କେନାଲକୁ ଖସିଲା କାର୍:୧୧ ମୃତ

ଉତ୍ତରପ୍ରଦେଶ: ଉତ୍ତରପ୍ରଦେଶରେ ବଡ଼ ସଡକ ଦୁର୍ଘଟଣା । କେନାଲକୁ ଖସିଲା କାର୍ । ଭାରସାମ୍ୟ ହରାଇ କେନାଲକୁ ଖସି ପଡିଲା ଏସୟୁଭି ଗାଡ଼ି । ଦୁର୍ଘଟଣାରେ ୧୧ ଜଣଙ୍କ ମୃତ୍ୟୁ ହୋଇଥିବା ବେଳେ ୪ ଜଣ ଗୁରୁତର ଆହତ ହୋଇଛନ୍ତି । ତେବେ ଦୁର୍ଘଟଣାରେ ପ୍ରାଣ ହରାଇଥିବା ସମସ୍ତ ଶ୍ରଦ୍ଧାଳୁ ଆଗ୍ରାର ସେହା ଗାଁର । ସେମାନେ ଗାଡ଼ିରେ ପୃଥ୍ବୀନାଥ ମନ୍ଦିରକୁ ଦର୍ଶନ ପାଇଁ ଯାଉଥିଲେ । ଶ୍ରାବଣ ସୋମବାରରେ ପାଣି ଢାଳିବାକୁ ଯାଉଥିଲେ । ହେଲେ ଅଧା ରହିଗଲା ଶିବଙ୍କ ଦର୍ଶନ, ଅଧୁରା ରହିଗଲା ମହାଦେବଙ୍କ ମଥାରେ ପାଣି ଢାଳିବା । କାରଣ ବାଟରେ ୧୧ ଜଣ ଶବ ପାଲଟିଯାଇଥିବା ବେଳେ ୪ ଗୁରୁତର ଅଛନ୍ତି ।
ତେବେ ସୂଚନା ଅନୁସାରେ କାରରେ ୧୫ ଜଣ ଯାତ୍ରୀ ଥିଲେ । ଚାଳକ ଭାରସାମ୍ୟ ହରାଇ ଏକ କେନାଲକୁ ଗାଡ଼ି ଖସାଇ ଦେବା ଫଳରେ ଦୁର୍ଘଟଣା ହୋଇଛି । ଇକାଇଥୋକ ନିକଟରେ ଏହି ଦୁର୍ଘଟଣା ହୋଇଥିବା ବେଳେ ମୃତକଙ୍କ ମଧ୍ୟରେ ଶିଶୁ ଠାରୁ ଆରମ୍ବ କରି ବୟସ୍କ ଯାଏଁ ସମସ୍ତେ ରହିଛନ୍ତି ।
ସେପଟେ ୧୧ ଶ୍ରଦ୍ଧାଳୁଙ୍କ ମୃତ୍ୟୁରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଶୋକ ପ୍ରକାଶ କରିବା ସହ ପ୍ରତି ମୃତକଙ୍କ ପରିବାର ପିଛା ୫ ଲକ୍ଷ ଟଙ୍କା ଘୋଷଣା କରିଛନ୍ତି । ଅନ୍ୟପଟେ ଦୁର୍ଘଟଣା ପରେ ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଛି ।