କେନ୍ଦ୍ରୀୟ ନିଯୁକ୍ତି ପାଇଁ ମନୋନୀତ ଦୁଇ ଓଡ଼ିଶା କ୍ୟାଡର ଆଇପିଏସ

ନୂଆଦିଲ୍ଲୀ: ଓଡ଼ିଶା କ୍ୟାଡରର ଦୁଇ ବରିଷ୍ଠ ଆଇପିଏସ ଅଧିକାରୀ କେନ୍ଦ୍ରୀୟ ପ୍ରତିନିଯୁକ୍ତି ପାଇଁ ମନୋନୀତ ହୋଇଛନ୍ତି। କେନ୍ଦ୍ର କ୍ୟାବିନେଟର ନିଯୁକ୍ତି କମିଟି ବିଭିନ୍ନ ରାଜ୍ୟ କ୍ୟାଡରରୁ ମୋଟ ୩୫ ଜଣ ଭାରତୀୟ ପୋଲିସ ସେବା (ଆଇପିଏସ) ଅଧିକାରୀଙ୍କୁ କେନ୍ଦ୍ରୀୟ ପଦବୀ ପାଇଁ ମନୋନୀତ କରିଛି, ଯେଉଁଥିରେ ଓଡ଼ିଶାର ଦୁଇ ଅଧିକାରୀ ମଧ୍ୟ ସାମିଲ ଅଛନ୍ତି।ଓଡ଼ିଶା କ୍ୟାଡରର ବରିଷ୍ଠ ଆଇପିଏସ ଅଧିକାରୀ ଆର.ପି. କୋଚେ (୧୯୯୩ ବ୍ୟାଚ) ଏବଂ ଯଶୱନ୍ତ କୁମାର ଜେଠୱା (୧୯୯୪ ବ୍ୟାଚ) କେନ୍ଦ୍ରରେ ପଦବୀ ଗ୍ରହଣ ପାଇଁ ମନୋନୀତ ହୋଇଛନ୍ତି। ଉଭୟ କୋଚେ ଓ ଜେଠୱା କେନ୍ଦ୍ରରେ ମହାନିର୍ଦେଶକ (ଡିଜି) କିମ୍ବା ତତସମାନ ପଦବୀ ପାଇଁ ମନୋନୀତ ହୋଇଛନ୍ତି।ବର୍ତ୍ତମାନ ଆର.ପି. କୋଚେ ଓଡ଼ିଶାରେ ଗୋଇନ୍ଦା ନିର୍ଦେଶକ ଭାବେ ଏବଂ ଯଶୱନ୍ତ ଜେଠୱା ଭିଜିଲାନ୍ସ ନିର୍ଦେଶକ ଭାବେ କାର୍ୟ୍ୟ କରୁଛନ୍ତି। ଏହି ମନୋନୟନ ଓଡ଼ିଶା କ୍ୟାଡର ଅଧିକାରୀଙ୍କ ଅଭିଜ୍ଞତା ଏବଂ ନେତୃତ୍ୱ ଦକ୍ଷତାକୁ ଜାତୀୟ ସ୍ତରରେ କେନ୍ଦ୍ର ସରକାରଙ୍କ ଦ୍ୱାରା ସ୍ୱୀକୃତି ମିଳିଥିବାର ପ୍ରମାଣ ଦେଉଛି।ସୂଚନା ଅନୁଯାୟୀ, ଏହି ମନୋନୟନ ଓଡ଼ିଶାରୁ କେନ୍ଦ୍ରୀୟ ପ୍ରଶାସନରେ ଅଧିକାରୀଙ୍କ ସଂଖ୍ୟା ବୃଦ୍ଧି କରିବ ଏବଂ ରାଜ୍ୟର ପ୍ରତିନିଧିତ୍ୱକୁ ଆହୁରି ସୁଦୃଢ଼ କରିବ। ଏହା ପୂର୍ବରୁ ମଧ୍ୟ ଓଡ଼ିଶା କ୍ୟାଡରର ଅନେକ ଆଇପିଏସ ଅଧିକାରୀ କେନ୍ଦ୍ରରେ ଗୁରୁତ୍ୱପୂର୍ଣ୍ଣ ପଦବୀରେ କାର୍ୟ୍ୟ କରି ରାଜ୍ୟର ଗୌରବ ବୃଦ୍ଧି କରିଛନ୍ତି।