ଏଥର ଦୁର୍ଗା ପୂଜାରେ ବାଜିବନି ଡିଜେ, ଫୁଟିବନି ଆତସବାଜି

ଭୁବନେଶ୍ଵର: ଆଉ କେଇଟା ଦିନ ପରେ ଶାରଦୀୟ ଦୁର୍ଗା ପୂଜା। ରାଜଧାନୀର ବିଭିନ୍ନ ଦୁର୍ଗା ପୂଜା କମିଟି ପକ୍ଷରୁ ଚାଲିଛି ଜୋରଦାର ପ୍ରସ୍ତୁତ। ତେବେ ଏଥର ଦୁର୍ଗା ପୂଜାରେ ବାଜିବନି ଡିଜେ, ଫୁଟିବନି ଆତସବାଜି । ଲୋକଙ୍କ ଉପରକୁ ପଡିବନି ଲେଜର ଲାଇଟ। ଭୁବନେଶ୍ବର କମିଶନରଙ୍କ ଅଧକ୍ଷତାରେ ଭୁବନେଶ୍ବର ୟୁପିଡିରେ ହେବାକୁ ଥିବା ୧୯୦ ମଣ୍ଡପର କର୍ମକର୍ତ୍ତାଙ୍କୁ ନେଇ ଆୟୋଜିତ ଏକ ବୈଠକରେ ଏହି ନିଷ୍ପତ୍ତି ନିଆଯାଇଛି। ଏଥି ସହିତ ଭସାଣ ବେଳେ ଦେଖାଯାଉଥିବା ବିଭିନ୍ନ ଅସୁବିଧା ସମ୍ପର୍କରେ ଦୁର୍ଗାପୁଜା କମିଟିର କର୍ମକର୍ତ୍ତା ମାନେ ପୋଲିସ କମିଶନ ଙ୍କ ବୃଷ୍ଟି ଆକର୍ଷଣ କରିଛନ୍ତି ।ଏହା ସହିତ ଭୁବନେଶ୍ବର ୟୁପିଡିରେ ଫୁଟିବନି ବାଣ । କେବଳ ରାବଣ ପୋଡିରେ ନିର୍ଦ୍ଧିଷ୍ଟ ଡେସିବେଲର ଆତସବାଜିକୁ ଅନୁମତି ଦିଆଯିବ। ମେଢ ଗୁଡିକରେ ଲାଗିବନି ଲେଜର ଲାଇଟ । ଅନେକ ସମୟରେ ଲୋକଙ୍କ ଆଖିରେ ପଡୁଥିବା ଲେଜର ଲାଇଟ ଯୋଗୁ ଆଖି ହରାଇଛନ୍ତି ସାଧାରଣ ଲୋକେ । ସେହିପରି ଝାରପଡା ମଣ୍ଡପରେ ଏଥର ପୁଜା ପାଇବେନି ମାଆ ଦୁର୍ଗା । ଦୁଇ ଗୋଷ୍ଠୀ କନ୍ଦଳ ଯୋଗୁ ଦୁଇ ପକ୍ଷକୁ ଅନ୍ୟତ୍ର ଭିନ୍ନ ଭିନ୍ନ ସ୍ଥାନରେ ପୁଜା କରିବା ପାଇଁ ଅନୁମତି ଦିଆଯାଇଛି ।କମିଟି ସଦସ୍ୟଙ୍କ ଅଭିଯୋଗ ବର୍ଷା ଯୋଗୁ ପ୍ରାୟ ମଣ୍ଡପ ସାମ୍ନା ରାସ୍ତାର ଅବସ୍ଥା ଶୋଚନୀୟ ହୋଇ ରହିଛି। ମଣ୍ଡପ ନିକଟରେ ଥିବା ବଡ ବଡ ଗଛ କଟାଯାଉ । ତୋରଣ ପାଇଁ ମଣ୍ଡପ ନିକଟରେ ଯାଇଥିବା ବିଦ୍ୟୁତ ତାର କାଢିବାର ବ୍ୟବସ୍ଥା କରାଯାଉ । ପ୍ରତି ମଣ୍ଡପରେ ଗତବର୍ଷ ଭଳି ସିସିଟିଭି ଲାଗିବା ବାଧ୍ୟତାମୂଳକ କରାଯାଇଛି । ଏହା ସହିତ ମଣ୍ଡପରେ ଶାନ୍ତିଶୃଙ୍ଖଳା ରକ୍ଷା ପାଇଁ ଭଲେଣ୍ଟିୟରଙ୍କୁ ନିୟୋଜିତ କରାଯିବ । ଟ୍ରାଫିକ ନିୟନ୍ତ୍ରଣ ପାଇଁ ବ୍ୟାପକ ବନ୍ଦୋବସ୍ତ କରାଯାଇଥିବା କହିଛନ୍ତି ଟ୍ରାଫିକ ଡିସିପି ।

ଏହି ବୈଠକରେ ଏକାମ୍ର ବିଧାୟକ ବାବୁ ସିଂ ଯୋଗଦେଇ ଆଇନ ଶୃଙ୍ଖଳା ନିୟନ୍ତ୍ରଣ ଦିଗରେ ପୋଲିସ ପୁଜା ସମୟରେ ଅଧିକ ଧ୍ୟାନ ଦେବାକୁ ପରାମର୍ଶ ଦେଇଥିଲେ । ଆଜିର ପ୍ରଥମ ଦୁର୍ଗାପୁଜା ପ୍ରସ୍ତୁତି ବୈଠକରେ ଭୁବନେଶ୍ବର ଡିସିପି , ବିଭିନ୍ନ ବିଭାଗର ଅଧିକାରୀ ଓ ପୂଜା କମିଟିର ସଦସ୍ୟମାନେ ଯୋଗ ଦେଇଥିଲେ ।