ଉପରାଷ୍ଟ୍ରପତି ନିର୍ବାଚନ: ଆଜି ବିଜେଡି ପିଏସି ବୈଠକ

ଭୁବନେଶ୍ୱର: ଉପରାଷ୍ଟ୍ରପତି ନିର୍ବାଚନକୁ ଆଉ ମାତ୍ର ୩ଦିନ ବାକିଥିବାବେଳେ ବିଜେଡି ଆଜି ଦଳର ସମନ୍ୱୟ କମିଟି ଓ ରାଜନୀତିକ ବ୍ୟାପାର କମିଟି(ପିଏସି)ର ବୈଠକ ଡାକିଛି । ଉପରାଷ୍ଟ୍ରପତି ନିର୍ବାଚନରେ ଦଳର ଆଭିମୁଖ୍ୟ ଓ ନିଷ୍ପତ୍ତିକୁ ଏହି ବୈଠକରେ ଆନୁଷ୍ଠାନିକ ମୋହର ବାଜିବାର ସମ୍ଭାବନା ରହିଛି ।
ବିଜେଡି ସୂତ୍ର ଅନୁସାରେ, ଉପରାଷ୍ଟ୍ରପତି ନିର୍ବାଚନ ପ୍ରସଙ୍ଗରେ ଆଲୋଚନା ନିମନ୍ତେ ଆଜି ଅପରାହ୍ନ ସାଢ଼େ ୪ଟାରେ ଦଳର ସମନ୍ୱୟ କମିଟି ବୈଠକ ଓ ସାଢ଼େ ୫ଟାରେ ନବୀନ ନିବାସରେ ରାଜନୀତିକ ବ୍ୟାପାର କମିଟି(ପିଏସି) ବୈଠକ ଅନୁଷ୍ଠିତ ହେବ । ତେବେ ପିଏସି ବୈଠକ ନବୀନ ନିବାସରେ ଅନୁଷ୍ଠିତ ହେଉଥିଲେ ମଧ୍ୟ ପାଣ୍ଡିଆନ ଉପସ୍ଥିତ ରହିବେ ନାହିଁ । ପିଏସି ବୈଠକରେ ପ୍ରମିଳା ମଲ୍ଲିକ, ସଞ୍ଜୟ ଦାସବର୍ମା, ସୁଦାମ ମାର୍ଣ୍ଡି, ନିରଞ୍ଜନ ପୂଜାରୀ, ବିକ୍ରମ କେଶରୀ ଆରୁଖ, ପ୍ରଣବପ୍ରକାଶ ଦାସ, ଟୁକୁନି ସାହୁ, ସସ୍ମିତ ପାତ୍ର ଓ ସନ୍ତୃପ୍ତ ମିଶ୍ର ଯୋଗଦେବାର କାର୍ୟ୍ୟକ୍ରମ ରହିଛି ।

ଏହା ପୂର୍ବରୁ ଅପରାହ୍ନ ସାଢ଼େ ୪ଟାରେ ଦଳର ସମନ୍ୱୟ କମିଟି ବୈଠକ ବସିବ, ଯେଉଁଥିରେ ଦେବୀପ୍ରସାଦ ମିଶ୍ରଙ୍କ ଅଧ୍ୟକ୍ଷତାରେ ଉପରାଷ୍ଟ୍ରପତି ନିର୍ବାଚନ ସଂପର୍କରେ ଆଲୋଚନା ହେବ ବୋଲି ଜଣାପଡ଼ିଛି ।