ମନ୍‌ କି ବାତ୍ ; ଦୁଇ ଓଡ଼ିଆଙ୍କୁ ପ୍ରଶଂସା କଲେ ମୋଦୀ

ଭୁବନେଶ୍ୱର: ମନ୍‌ କି ବାତ୍‌ରେ ଓଡ଼ିଆଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରଶଂସା । କେନ୍ଦ୍ରାପଡ଼ାର ଯୁବକ ଓମ୍‌ ପ୍ରକାଶ ରଥ ଓ ସମ୍ବଲପୁରର ମହିଳା ସୁଜାତା ଭୂୟାଁଙ୍କ ପ୍ରଶଂସା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । କେନ୍ଦ୍ରାପଡ଼ାର ଯୁବକ ଓମ୍‌ ପ୍ରକାଶ ମହିଳା ସଶକ୍ତିକରଣ କ୍ଷେତ୍ରରେ ନିଜର ଗୁରୁତ୍ବପୂର୍ଣ୍ଣ ମତାମତ ଦେଇଥିବାରୁ ତାଙ୍କର ବିଚାରଧାରାକୁ ସ୍ବାଗତ କରିଛନ୍ତି ମୋଦୀ । ସେହିପରି ମାଛଚାଷ କ୍ଷେତ୍ରରେ ସମ୍ବଲପୁରର ସୁଜାତା ଭୂୟାଁଙ୍କ ସଫଳତା କଥା ଉଠାଇଛନ୍ତି ପ୍ରଧାନମନ୍ତ୍ରୀ ।
ସୁଜାତା ଜଣେ ଗୃହିଣୀ ଥିଲେ । ମାତ୍ର ସେ ତାଙ୍କ ପରିବାର ଲାଗି କିଛି କରିବାକୁ ଚାହୁଥିଲେ । ପ୍ରଥମେ ସେ ହୀରାକୁଦ ଜଳଭଣ୍ଡାରରେ ମାଛ ଚାଷ ଆରମ୍ଭ କରିଥିଲେ । ଘରର ଦାୟିତ୍ବ ସହ ଅନେକ ପ୍ରତିକୂଳ ପରିସ୍ଥିତିର ସାମ୍ନା କରିବାକୁ ପଡ଼ିଥିଲା ତାଙ୍କୁ । ମାତ୍ର ସେସବୁ ଆଗରେ ସେ ହାର୍ ମାନିନଥିଲେ । ଆଉ ଆଜି ତାଙ୍କର ସଫଳତା ଅନ୍ୟ ମହିଳାଙ୍କୁ ଆଶାର ନୂଆ କିରଣ ଦେଖାଇଛି ।

ଏହି କାର୍ୟ୍ୟକ୍ରମରେ ପ୍ରଧାନମନ୍ତ୍ରୀ ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋକପାତ କରିବା ସହ ଜନସାଧାରଣଙ୍କୁ ସତର୍କ ଓ ସଚେତନ ରହିବାକୁ ପରାମର୍ଶ ଦେଇଛନ୍ତି। ପ୍ରଧାନମନ୍ତ୍ରୀ କହିଛନ୍ତି ଯେ, ବର୍ତ୍ତମାନର ସମୟରେ ବିଭିନ୍ନ ପ୍ରକାରର ଗୁଜବ ଏବଂ ଭୁଲ୍ ଧାରଣା ପ୍ରସାରିତ ହେଉଛି। ତେଣୁ ନାଗରିକମାନେ କୌଣସି ପ୍ରକାରର ପ୍ରଲୋଭନ ବା ଭ୍ରମିତ ଖବରରେ ନ ପଡ଼ି ସଚେତନ ରହିବା ଉଚିତ। ବିଶ୍ୱସ୍ତରରେ ଚାଲିଥିବା ଅଶାନ୍ତି, ବିଶେଷ କରି ଆମେରିକା ଏବଂ ଇରାନ ମଧ୍ୟରେ ଉପୁଜିଥିବା ପରିସ୍ଥିତିକୁ ନେଇ ଚର୍ଚ୍ଚା ହେଉଥିବା ବେଳେ ପ୍ରଧାନମନ୍ତ୍ରୀ ଶାନ୍ତି ଏବଂ ସଂଯମତା ଉପରେ ଗୁରୁତ୍ୱ ଦେଇଛନ୍ତି। ଦେଶର ବିକାଶ ପାଇଁ ସ୍ଥାନୀୟ ସ୍ତରରେ କରାଯାଉଥିବା ପ୍ରୟାସକୁ ମୋଦୀ ପ୍ରଶଂସା କରିଛନ୍ତି। ସେ କହିଛନ୍ତି ଯେ, ସାମୂହିକ ପ୍ରୟାସ ଦ୍ୱାରା ହିଁ ଭାରତ ଏକ ସଶକ୍ତ ରାଷ୍ଟ୍ର ଭାବେ ଉଭା ହୋଇପାରିବ। ପ୍ରତିଥର ପରି ଏଥର ମଧ୍ୟ ପ୍ରଧାନମନ୍ତ୍ରୀ ଯୁବପିଢ଼ିଙ୍କ ନୂତନ ଚିନ୍ତାଧାରା ଏବଂ ଉଦ୍ଭାବନକୁ ପ୍ରଶଂସା କରିଛନ୍ତି। ଆଗାମୀ ପିଢ଼ି ଦେଶର ଭବିଷ୍ୟତ ବୋଲି ସେ ଦୋହରାଇଛନ୍ତି ।