ବିଜୟରୁ ଅଭିଯାନ ଆରମ୍ଭ କରିଛି ମୁମ୍ବାଇ ଇଣ୍ଡିଆନ୍ସ

ମୁମ୍ବାଇ : ବିଜୟରୁ ଅଭିଯାନ ଆରମ୍ଭ କରିଛି ମୁମ୍ବାଇ ଇଣ୍ଡିଆନ୍ସ । କଲକତାକୁ ୬ ଓ୍ବିକେଟ୍ ହରାଇ ପ୍ରଥମ ବିଜୟ ବିଜୟ ହାସଲ କରିଛି ପାଣ୍ଡ୍ୟା ବାହିନୀ । ୨୨୧ ରନର ବିଜୟ ଲକ୍ଷ୍ୟକୁ ୫ ବଲ ବାକିଥାଇ ଜିତି ନେଇ ମୁମ୍ବାଇ । ନମନ ଧିର ଏକ ସୁନ୍ଦର ଚୌକା ମାରି ଦଳକୁ ବିଜୟ ଭେଟି ଦେଇଛନ୍ତି । ସେପଟେ ଆଜି କଲକତା ବୋଲରମାନେ ମହଙ୍ଗା ସାବ୍ୟସ୍ତ ହୋଇଥିଲେ । ନାରାୟଣ, କାର୍ତ୍ତିକ ତ୍ୟାଗୀ ଏବଂ ବୈଭବ ଅରୋରା ଗୋଟିଏ ଲେଖାଏଁ ଓ୍ବିକେଟ୍ ନେବାରେ ସକ୍ଷମ ହୋଇଥିଲେ ।୨୨୧ ରନର ବିଶାଳ ଲକ୍ଷ୍ୟ ରହିଥିଲେ ସୁଦ୍ଧା ଦୁଇ ଓପନର ରୋହିତ ଶର୍ମା ଏବଂ ରିକଲଟନ୍ ପ୍ରଥମରୁ କଲକତା ବୋଲରଙ୍କୁ ଧୂଲେଇ କରିବା ଆରମ୍ଭ କରିଥିଲେ । ରୋହିତ ଶର୍ମା ୩୮ ବଲରୁ ୭୮ ରନ୍ କରିଥିବାବେଳେ ଇମ୍ପାକ୍ଟ ପ୍ଲେୟାର ଭାବେ ଖେଳି ସୂର୍ୟ୍ୟକୁମାର ଯାଦବ ୮ ବଲରୁ ୧୬ ରନ୍ କରିବାରେ ସକ୍ଷମ ହୋଇଥିଲେ । ଚୌକା ସହାୟତାରେ ଖାତା ଖୋଲି ଫ୍ୟାନ୍ସଙ୍କୁ ଖୁସି କରିଥିଲେ ସ୍କାଏ । ମାତ୍ର ବଡ଼ ସ୍କୋରରେ ଏହାକୁ ପରିବର୍ତ୍ତନ କରିପାରିନଥିଲେ । ଦଳକୁ ବିଜୟ ଅଭିମୁଖେ ନେଉଥିବାବେଳେ ଭୁଲ୍ ନିଷ୍ପତ୍ତି ପାଇଁ ରିକଲଟନ୍ ରନ୍ ଆଉଟ୍ ହୋଇ ପାଭିଲିୟନ୍ ଫେରିଥିଲେ । ସେ ୪୩ ବଲରୁ ୮୧ ରନ୍ କରିବାରେ ସକ୍ଷମ ହୋଇଥିଲେ । ତିଲକ ବର୍ମା ୧୪ ବଲରୁ ୨୦ ରନ୍ କରି ନାରାୟଣଙ୍କ ବଲରେ ଆଉଟ୍ ହୋଇ ପାଭିଲିୟନ ଫେରିଥିଲେ ।

ଆଜିର ମ୍ୟାଚରେ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା ମୁମ୍ବାଇ ଇଣ୍ଡିଆନ୍ସ । କଲକତାକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲା ମୁମ୍ବାଇ । କଲକତାର ଦୁଇ ଓପନର ରାହାଣେ ଏବଂ ଫିନ୍ ଆଲେନ୍ ଦମଦାର ପାଳି ଆରମ୍ଭ କରିଥିଲେ । ଉଭୟ ମୁମ୍ବାଇ ବୋଲରଙ୍କୁ ପ୍ରଥମରୁ ଆକ୍ରମଣାତ୍ମକ ଢ଼ଙ୍ଗରେ ଖେଳିଥିଲେ । ରାହାଣେ ୪୦ ବଲରୁ ୬୭ ରନର ପାଳି ଖେଳିଥିବାବେଳେ ଫିନ୍ ୧୭ ବଲରୁ ୩୭ ରନର ପାଳି ଖେଳିଥିଲେ ।
ପରେ ଗ୍ରୀନ୍ ମଧ୍ୟଆକ୍ରମଣାତ୍ମକ ଢ଼ଙ୍ଗରେ ବ୍ୟାଟିଂ କରି ୧୦ ବଲରୁ ୧୮ ରନ୍ କରିଥିଲେ । ମାତ୍ରପରେ ରଘୁବଂଶୀ ରାହାଣେଙ୍କ ସାଥ୍ ଦେଇଥିଲେ । ସେ ୨୯ ବଲରୁ ୫୧ ରନ କରିଥିଲେ । ଫଳରେ କଲକତା ୪ ଓ୍ବିକେଟ୍ ବିନିମୟରେ ୨୨୦ ରନ୍ କରିବାରେ ସକ୍ଷମ ହୋଇଥିଲା ।ସେପଟେ ମୁମ୍ବାଇ ପକ୍ଷରୁ ସାର୍ଦ୍ଧୁଲ୍ ଠାକୁର ୩ ଓ୍ବିକେଟ୍ ଅକ୍ତିଆର କରିଥିଲେ । ଏହାସହ ମୁମ୍ବାଇ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଗୋଟିଏ ଓ୍ବିକେଟ୍ନେଇଥିଲେ ।

ମୁମ୍ବାଇର ଷ୍ଟାର ବୋଲର ଜଶପ୍ରିତ୍ ବୁମାର ଆଜିର ମ୍ୟାଚରେ ଓ୍ବିକେଟ୍ ଲେସ୍ ହୋଇଛନ୍ତି । ଏହାସହ ମହଙ୍ଗା ସାବ୍ୟସ୍ତ ହୋଇଛନ୍ତି । ୪ ଓଭରରେ ୩୫ ରନ୍ ବ୍ୟୟ କରିଛନ୍ତି ।କଲକତା ପକ୍ଷରୁ ରିଙ୍କୁ ସିଂହ କମାଲ ବ୍ୟାଟିଂ କରିବା ସହ ୨୧ ବଲରୁ ୩୩ ରନ୍ କରି ଅପରାଜିତ ରହିଥିଲେ । ଶେଷ ଓଭର ଗୁଡ଼ିକରେ ମୁମ୍ବାଇ ବୋଲରଙ୍କୁ ଧୂଲେଇ କରିଥିଲେ ।