମଦାହ, ବଳଙ୍ଗା ଛାତ୍ରୀଙ୍କୁ ନିଆଁ ଲଗାଇ ହତ୍ୟା ଉଦ୍ୟମ ଏବଂ ଭୁବନେଶ୍ବର ମହାନଗର ନିଗମ(ବିଏମ୍‌ସି)ର ଅତିରିକ୍ତ କମିସନରଙ୍କୁ ଅଫିସରେ ପଶି ସ୍ଥାନୀୟ ବିଜେପି କାର୍ୟ୍ୟକର୍ତ୍ତା ମାରପିଟ୍‌ କରିବା ଭଳି ଏକାଧିକ ପ୍ରସଙ୍ଗକୁ ବିଜେଡି ସଂସଦରେ ଜୋରରେ ଉପସ୍ଥାପନ କରିବ ବୋଲି ବିଜେଡି ସାଂସଦ ସସ୍ମିତ ପାତ୍ର କହିଛନ୍ତି।
ସେ କହିଛନ୍ତି, ଓଡ଼ିଶାରେ ସଂପୂର୍ଣ୍ଣ ରୂପେ ଆଇନଶୃଙ୍ଖଳା ଭୁଶୁଡ଼ି ପଡ଼ିଛି। ରାଜ୍ୟରେ ନାରୀ ଓ ଶିଶୁମାନେ ଆଦୌ ସୁରକ୍ଷିତ ନୁହନ୍ତି। ଡବଲ ଇଂଜିନ ସରକାର ବୋଲି ଡିଣ୍ଡିମ ପିଟୁଥିବା ବିଜେପି ଆଜି ଦିଲ୍ଲୀରେ ବସି ରାଜ୍ୟର ପ୍ରସଙ୍ଗ ଆଳରେ ଘଟଣାଗୁଡିକୁ ଏଡ଼ାଇ ଦେଇପାରିବ ନାହିଁ। ନିକଟରେ ହୋଇଥିବା ରଥଯାତ୍ରା ପରିଚାଳନାରେ ବିଭ୍ରାଟ ଓ ଦଳାଚକଟା ଘଟଣା ସମେତ ଅନ୍ୟାନ୍ୟ ରାଜ୍ୟ ସ୍ବାର୍ଥ ସମ୍ବଳିତ ପ୍ରସଙ୍ଗଗୁଡ଼ିକୁ ବିଜେଡି ଉଠାଇବ।

କଂଗ୍ରେସ ସାଂସଦ ସପ୍ତଗିରି ଶଙ୍କର ଉଲାକା କହିଛନ୍ତି, ମୌସୁମୀ ଅଧିବେଶନରେ ଜାତୀୟ ପ୍ରସଙ୍ଗ ସହ ଓଡ଼ିଶା ପ୍ରସଙ୍ଗ ଉଠାଯିବ। ରାଜ୍ୟରେ ଆଇନ ଶୃଙ୍ଖଳା, ପ୍ରଶାସନିକ ଅପରାଗତା ଯୋଗୁଁ ମହିଳା ବିରୋଧୀ ହିଂସାର ଗ୍ରାଫ୍‌ ଲଗାତାର ବଢ଼ିବା ଓଡ଼ିଶାର ଛବିକୁ ଜାତୀୟ ଓ ଆନ୍ତର୍ଜାତିକ ସ୍ତରରେ ମଳିନ କରିଛି। ଗୋପାଳପୁର ଗଣଦୁଷ୍କର୍ମ ଘଟଣା, ରଥଯାତ୍ରା ଅଘଟଣ, ବାଲେଶ୍ବର ଏଫ୍‌ଏମ୍‌ କଲେଜ ଛାତ୍ରୀଙ୍କ ଆତ୍ମଦାହ ଘଟଣାରେ ରାଜ୍ୟ ସରକାରଙ୍କ ବିଫଳତାକୁ ଦଳ ଦ୍ବାରା ନିଶାଣ କରାଯାଇଛି। କଂଗ୍ରେସର ଶୀର୍ଷ ନେତୃତ୍ବ ଓଡ଼ିଶା ପ୍ରସଙ୍ଗରେ ସକ୍ରିୟ ରହିଛନ୍ତି। ଅତଏବ ସଂସଦରେ ଦଳ ଦ୍ବାରା ଏସବୁ ପ୍ରସଙ୍ଗଗୁଡ଼ିକୁ ଅତ୍ୟନ୍ତ ପ୍ରଭାବଶାଳୀ ଢଙ୍ଗରେ ଉଠାଯିବ। ଅନ୍ୟ ପ‌କ୍ଷେ ବିଜେପିର ବରିଷ୍ଠ ସାଂସଦ ରୁଦ୍ର ନାରାୟଣ ପାଣି କହିଛନ୍ତି, ବିରୋଧୀଙ୍କ ଦ୍ବାରା ଉଠାଯିବାକୁ ଥିବା ପ୍ରସଙ୍ଗର ଉପଯୁକ୍ତ ଜବାବ ଦିଆଯିବ। ଏଥି ସହିତ ପଶ୍ଚିମବଙ୍ଗ ପ୍ରୋତ୍ସାହନରେ ଓଡ଼ିଶାକୁ ପଶି ଆସୁଥିବା ବାଂଲାଦେଶୀ ଅନୁପ୍ରବେଶକାରୀଙ୍କ ସମସ୍ୟା ପ୍ରସଙ୍ଗ ଉଠାଯାଇ କେନ୍ଦ୍ର ସରକାରଙ୍କ ହସ୍ତକ୍ଷେପ ଲୋଡ଼ାଯିବ।