ଏସସିବି ଅଗ୍ନିକାଣ୍ଡ: ତଦନ୍ତ ଦାବି କଲେ ସୁବାସ ସିଂ

କଟକ : କଟକ ଏସସିବି ହସ୍ପିଟାଲରେ ଭୟଙ୍କର ଭାବେ ଅଗ୍ନିକାଣ୍ଡ ଘଟିଛି । ନିଆଁ ଲାଗିବା ଘଟଣାରେ କଟକ ମେୟର ସୁବାସ ସିଂ ମଧ୍ୟ ନିଜ ପ୍ରତିକ୍ରିୟା ପ୍ରକାଶ କରି ସରକାରଙ୍କ ଉପରେ ପ୍ରବଳ ବର୍ଷିଛନ୍ତି । ସେ କହିଛନ୍ତି ଯେ ସେ ଏସିସିବି ମେଡ଼ିକାଲ ସହ ୪୦ରୁ ୪୫ ବର୍ଷ ହେବ ଯୋଡ଼ି ହୋଇ ରହିଛନ୍ତି । ଆଗରୁ କେବେବି ଏଭଳି ଘଟଣା ଘଟିନଥିଲା । ଏହା ପ୍ରଥମ ଥର ହୋଇଛି ବୋଲି ଖୋଦ୍ ମେୟର କହିଛନ୍ତି । ସେ ଏହା ମଧ୍ୟ କହିଛନ୍ତି ଯେ ବିରୋଧୀ ଦଳର ନେତା ଓରଫ୍ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯେତେବେଳେ ଏକଥା ଶୁଣିଲେ ସେ ସ୍ତମ୍ଭୀଭୂତ ହୋଇଯାଇଥିଲେ ।
ମେୟରଙ୍କୁ ସୂଚନା ମଧ୍ୟ ଦେଲେ ଯେ ଘଟଣାସ୍ଥଳରେ ରହି ସ୍ଥିତି ଅନୁଧ୍ୟାନ କର । ଲୋକଙ୍କ ପାଖରେ ରହି ପରିବାରକୁ ସାନ୍ତ୍ବନା ଦେବେ କଥା ମଧ୍ୟ ବିଜେଡି ସୁପ୍ରିମୋ ନବୀନ ପଟ୍ଟନାୟକ କହିଥିଲେ । ୬ରୁ ୮ଟି ରାଜ୍ୟର ଲୋକମାନେ ଏହି ମେଡ଼ିକାଲ ଉପରେ ନିର୍ଭର କରୁଛନ୍ତି । ପୂର୍ବରୁ ମଧ୍ୟ ଗଣମାଧ୍ୟମ ଏସିବିର ସ୍ଥିତି ଉପରେ ଖବର ମଧ୍ୟ ପ୍ରସାରଣ କରିଥିଲା । ହେଲେ ପ୍ରଶାସନ ସମ୍ପୂର୍ଣ୍ଣ ରୂପେ ଚୁପ୍ ହୋଇ ବସିଥିଲା । ମେଡ଼ିକାଲର ସୁରକ୍ଷାକୁ ନେଇ ପ୍ରଶାସନ ଆଦୌ ସଚେତନ ନୁହେଁ ଯାହା ସ୍ପଷ୍ଟ ବାରି ହୋଇପଡୁଛି । ଆଗରୁ ପ୍ରତିବାଦ ହେବା ସତ୍ତ୍ବେ ବି ପ୍ରଶାସନ କାହଁକି ଚୁପ୍ ଏନେଇ ସେ ପ୍ରଶ୍ନ ମଧ୍ୟ କରିଛନ୍ତି ।
ମେୟର ସିଧାସଳଖ ସରକାରଙ୍କୁ ଟାର୍ଗେଟ୍ କରି କହିଛନ୍ତି ଯେ ଏହି ଘଟଣାକୁ ଘୋଡ଼ାଇଦେବା ପାଇଁ ସମ୍ପୂର୍ଣ୍ଣ ଭାବେ ଚେଷ୍ଟା କରାଯାଉଅଛି । ଯାହା ଅତ୍ୟନ୍ତ ନିନ୍ଦନୀୟ ଅଟେ । ସେଫ୍ଟି , ସିକ୍ୟୁରିଟି ମଧ୍ୟ ସମ୍ପୂର୍ଣ୍ଣ ଭାବେ ଦୁର୍ବଳ ବୋଲି ଆଜି ଏଭଳି ଘଟଣା ଘଟିଛି । ମୁଖ୍ୟମନ୍ତ୍ରୀଙ୍କ ପାଖରେ ମେୟର ଦାବି କରିଛନ୍ତି ଯେ ତଦନ୍ତ କରାଯାଇ ଦୋଷୀକୁ କଠୋରରୁ କଠୋର କାର୍ୟ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ସେ କହିଛନ୍ତି । କେଉଁ କାରଣରୁ ଏବଂ କାହିଁକି ଏପରି ଘଟଣା ଘଟିଛି ଏହା ନେଇ ଯଦି ସଠିକ୍ ତଦନ୍ତ କରାଯାଏ ତେବେ ଲୋକମାନଙ୍କ ମନରେ ଗଭୀର ପ୍ରଭାବ ପକାଇବ । ଲୋକମାନଙ୍କ ବିଶ୍ବାସ ଜିତିପାରିବେ ନହେଲେ ପ୍ରଶାସନର ସମ୍ପୂର୍ଣ୍ଣ ବିଫଳତା ବୋଲି ସ୍ବୀକାର କରାଯିବ ।