ପ୍ରଦୂଷଣ ଯାଞ୍ଚ କେନ୍ଦ୍ରରେ ପୁଣି ଭିଡ଼ ଲାଗିଲାଣି

ଭୁବନେଶ୍ୱର : ରାଜ୍ୟରେ ପ୍ରଦୂଷଣ ନିୟନ୍ତ୍ରଣ ପ୍ରମାଣପତ୍ର (ପିୟୁସିସି) ଯାଞ୍ଚ ଆରମ୍ଭ ହୋଇଛି । ଟୋଲଗେଟ୍ ପାର୍ କଲେ, ମୋଟା ଅଙ୍କର ଇ-ଚାଲଣ କଟୁଛି । ହଜାରେ କି ଦୁଇ ହଜାର ନୁହେଁ, ଏକାବେଳକେ ୧୦ ହଜାର ଟଙ୍କା ଜରିମାନାର ମେସେଜ ଆସୁଛି । ଜରିମାନା ବକେୟା ଥିଲେ, ଯାଞ୍ଚ କେନ୍ଦ୍ରରେ ପିୟୁସିସି ସାର୍ଟିଫିକେଟ୍ ବି ମିଳୁନି ।ପ୍ରଦୂଷଣ ସାର୍ଟିଫିକେଟ୍ କଷଣରେ ଜର୍ଜରିତ ହେଲେଣି ରାଜ୍ୟବାସୀ । ପୁଣି ଭିଡ଼ ଲାଗିଲାଣି ପ୍ରଦୂଷଣ ଯାଞ୍ଚ କେନ୍ଦ୍ରରେ । ଗାଡ଼ି ଚାଳକଙ୍କୁ ଭୟ ଘାରିଲାଣି, ଆମ ମୁଣ୍ଡରେ ୧୦ ହଜାର ଟଙ୍କାର ଚଡ଼କ ପଡ଼ିବନି ତ? ଆଗକୁ ସ୍ଥିତି ଆହୁରି ସଙ୍ଗୀନ ହୋଇପାରେ । ତଥାପି ପିୟୁସିସି ଜରିମାନାର ମାତ୍ରା କମାଇବାକୁ ମନ ବଳାଉ ନାହାନ୍ତି ସରକାର । ୨ ମାସ ଧରି ପ୍ରସ୍ତାବକୁ ନେଇ କେବଳ ତର୍ଜମା ଚାଲିଛି । ପ୍ରସ୍ତାବରେ ଏଯାଏଁ ମୋହର ବାଜି ପାରିନି ।
ରାଜ୍ୟରେ ଦ୍ରୁତଗତି ଗାଡି଼ଚାଳନାକୁ ନେଇ ସଦ୍ୟ ପ୍ରକାଶିତ ବିଧାନସଭା ଷ୍ଟାଣ୍ଡିଂ କମିଟିରେ ଉଦ୍ବେଗ ପ୍ରକାଶ ପାଇଥିଲା । ରିପୋର୍ଟରେ ଉଲ୍ଲେଖ କରାଯାଇଥିଲା ଯେ ଦ୍ରୁତଗତି ଯୋଗୁଁ ରାଜ୍ୟରେ ସଡ଼କ ଦୁର୍ଘଟଣା ବଢ଼ୁଛି । ଦୁର୍ଘଟଣାଜନିତ ମୃତ୍ୟୁର ଗ୍ରାଫ୍ ବି ଉପରମୁହାଁ ହେଉଛି । ଏହାକୁ ରୋକିବାକୁ ହେଲେ, କାର୍ଯ୍ୟାନୁଷ୍ଠାନ ସହ ଜରିମାନାକୁ ଅଧିକ ଗୁରୁତ୍ୱ ଦେବାକୁ ହେବ । ଏଥିପାଇଁ ପରିବହନ ବିଭାଗକୁ ମଧ୍ୟ ସୁପାରିସ କରାଯାଇଥିଲା ।କିନ୍ତୁ ଏଭଳି ଗୁରୁତର ନିୟମ ଉଲ୍ଲଂଘନକୁ ପରିବହନ ବିଭାଗ ଆଦୌ ଗୁରୁତ୍ୱ ଦେଉନାହିଁ । ଦ୍ରୁତଗତି ବାବଦକୁ ଜରିମାନାର ମାତ୍ରା ଢ଼େର୍ କମ ଅଛି । ମୋଟର ଯାନ ଆଇନ ମୁତାବକ, ଦ୍ରୁତଗତି ପାଇଁ ୨୦୦୦ ଟଙ୍କା ଇ-ଚାଲାଣ କଟାଯାଉଛି । ଓଲଟି ପ୍ରଦୂଷଣ ପ୍ରମାଣପତ୍ର ଓ ପରମିଟ୍ ବାବଦରେ ଟିକେ ଉଲମ ବିଲମ ହେଲେ, ମୋଟା ଅଙ୍କର ତଣ୍ଡ ଗଣୁଛନ୍ତି ଗାଡି଼ଚାଳକ । ୫ ଗୁଣା ଅଧିକ ଜରିମାନା ଭରିବା ବାଧ୍ୟତାମୂଳକ ।ଖୋଦ୍ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ପ୍ରଦୂଷଣ ବାବଦକୁ ଜରିମାନା କମାଇବାକୁ ଆଗ୍ରହ ଦେଖାଇଥିଲେ । ମନ୍ତ୍ରୀ ଜାନୁଆରୀ ମାସରେ ଗଣମାଧ୍ୟମକୁ କହିଥିଲେ ଯେ ଅନ୍ୟ ରାଜ୍ୟଗୁଡ଼ିକରେ କମ୍ ମାତ୍ରାରେ ଜରିମାନା ଆଦାୟ କରାଯାଉଛି । ପୂର୍ବ ସରକାରଙ୍କ ଅମଳରେ ପ୍ରଦୂଷଣ ନିୟମ ଉଲଂଘନ ବାବଦକୁ ଜରିମାନା ମାତ୍ରା ବଢ଼ା ଯାଇଥିଲା । କିନ୍ତୁ ଆମ ସରକାରରେ ଜରିମାନାକୁ ଢ଼େର୍ କମାଇଦେବୁ ବୋଲି ସେ ଦମ୍ଭୋକ୍ତି ଦେଖାଇଥିଲେ ।ମନ୍ତ୍ରୀଙ୍କ ଏହି ପ୍ରତିଶ୍ରୁତିକୁ ୨ ମାସ ବିତିଲାଣି । ତଥାପି ପ୍ରଦୂଷଣ ବାବଦକୁ ଜରିମାନା କମାଇବା ନେଇ ନାଁ ଗନ୍ଧ ଉଠୁନି । ଏନେଇ ପଚାରିଲେ, କେହି ସଠିକ୍ ଉତ୍ତର ଦେଉନାହାନ୍ତି। ବିଭାଗୀୟ କର୍ତ୍ତୃପକ୍ଷଙ୍କଠାରୁ ଗୋଟିଏ ଉତ୍ତର ମିଳୁଛି, ତର୍ଜମା ଚାଲିଛି । ମାସ ମାସ ଧରି କେଉଁ ପ୍ରକାରର ତର୍ଜମା କରାଯାଉଛି ଯେ କୌଣସି ସିଦ୍ଧାନ୍ତରେ ପହଞ୍ଚିପାରୁନି ପରିବହନ ବିଭାଗ ବୋଲି ପ୍ରଶ୍ନ ଉଠିଛି ।