Garvita Odia
ଭୁବନେଶ୍ବର: ତୁମେ ଗଣମାଧ୍ୟମରେ ଭଲ ବିବୃତ୍ତି ଦେଉଛ। ଦଳରେ ତୁମର ଭବିଷ୍ୟତ ଉଜ୍ଜ୍ବଳ ରହିଛି। ଦଳୀୟ ଲାଇନ୍ରେ ଭୋଟ୍ ଦିଅ। ନିର୍ବାଚନ ସରିଲେ ତୁମକୁ ପୁରସ୍କୃତ କରାଯିବ। ବସ୍ତା ବିଧାୟିକା ସୁବାସିନୀ ଜେନାଙ୍କୁ ବିଜେଡି ସଭାପତି ନବୀନ ପଟ୍ଟନାୟକ ନବୀନ ନିବାସ ଡାକି ଏମିତି ବୁଝାଇଥିବା ଜଣାପଡ଼ିଛି। ବାଲେଶ୍ବରର ପୂର୍ବତନ ସାଂସଦ ରବୀନ୍ଦ୍ର ଜେନା ବିଜେପିରେ ମିଶିବା ପରେ ତାଙ୍କ ପତ୍ନୀ ତଥା ବସ୍ତା ବିଧାୟିକା ଶ୍ରୀମତୀ ଜେନା ରାଜ୍ୟସଭା ନିର୍ବାଚନରେ କାହାକୁ ଭୋଟ ଦେବେ, ସେନେଇ ଆଶଙ୍କା ସୃଷ୍ଟି ହୋଇଛି। ନବୀନଙ୍କ ନିର୍ଦେଶକୁ ମାନିବୁ ବୋଲି ସୁବାସିନୀ କହୁଥିଲେ ବି ଭୋଟ ସମ୍ପର୍କରେ ସ୍ପଷ୍ଟ ମତ ରଖୁନାହାନ୍ତି। ଏହାକୁ ନେଇ ଦ୍ବନ୍ଦ୍ବ ବଢ଼ୁଥିବାବେଳେ ଗୁରୁବାର ସନ୍ଧ୍ୟାରେ ସୁବାସିନୀଙ୍କୁ ନବୀନ ନିବାସ ଡାକି ନବୀନ ବୁଝାଇଥିଲେ।
ବିଧାନସଭାରୁ ବିଧାୟିକା ପ୍ରମିଳା ମଲ୍ଲିକଙ୍କ ସହ ସୁବାସିନୀ ନବୀନ ନିବାସ ଯାଇଥିଲେ। ନବୀନଙ୍କ ସହ କିଛି ସମୟ ସୁବାସିନୀଙ୍କ ଆଲୋଚନା ହୋଇଥିଲା। ନବୀନ ନିବାସରୁ ବାହାରିବା ପରେ ସୁବାସିନୀ କହିଲେ, ନିର୍ବାଚନମଣ୍ଡଳୀ ସମ୍ପର୍କରେ କଥା ହେବାକୁ ନବୀନ ନିବାସ ଆସିଥିଲି। ରାଜ୍ୟସଭା ନିର୍ବାଚନ ସମ୍ପର୍କରେ ପୂର୍ବରୁ ଆଲୋଚନା ହୋଇଛି। ଦଳର ସର୍ବୋଚ୍ଚ ନେତା ନବୀନ ବାବୁ ଯାହା ନିର୍ଦେଶ ଦେବେ, ତାକୁ ମାନିବୁ। ଅନ୍ୟପକ୍ଷରେ ପୂର୍ବତନ ସାଂସଦ ଶ୍ରୀ ଜେନା କହିଛନ୍ତି, ସୁବାସିନୀ ବିଜେଡି ଟିକଟରେ ୫ ବର୍ଷ ଯାଏଁ ନିର୍ବାଚିତ ହୋଇଛନ୍ତି। କାହାକୁ ଭୋଟ୍ ଦେବେ ସେ ନିଷ୍ପତ୍ତି ନେବେ। ବ୍ୟକ୍ତିଗତ କାରଣ ପାଇଁ ମୁଁ ବିଜେଡି ଛାଡ଼ିଛି। ୧୬ରୁ ରାଜନୈତିକ ସମୀକରଣ ବଦଳିବ।
