ଆସୁଛି ଦଶହରା,୨୦ ସୁଦ୍ଧା ସହରାଞ୍ଚଳ ରାସ୍ତା ମରାମତି

ଭୁବନେଶ୍ବର,04/09: ଭୁବନେଶ୍ବର ଏବଂ କଟକ ସହର ମୁଖ୍ୟ ରାସ୍ତାଠାରୁ ଆରମ୍ଭ କରି ଗଳିକନ୍ଦି ରାସ୍ତା ଖରାପ ହୋଇ ଗଲାଣି। କେଉଁଠି ରାସ୍ତାରୁ ପିଚୁ ଉଠି ଗଲାଣି ତ ଆଉ କେଉଁଠି ବଡ଼ ଗର୍ତ୍ତ ସୃଷ୍ଟି ହୋଇଛି। ଲୋକମାନେ ଗମନାଗମନରେ ନାହିଁ ନଥିବା ସମସ୍ୟାରେ ପଡୁଛନ୍ତି। ଆଗକୁ ଆସୁଛି ଦଶହରା, ତେଣୁ ସେପ୍ଟେମ୍ବର ୨୦ ସୁଦ୍ଧା ଭୁବନେଶ୍ବର – କଟକ ସହର ରାସ୍ତା ମରାମତି କରାଯିବ ବୋଲି ପୂର୍ତ୍ତ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି। ମନ୍ତ୍ରୀ ଶ୍ରୀ ହରିଚନ୍ଦନ ଗଣମାଧ୍ୟମକୁ କହିଥିଲେ, ପାର୍ବଣ ଋତୁରେ ଲୋକଙ୍କ ସୁବିଧା ନିମନ୍ତେ ଭୁବନେଶ୍ବର ଓ କଟକ ସହିତ ରାଜ୍ୟର ସହରାଞ୍ଚଳ ରାସ୍ତା ମରାମତି କରାଯିବ। ଏଥିପାଇଁ ଆସନ୍ତା ୬ରେ ପୂର୍ତ୍ତ ବିଭାଗ ପକ୍ଷରୁ ଏକ ସମୀକ୍ଷା ବୈଠକ ଅନୁଷ୍ଠିତ ହେବ। ଏଥିରେ ଭୁବନେଶ୍ବର ମହାନଗର ନିଗମ ଏବଂ କଟକ ମହାନଗର ନିଗମ ମେୟରଙ୍କ ସହ ବିଧାୟକ ଏବଂ ବିଭାଗର ଯନ୍ତ୍ରୀମାନେ ଉପସ୍ଥିତ ରହିବେ।