ବର୍ଷା ବିତ୍ପାତ: ପଞ୍ଜାବରେ ସମସ୍ତ ଶିକ୍ଷାନୁଷ୍ଠାନ ବନ୍ଦ

ଚଣ୍ଡିଗଡ : ପଞ୍ଜାବରେ ପ୍ରବଳରୁ ଅତି ପ୍ରବଳ ବର୍ଷାରେ ସ୍ଥିତି ବେହାଲ୍‌ ହୋଇପଡିଛି । ସାରା ରାଜ୍ୟରେ ଜଳବନ୍ଦୀ ସ୍ଥିତି ସହ ପରିସ୍ଥିତି ଅତ୍ୟନ୍ତ ଖରାପ ରହିଛି । ସେହିପରି ରାଜ୍ୟ ସରକାର ୨୩ ଜିଲାକୁ ବନ୍ୟା ପ୍ରଭାବିତ ଜିଲା ଭାବେ ଘୋଷଣା କରିଛି । ବନ୍ୟା କାରଣରୁ ଏଯାଏଁ ପ୍ରାୟ ୩୦ ଜଣଙ୍କ ମୃତ୍ୟୁ ଘଟିଥିବା ଖବର ସାମ୍ନାକୁ ଆସିଛି । ଅନେକ ନଦୀ ସତର୍କ ସୂଚନା ପାର୍‌ କରି ସାରିଛି । ଏହାକୁ ଦୃଷ୍ଟିରେ ରଖି ଅନେକ ଜିଲାକୁ ସତର୍କ ସୂଚନା ଜାରି ହୋଇଛି । ପରିସ୍ଥିତିକୁ ଦୃଷ୍ଟିରେ ରଖି ପଞ୍ଜାବରେ ସେପ୍ଟେମ୍ବର ୭ ପର୍ୟ୍ୟନ୍ତ ସମସ୍ତ ସ୍କୁଲ୍‌, କଲେଜ, ବିଶ୍ୱବିଦ୍ୟାଳୟ ଆଦିକୁ ବନ୍ଦ ରଖିବାକୁ ଘୋଷଣା କରାଯାଇଛି ।
ପଞ୍ଜାବରୁ ବନ୍ୟା ସହ ଜଡିତ ଅନେକ ଭିଡିଓ ମଧ୍ୟ ସାମ୍ନାକୁ ଆସିଛି । ପ୍ରବଳ ବର୍ଷା ରାଜ୍ୟର ଅନେକ ଜିଲ୍ଲାର ଅବସ୍ଥାକୁ ଆହୁରି ଖରାପ କରିଦେଇଛି। ପଞ୍ଜାବର ଫିରୋଜପୁରରେ, ଭାରତୀୟ ସେନା ଏବଂ ସ୍ଥାନୀୟ ଲୋକମାନେ ହବିବ୍ ଡ୍ୟାମ୍ ବନ୍ଧ ତଟ ଅଞ୍ଚଳରେ ମରାମତି ପାଇଁ ଏକାଠି କାମ କରୁଛନ୍ତି। ରାଜ୍ୟରେ ପ୍ରବଳ ବର୍ଷା ପରେ ଡ୍ୟାମ୍ ର ଜଳସ୍ତର ବୃଦ୍ଧି ପାଇଛି।ଅମୃତସରର ଅଜନଲାର ଗଗ୍ଗୁ ମହଲ ଗାଁରେ ରାସ୍ତାଗୁଡ଼ିକ ପାଣିରେ ବୁଡ଼ି ରହିଥିବାରୁ ଲୋକମାନେ ଯାତାୟତରେ ଅନେକ ସମସ୍ୟାର ସମ୍ମୁଖୀନ ହୋଇଛନ୍ତି ।ପଞ୍ଜାବରେ ବନ୍ୟା ପରିସ୍ଥିତି ଗୁରୁଦାସପୁର, ପଠାନକୋଟ, ଫାଜିଲ୍କା, କାପୁରଥାଲା, ତାରନ ତରନ, ଫେରୋଜପୁର, ହୋଶିଆରପୁର, ଅମୃତସର, ଜଲନ୍ଦର, ରୂପନଗର, ଫେରୋଜପୁର ଏବଂ ମାନସା ସମେତ ଅତି କମରେ ୧୨ଟି ଜିଲ୍ଲାର ୧୩୦୦ ରୁ ଅଧିକ ଗାଁ ଜଳମଗ୍ନ କରି ରଖିଛି ।