ମହିଳାଙ୍କୁ ପ୍ରେମ ନିବେଦନ କରି ହାବିଲଦାର ନିଲମ୍ବିତ

କେନ୍ଦ୍ରାପଡ଼ା: ଜଣେ ମହିଳାଙ୍କୁ ପ୍ରେମ ନିବେଦନ କରିବା ସହ ଅନୈତିକ ସମ୍ପର୍କ ରଖିବାକୁ ପ୍ରବର୍ତ୍ତାଇବା ଓ ଧମକାଇବା ଅଭିଯୋଗରେ ଚାକିରିରୁ ନିଲମ୍ବିତ ହୋଇଛନ୍ତି କୁଦାନଗରୀ ଥାନାରେ କାର୍ୟ୍ୟରତ ହାବିଲଦାର ଅଜୟ ସାହୁ । ତାଙ୍କୁ ନିଲମ୍ବନ କରାଯିବା ସହ ବିଭାଗୀୟ ତଦନ୍ତ ମଧ୍ୟ ଆରମ୍ଭ ହୋଇଥିବା କେନ୍ଦ୍ରାପଡ଼ା ଜିଲ୍ଲା ଏସ୍‌ପି ସିଦ୍ଧାର୍ଥ କଟ୍ଟାରିଆ ସୂଚନା ଦେଇଛନ୍ତି । ଅଜୟ ଜଣେ ମହିଳାଙ୍କ ଅସହାୟତାର ସୁଯୋଗ ନେଇ ତାଙ୍କୁ ପ୍ରେମ ନିବେଦନ କରିବା ସହ ଏକୁଟିଆ ଦେଖି ଅଶ୍ଳୀଳ ଇଙ୍ଗିତ କରି ଟଣାଓଟରା କରିଥିଲେ। ପ୍ରତିବାଦ କରିବାରୁ ଅଜୟ ତାଙ୍କୁ ମାଡ଼ ମାରି ତଣ୍ଟି ଚିପି ଦେବାକୁ ମଧ୍ୟ ଉଦ୍ୟମ କରିଥିବା ପୀଡ଼ିତା ଅଗଷ୍ଟ ୨୩ ତାରିଖରେ ଏସ୍‌ପିଙ୍କୁ ଭେଟି ଅଭିଯୋଗ କରିଥିଲେ। ଏସ୍‌ପିଙ୍କ ନିର୍ଦ୍ଦେଶ କ୍ରମେ ମାର୍ଶାଘାଇ ପୁଲିସ ମାମଲା ରୁଜୁ କରିଥିଲା । ଅଜୟ ସଂପୃକ୍ତ ମହିଳାଙ୍କ ମୋବାଇଲ୍‌ ନମ୍ବର ରଖି ଗତ ଶୁକ୍ରବାରଠାରୁ ତାଙ୍କୁ ବାରମ୍ବାର ଫୋନ୍‌ କରି ପ୍ରେମ ନିବେଦନ କରିବା ସହ ବାହାରକୁ ବୁଲିବା ପାଇଁ ଡାକୁଥିଲେ, ପ୍ରଲୋଭିତ କରୁଥିଲେ, ଧମକାଉଥିଲେ । ସଂପୃକ୍ତ ମହିଳାଙ୍କ ସହ ଅଜୟଙ୍କର ଏସଂକ୍ରାନ୍ତ ବାର୍ତ୍ତାଳାପର ଅଡିଓ ଭାଇରାଲ୍‌ ହେବା ପରେ ଅଜୟ ଆଉ ଥାନାକୁ ଯାଇନାହାନ୍ତି । ସେ ଡ୍ୟୁଟିରେ ଅନୁପସ୍ଥିତ ରହିବା ନେଇ ଥାନାଧିକାରୀ ଏସ୍‌ପିଙ୍କୁ ରିପୋର୍ଟ କରିଥିଲେ । ପରେ ତାଙ୍କ ବିରୋଧରେ କାର୍ୟ୍ୟାନୁଷ୍ଠାନ ନିଆଯାଇ ମାମଲାର ତଦନ୍ତ ଚାଲୁ ରହିଛି ।