ମାଟି ଖୋଳି ମୃତଦେହ ଉଦ୍ଧାର, ୮ ଅଟକ

ମୋହନା: ପୁଣି ଗୁଣି ସନ୍ଦେହରେ ଜଣେ ଯୁବକଙ୍କୁ ହତ୍ୟାକରି ଜଙ୍ଗଲରେ ପୋତି ଦେଇଥିବା ଅଭିଯୋଗ ହୋଇଛି । ଘଟଣା ଘଟିଛି ଗଜପତି ଜିଲ୍ଲା ମୋହନା ଥାନା କୁସୁମପୁର ଗାଁରେ । ମୃତକ ଜିରାଙ୍ଗ ପଞ୍ଚାୟତ କମଳାପୁର ଗାଁର କରୁଣାକର ଦଳାଇ(୩୦) । ଏ ସମ୍ପର୍କରେ ପରିବାର ଲୋକ ମୋହନା ଥାନାରେ ଅଭିଯୋଗ କରିଛନ୍ତି । କୁସୁମପୁର ଗାଁରେ ପହଞ୍ଚି ତନାଘନା କରୁଛି ପୁଲିସ । ୮ ଜଣଙ୍କୁ ପୁଲିସ ଅଟକ ରଖି ପଚରାଉଚରା କରୁଛି । ଗାଁଠାରୁ ଦେଢ଼ କିମି ଦୂର ଜଙ୍ଗଲରେ ମୃତଦେହ ପୋତି ଦିଆଯାଇଥିବା ପୁଲିସ ଜାଣିବାକୁ ପାଇଥିଲା । ଆଜି ମାଜିଷ୍ଟ୍ରେଟ୍‌ ଏବଂ ସାଇଣ୍ଟିଫିକ୍ ଟିମ୍ ଉପସ୍ଥିତିରେ ମାଟି ଖୋଳାଯାଇଥିଲା। ଗ୍ରାମବାସୀ ଏବଂ ପୁଲିସ ମାଟି ଖୋଳି ଗତ ଭିତରୁ କରୁଣା କରଙ୍କ ମୃତଦେହ ଉଦ୍ଧାର କରାଯାଇଛି। ପରେ ମୃତଦେହ ବ୍ୟବଚ୍ଛେଦ କରାଯିବ ବୋଲି ଥାନା ଅଧିକାରୀ ବସନ୍ତି ସେଠୀ କହିଛନ୍ତି ।
ଅଭିଯୋଗ ଅନୁଯାୟୀ, ଜିରାଙ୍ଗ ପଞ୍ଚାୟତ କମଳପୁର ଗାଁର କରୁଣାକର ପ୍ରାୟ ୮ ମାସ ହେବ କୁସୁମପୁର ଗାଁରେ ରହୁଥିଲେ । ଗାଁଠାରୁ କିଛି ଦୂରରେ କୁଡ଼ିଆ କରି ରହିବା ସହ ଚାଷକାମ କରି ପରିବାର ପ୍ରତିପୋଷଣ କରୁଥିଲେ । ଏଥିସହ ଲୋକଙ୍କୁ ଚେରମୂଳି ଔଷଧ ଦେଉଥିଲେ । କିଛି ଦିନ ତଳେ କୁସୁମପୁର ଗାଁର ଜନୈକ ବ୍ୟକ୍ତିଙ୍କ ୧୨ ବର୍ଷର ପୁଅର ମୃତ୍ୟୁ ହୋଇଥିଲା । ବାଳକଟିକୁ କରୁଣାକର ହିଁ ଗୁଣି କରି ମାରିଦେଇଥିବା ଗାଁ ଲୋକ ସନ୍ଦେହ କରୁଥିଲେ । ଏନେଇ ଗତ ମାସ ୨୮ ତାରିଖରେ ଗ୍ରାମର ଦୁଇଜଣ କରୁଣାକରଙ୍କ ପାଖକୁ ଯାଇ “ଆମ ପିଲାର ଦେହ ଭଲ ନାହିଁ ଚେରମୂଳି ଔଷଧ ଦେବୁ ଆସେ” ବୋଲି କହି ଡାକି ନେଇଥିଲେ । ଅଙ୍ଗନବାଡ଼ି କେନ୍ଦ୍ରରେ ତିନି ଦିନ ରଖି ହାତ ଗୋଡ଼ ବାନ୍ଧି ନିସ୍ତୁକ ମାଡ଼ ମାରିଥିଲେ । ପ୍ରବଳ ମାଡ଼ ମାରି ହତ୍ୟା କରିବା ପରେ ଗାଁ ନିକଟସ୍ଥ ଜଙ୍ଗଲରେ ପୋତି ଦେଇଥିବା କରୁଣାକରଙ୍କ ଭାଉଜ ସବିତା ଦଳାଇ ମୋହନା ଥାନାରେ ଅଭିଯୋଗ କରିଛନ୍ତି ।

