ପ୍ରେମ କୁମାର ଝା ନୂଆ ବନ୍ୟପ୍ରାଣୀ ପିସିସିଏଫ୍‌

ଭୁବନେଶ୍ୱର : ବରିଷ୍ଠ ଆଇଏଫ୍‌ଏସ୍‌ ଅଫିସର ପ୍ରେମ କୁମାର ଝାଙ୍କୁ ନୂଆ ବନ୍ୟପ୍ରାଣୀ ପିସିସିଏଫ୍‌ ତଥା ରାଜ୍ୟ ବନ ବାହିନୀ ମୁଖ୍ୟ ଭାବେ ନିଯୁକ୍ତି ଦେଇଛନ୍ତି ରାଜ୍ୟ ସରକାର। ରାଜ୍ୟ ପରିବେଶ ନିର୍ଦ୍ଦେଶକ ତଥା ସ୍ୱତନ୍ତ୍ର ସଚିବ ଭାବେ କାର୍ୟ୍ୟ କରୁଥିବା ଶ୍ରୀ ଝାଙ୍କୁ ଅତିରିକ୍ତ ଭାବେ ଏହି ଦାୟିତ୍ୱ ଦିଆଯାଇଛି। ବନ୍ୟପ୍ରାଣୀ ପିସିସିଏଫ୍‌ ପଦରୁ ସୁଶାନ୍ତ ନନ୍ଦଙ୍କ ଅବସର ପରେ ଶ୍ରୀ ଝା ଏହି ଦାୟିତ୍ୱ ନିର୍ବାହ କରିବେ।ଏହା ବ୍ୟତୀତ ଡଃ କେ ମୁରୁଗେସନଙ୍କୁ ପ୍ରମୁଖ ମୁଖ୍ୟ ବନ ସଂରକ୍ଷକ (ନୋଡାଲ) ଭାବେ ଅତିରିକ୍ତ ଦାୟିତ୍ୱ ଦିଆଯାଇଛି। ଓଡ଼ିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ଓଏସପିସିବି)ର ସଦସ୍ୟ ସଚିବ ଥିବା ଡଃ ମୁରୁଗେସନଙ୍କୁ ଏହି ଦାୟିତ୍ୱ ପ୍ରଦାନ କରାଯାଇଛି।
ପରିବେଶବିତ୍ ଡ. ମୁରୁଗେସନ ଓଏସ୍ପିସିବି ଦାୟିତ୍ବ ସଫଳତାର ସହ ନିର୍ବାହ କରି ଆସୁଛନ୍ତି ଏବଂ ତାଙ୍କୁ ପିସିସିଏଫ୍ (ନୋଡାଲ) ଦାୟିତ୍ବ ଦିଆଯାଇଛି, ଯାହା ଏକ ଗୁରୁତ୍ୱପୂର୍ଣ୍ଣ ଦାୟିତ୍ବ। ପିସିସିଏଫ୍ (ନୋଡାଲ) ଏହି ପ୍ରକଳ୍ପଗୁଡ଼ିକୁ ମଞ୍ଜୁରୀ ଦେବା ଦାୟିତ୍ବରେ ଥିବା ବେଳେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଓଡ଼ିଶା ସରକାର ରେଳବାଇ, ଦୂରସଂଚାର, ସଡ଼କ ଓ ରାଜପଥର ଭିତ୍ତିଭୂମି ପ୍ରକଳ୍ପଗୁଡ଼ିକୁ ଶୀଘ୍ର ମଞ୍ଜୁରୀ ଦେବା ଉପରେ ଗୁରୁତ୍ୱାରୋପ କରୁଥିବାରୁ ଏହି ପଦବୀ ଗୁରୁତ୍ବବହନ କରୁଛି।