ଗିରିଜା କୁମାର ବଳୀୟାରସିଂଙ୍କୁ କେନ୍ଦ୍ର ସାହିତ୍ୟ ଅକାଦେମୀ

ଭୁବନେଶ୍ବର: ୨୦୨୫ ବର୍ଷ ପାଇଁ କେନ୍ଦ୍ର ସାହିତ୍ୟ ଅକାଦେମୀ ପୁରସ୍କାର ଘୋଷଣା କରାଯାଇଛି। ଓଡ଼ିଆ, ହିନ୍ଦୀ, ବଙ୍ଗଳା, ତେଲୁଗୁ, ତାମିଲ, ମେଥିଲି, କନ୍ନଡ, ଉର୍ଦୁ, କାଶ୍ମୀରୀ, ଇଂରାଜୀ ଆଦି ୨୪ଟି ଭାଷାରେ ଏହି ପୁରସ୍କାର ପ୍ରଦାନ କରାଯିବ। କବିତା ସଙ୍କଳନ ‘ପାଦପୂରଣ’ ପାଇଁ ଓଡ଼ିଶାରୁ ଗିରିଜା କୁମାର ବଳୀୟାରସିଂ ପୁରସ୍କାର ପାଇବା ନିମନ୍ତେ ମନୋନୀତ ହୋଇଛନ୍ତି। ଅନ୍ୟାନ୍ୟ ରାଜ୍ୟରୁ ମଧ୍ୟ କ୍ଷୁଦ୍ର ଗଳ୍ପ, ଉପନ୍ୟାସ, କବିତା ଆଦି ପାଇଁ ପ୍ରତିଭା ମନୋନୀତ ହୋଇଛନ୍ତି।

ଏନେଇ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ମନ୍ତ୍ରୀ ସୂର୍ୟ୍ୟବଂଶୀ ସୂରଜ ଶ୍ରୀ ବଳୀୟାରସିଂଙ୍କୁ ଅଭିନନ୍ଦନ ଓ ଶୁଭେଚ୍ଛା ଜଣାଇଛନ୍ତି। ଦେଶରେ ୨୪ଟି ଭାଷାରେ ଦିଆଯିବ କେନ୍ଦ୍ର ସାହିତ୍ୟ ଅକାଦେମୀ ପୁରସ୍କାର। ଏନେଇ ଆଜି ବିଧିବଦ୍ଧ ଭାବେ ବିଜେତାଙ୍କ ନାମ ଘୋଷଣା କରାଯାଇଛି। ୨୦୨୫ ଜାନୁଆରୀରୁ ପୁରସ୍କାର ନେଇ ପ୍ରକ୍ରିୟା ଆରମ୍ଭ ହୋଇଥିବାବେଳେ ସମସ୍ତ ପ୍ରକ୍ରିୟା ଶେଷ ହୋଇ ପୁରସ୍କାର ନିମନ୍ତେ ନାମ ଘୋଷଣା କରାଯାଇଛି। ତେବେ ଓଡ଼ିଶାରୁ ପୁରସ୍କାର ପାଇବା ନିମନ୍ତେ ମନୋନୀତ ହୋଇଥିବା କବି ଶ୍ରୀ ବଳୀୟାରସିଂଙ୍କୁ ପୁରସ୍କାର ବାବଦରେ ଏକ ଲକ୍ଷ ଟଙ୍କାର ଅର୍ଥରାଶି ସହିତ ମାନପତ୍ର ଏବଂ ଫଳକ ପ୍ରଦାନ କରାଯିବ। ଆସନ୍ତା ୩୧ରେ ନୂଆଦିଲ୍ଲୀଠାରେ ସ୍ବତନ୍ତ୍ର ପୁରସ୍କାର ପ୍ରଦାନ ଉତ୍ସବରେ ମନୋନୀତ ପ୍ରତିଭାଙ୍କୁ ପୁରସ୍କୃତ କରାଯିବ।

ସୂଚନା ଅନୁସାରେ, ଖୋରଧା ବାଜପୁରଠାରେ ଶ୍ରୀ ବଳୀୟାରସିଂ ୧୯୫୪ରେ ଜନ୍ମଗ୍ରହଣ କରିଥିଲେ। ଏବେ ସେ କଟକର କଲ୍ୟାଣୀନଗରରେ ରହୁଥିବାବେଳେ ସାହିତ୍ୟ ସମ୍ପାଦନାରେ ତାଙ୍କର ରହିଛି ଅଗାଧ ଦକ୍ଷତା। ଅନେକ ପୁସ୍ତକ ରଚନା କରି ପ୍ରଭାବଶାଳୀ କବି ଭାବେ ସେ ସୀକୃତି ପାଇଛନ୍ତି। ନିଜ ଦକ୍ଷତା ନିମନ୍ତେ ‌େ‌ସ ୨୦୦୬ରେ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର, ୨୦୦୮ରେ ଝଙ୍କାର କବିତା ସମ୍ମାନ ଆଦି ଅନେକ ପୁରସ୍କାର ଲାଭ କରିଛନ୍ତି।