ଏହି ହତ୍ୟାରେ କୁସୁମପୁର ଗାଁର କିଛି ଲୋକଙ୍କ ସମ୍ପୃକ୍ତି ଥିବାବେଳେ ସେମାନଙ୍କ ନାମ ଏତଲାରେ ଦର୍ଶାଇଛନ୍ତି । ମୋହନା ପୁଲିସ କୁସୁମପୁର ଗାଁରେ ପହଞ୍ଚି ତଦନ୍ତ ଆରମ୍ଭ କରଥିଲା । ହତ୍ୟା ପରେ ଗାଁ ଠାରୁ ପ୍ରାୟ ଦେଢ଼ କିଲୋମିଟର ଜଙ୍ଗଲରେ ପୋତି ଦେଇଥିବା ପୁଲିସ ଜାଣିବାକୁ ପାଇଛି । ଗତକାଲି ରାତି ହୋଇଯାଇଥିବାରୁ ଖୋଳି ବାହାର କରିବା ସମ୍ଭବ ହୋଇ ନାହିଁ । ଆଜି ସକାଳେ ମାଜିଷ୍ଟ୍ରେଟ୍‌ ଏବଂ ସାଇଣ୍ଟିଫିକ୍ ଟିମ୍ ଉପସ୍ଥିତିରେ ମାଟି ଖୋଳାଯାଇଥିଲା। ଗ୍ରାମବାସୀ ଏବଂ ପୁଲିସ ମାଟି ଖୋଳି ଗତ ଭିତରୁ କରୁଣାକରଙ୍କ ମୃତଦେହ ଉଦ୍ଧାର କରାଯାଇଛି। ପରେ ମୃତଦେହ ବ୍ୟବଚ୍ଛେଦ କରାଯିବ ବୋଲି ଥାନା ଅଧିକାରୀ ବସନ୍ତି ସେଠୀ କହିଛନ୍ତି ।

ଗତ ଶନିବାର ଗୁଣି ସନ୍ଦେହରେ ମୋହନା ଥାନା ରାଚାଗୁଡ଼ା ଗାଁର ଗୋପାଳ ମଳିକଙ୍କୁ ହତ୍ୟା କରି ଅଡ଼ବା ହରଭଙ୍ଗୀ ଡ୍ୟାମ୍‌ରେ ଫିଙ୍ଗି ଦେଇଥିଲେ । ଏହି ଘଟଣାରେ ପୁଲିସ ୧୪ ଅଭିଯୁକ୍ତଙ୍କୁ ଗିରଫ କରିଥିଲା । ଘଟଣାର ୪ ଦିନ ପରେ ପୁଣି ଗୁଣି ସନ୍ଦେହରେ ଆଉ ଏକ ହତ୍ୟାକାଣ୍ଡ ଘଟଣାକୁ ନେଇ ଚର୍ଚ୍ଚା ହେବାରେ ଲାଗିଛି ।