କାର୍ ପାର୍ଟସ୍ କାରଖାନାରେ ଅଗ୍ନିକାଣ୍ଡ: ୧୦ ମୃତ, ୫୯ ଆହତ

ସୋଲ୍: ଦକ୍ଷିଣ କୋରିଆର ମଧ୍ୟଭାଗରେ ଅବସ୍ଥିତ ଡେଜେଓନ୍ ସହରର ଏକ କାର୍ ପାର୍ଟସ୍ କାରଖାନାରେ ଶନିବାର ଅପରାହ୍ନରେ ଘଟିଥିବା ଏକ ଭୟଙ୍କର ଅଗ୍ନିକାଣ୍ଡରେ ୧୦ ଜଣ ଶ୍ରମିକଙ୍କ ମୃତ୍ୟୁ ଘଟିଥିବା ବେଳେ ୫୯ ଜଣ ଆହତ ହୋଇଛନ୍ତି। ଗୃହ ମନ୍ତ୍ରଣାଳୟର ସୂଚନା ଅନୁଯାୟୀ, ଆହତଙ୍କ ମଧ୍ୟରୁ ୨୫ ଜଣଙ୍କ ଅବସ୍ଥା ଗୁରୁତର ରହିଛି ଏବଂ ଅଗ୍ନିଶମ ବାହିନୀ ଏବେ ମଧ୍ୟ ଭଗ୍ନାବଶେଷ ମଧ୍ୟରେ ନିଖୋଜ ଥିବା ଅନ୍ୟ ୪ ଜଣଙ୍କୁ ଉଦ୍ଧାର କରିବା ପାଇଁ ଉଦ୍ଧାର କାର୍ୟ୍ୟ ଜାରି ରଖିଛନ୍ତି। ଅଗ୍ନିକାଣ୍ଡ ସମୟରେ ପ୍ଲାଣ୍ଟରେ ମୋଟ ୧୭୦ ଜଣ କର୍ମଚାରୀ କାମ କରୁଥିଲେ, ଯେଉଁମାନଙ୍କ ମଧ୍ୟରୁ କିଛି ମୃତଦେହ କୋଠାର ଦ୍ୱିତୀୟ ଓ ତୃତୀୟ ମହଲାରୁ ଉଦ୍ଧାର କରାଯାଇଛି।
ଅଗ୍ନିଶମ କର୍ମଚାରୀମାନେ ଉଦ୍ଧାର କାର୍ୟ୍ୟସମୟରେ ଅନେକ ସମସ୍ୟାର ସମ୍ମୁଖୀନ ହୋଇଥିଲେ। କାରଖାନା କୋଠାଟି ଭୁଶୁଡ଼ି ପଡ଼ିବାର ଆଶଙ୍କା ଥିବାରୁ ଉଦ୍ଧାରକାରୀ ଦଳ ସଙ୍ଗେ ସଙ୍ଗେ ଭିତରକୁ ପ୍ରବେଶ କରିପାରି ନଥିଲେ। ଏଥିସହିତ କାରଖାନା ପରିସରରେ ପ୍ରାୟ ୨୦୦ କିଲୋଗ୍ରାମ ସୋଡିୟମ୍ ଗଚ୍ଛିତ ଥିବାରୁ ଏକ ବଡ଼ ଧରଣର ବିସ୍ଫୋରଣ ଘଟିବାର ଭୟ ସୃଷ୍ଟି ହୋଇଥିଲା, ଯାହା ଅଗ୍ନିଶମ କାର୍ୟ୍ୟକୁ ଅଧିକ ବିପଜ୍ଜନକ କରିଦେଇଥିଲା। ଏହି ଦୁଃଖଦ ଘଟଣାର ଗମ୍ଭୀରତାକୁ ଦୃଷ୍ଟିରେ ରଖି ରାଷ୍ଟ୍ରପତି ଲି ଜାଏ-ମ୍ୟୁଙ୍ଗ୍ ତୁରନ୍ତ ଉଦ୍ଧାର କାର୍ୟ୍ୟ ପାଇଁ ସମସ୍ତ ଆଧୁନିକ ଉପକରଣ ଓ ଅତିରିକ୍ତ କର୍ମଚାରୀ ନିୟୋଜିତ କରିବାକୁ ନିର୍ଦ୍ଦେଶ ଦେଇଛନ୍ତି। ଅଗ୍ନିକାଣ୍ଡର ପ୍ରକୃତ କାରଣ ଏପର୍ୟ୍ୟନ୍ତ ସ୍ପଷ୍ଟ ହୋଇ ନଥିବା ବେଳେ ପ୍ରଶାସନ ପକ୍ଷରୁ ଏକ ଉଚ୍ଚସ୍ତରୀୟ ତଦନ୍ତ ଆରମ୍ଭ କରାଯାଇଛି। ସ୍ଥାନୀୟ ପ୍ରଶାସନ ବର୍ତ୍ତମାନ ଆହତଙ୍କ ଚିକିତ୍ସା ଓ ନିଖୋଜ ଶ୍ରମିକଙ୍କ ସନ୍ଧାନକୁ ପ୍ରାଥମିକତା ଦେଉଛି।