ଚାଷୀଙ୍କୁ ଦଳିଦେଲା ଦନ୍ତା

ହିନ୍ଦୋଳ: ଢେଙ୍କାନାଳ ଜିଲ୍ଲା ହିନ୍ଦୋଳ ବନାଞ୍ଚଳରେ ହାତୀ ଆକ୍ରମଣରେ ମୃତ୍ୟୁ ନିତିଦିନିଆ ଘଟଣାରେ ପରିଣତ ହେଲାଣି। ଗତ ଗୁରୁବାର ଏହି ବନାଞ୍ଚଳରେ ୩ ଜଣଙ୍କୁ ଏକ ସଙ୍ଗରେ ହାତୀ ଦଳି ମାରିଦେଇଥିବା ବେଳେ ଶନିବାର ପୁଣି ଜଣେ ଚାଷୀ ହାତୀ ଆକ୍ରମଣରେ ପ୍ରାଣ ହରାଇଛନ୍ତି। ମୃତକ ହେଲେ ସୁଧାକର ସାମଲ (୫୬ବର୍ଷ)। ତାଙ୍କ ଘର ହିନ୍ଦୋଳ ବ୍ଲକ ମହାଲୁଣ୍ଡା ପଞ୍ଚାୟତ ଟାଙ୍ଗିଶାଳ ଗ୍ରାମରେ। ହାତୀ ଆକ୍ରମଣରେ ତାଙ୍କ ମୃତ୍ୟୁ ହୋଇଛି । ଶରୀରର ମୁଣ୍ଡରୁ ଗଣ୍ଡି ଅଲଗା ହୋଇଯାଇଛି। ବିଲମାଳରୁ ଶନିବାର ସକାଳୁ ତାଙ୍କ ମୃତଦେହ ଉଦ୍ଧାର ହୋଇଛି।

ସୂଚନା ମୁତାବକ, ସୁଧାକର ଶୁକ୍ରବାର ବିଲକୁ ଯାଇଥିଲେ। ହେଲେ ସନ୍ଧ୍ୟାସୁଦ୍ଧା ଫେରିନଥିଲେ। ରାତିରେ ପରିବାର ଲୋକେ ଖୋଜାଖୋଜି କରି ପାଇ ନଥିଲେ। ହାତୀ ଭୟରେ ଗ୍ରାମବାସୀ ବିଲକୁ ଯାଇନଥିଲେ। ସକାଳୁ ବିଲ ମଧ୍ୟରୁ ସୁଧାକରଙ୍କ ମୃତଦେହ ଠାବ ହୋଇଛି । ବିଲ ଚାରିପାର୍ଶ୍ୱରେ ହାତୀ ପାଦ ଚିହ୍ନ ଥିବାରୁ ହାତୀ ଆକ୍ରମଣରେ ତାଙ୍କର ମୃତ୍ୟୁ ହୋଇଥିବା ଗ୍ରାମବାସୀ କହିଛନ୍ତି। ଏସମ୍ପର୍କରେ ଖବର ପାଇ କର୍ଣ୍ଣପୁର ବିଟ ହାଉସର ବନ କର୍ମଚାରୀ ଓ ପୁଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଚଳାଇଛନ୍ତି।