ମଇଁଷି ମୃତ୍ୟୁ ଘଟଣାରେ କ୍ଷତିପୂରଣ ଦେବାକୁ ଘୋଷଣା କଲେ ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀ

ଆଳି, 19।08: କେନ୍ଦ୍ରାପଡା ଆଳି ଏକମାଣିଆ ମଇଁଷି ମୃତ୍ୟୁ ଘଟଣାରେ କ୍ଷତିପୂରଣ ଦେବାକୁ ଘୋଷଣା ହୋଇଛି। ଏ ନେଇ ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀ ମନୋଜ ପଟ୍ଟନାୟକ ସୂଚନା ଦେଇଛନ୍ତି। ମିଳିଥିବା ସୂଚନା ଅନୁଯାୟୀ କେନ୍ଦ୍ରାପଡ଼ା ଜିଲା ଆଳି ବ୍ଲକ ଅନ୍ତର୍ଗତ ଏକମାଣିଆ ଗାଁରେ କୁମ୍ଭୀର ଆକ୍ରମଣରେ ଘାଇଲା ହେବା ପରେ ପରସ୍ପର ଛନ୍ଦି ହୋଇ ମଇଁଷିମାନଙ୍କ ମୃତ୍ୟୁ ଘଟିଥିବା କୁହାଯାଉଥିବାବେଳେ ଘଟଣାକୁ ନେଇ ସନ୍ଦେହ ପ୍ରକାଶ ପାଇଛି। ଏକମାଣିଆ ଗ୍ରାମର ମଇଁଷିପାଳକ ଜଗନ୍ନାଥ ଦାସ, ଗଣେଶ ଦାସ ଓ ପରମାନନ୍ଦ ବିଶ୍ୱାଳଙ୍କ କହିବାନୁଯାୟୀ, ରବିବାର ସେମାନେ ୭୨ ମଇଁଷିଙ୍କୁ ଚରାଇବା ପାଇଁ ବ୍ରାହ୍ମଣୀ ଓ ଖରସ୍ରୋତା ନଦୀର ଯୋରମୁହଁ ଦେଇ ନଦୀ ପଠାକୁ ନେଉଥିଲେ। ଏହି ସମୟରେ ହଠାତ ଏକ କୁମ୍ଭୀର ଗୋଟିଏ ମଇଁଷିକୁ ଆକ୍ରମଣ କରିଥିଲା। ଏହାଦ୍ୱାରା ମଇଁଷିମାନେ ଜୀବନ ବିକଳରେ ଧାଁଦଉଡ଼ କରିଥିଲେ। ଫଳରେ ନଦୀର ପ୍ରବଳ ସୁଅ ଓ କାଦୁଅରେ ଫଶି ପରସ୍ପର ଛନ୍ଦାଛନ୍ଦି ହୋଇ ପଡ଼ିଯିବାରୁ ଘଟଣାସ୍ଥଳରେ ୩୦ଟି ମଇଁଷିଙ୍କ ଜୀବନ ଚାଲିଯାଇଛି। ନଦୀ ସ୍ରୋତରେ ମଧ୍ୟ କେତେକ ମଇଁଷି ଭାସି ଯାଇଛନ୍ତି। ମଇଁଷି ଚରାଳିଙ୍କ ପାଟିଶୁଣି ଗ୍ରାମବାସୀ ପହଞ୍ଚିଥିଲେ ମଧ୍ୟ ମଇଁଷିମାନଙ୍କୁ ଉଦ୍ଧାର କରିବାରେ ସକ୍ଷମ ହୋଇନଥିଲେ। ସନ୍ଧ୍ୟା ସୁଦ୍ଧା ୩୦ଟି ମଇଁଷିଙ୍କ ମୃତଦେହ ଉଦ୍ଧାର କରାଯାଇଥିଲା ବେଳେ ଅନ୍ୟ ୪୨ ମଇଁଷିଙ୍କ ପତ୍ତା ମିଳିନଥିବାରୁ ପ୍ରାୟ ଅନ୍ୟମାନଙ୍କର ମଧ୍ୟ ମୃତ୍ୟୁ ଘଟିଥିବା ଆଶଙ୍କା କରାଯାଉଛି।