ରାଜ୍ୟର ମହିଳାମାନଙ୍କ ସୁରକ୍ଷା ପ୍ରଥମ କାମ ହେବ : ସ୍ନେହାଙ୍ଗିନୀ

ଭୁବନେଶ୍ୱର: ମହିଳାମାନଙ୍କ ସୁରକ୍ଷା ପାଇଁ ସଂକଳ୍ପ ନେଇଛି ବିଜୁ ମହିଳା ଜନତା ଦଳ । ରାଜ୍ୟର ମହିଳାମାନଙ୍କ ସୁରକ୍ଷା ପ୍ରଥମ କାମ ହେବ ବୋଲି କହିଛନ୍ତି ନୂଆ ସଭାନେତ୍ରୀ ସ୍ନେହାଙ୍ଗିନୀ ଛୁରିଆ । ସେ କହିଛନ୍ତି, ବିଜୁ ମହିଳା ଜନତା ଦଳ ଗଠିତ ହୋଇଛି। ଏଥିପାଇଁ ବିଜେଡି ସଭାପତି ନବୀନ ପଟ୍ଟନାୟକଙ୍କୁ ପ୍ରେସମିଟ କରି ଧନ୍ୟବାଦ ଦେଇଛନ୍ତି ମହିଳା ୱିଙ୍ଗର ସଭାନେତ୍ରୀ ସ୍ନେହାଙ୍ଗିନୀ ଛୁରିଆ । ବିଜୁ ମହିଳା ଜନତା ଦଳର ୧୫ଜଣିଆ କମିଟି ଗଠନ କରାଯାଇଛି । ମହିଳା ସଂଗଠନକୁ ସୁସଂଗଠିତ କରାଯାଇଛି । ଆଗାମୀ ଦିନରେ ମହିଳା ସଂଗଠନକୁ ଆହୁରି ମଜଭୁତ କରାଯିବ। ମିଶନ ଶକ୍ତିରେ ୭୦ଲକ୍ଷ ମହିଳାଙ୍କୁ ସାମିଲ କରି ନବୀନ ପଟ୍ଟନାୟକ ମହିଳାମାନଙ୍କୁ ସଶକ୍ତ କରିଥିଲେ। ଜଣେ ମିଶନ ଶକ୍ତି ମହିଳାଙ୍କୁ ସେ ସଂସଦକୁ ପଠାଇଥିଲେ। ହେଲେ ଆଜି ଓଡ଼ିଶାରେ ମହିଳା ମାନେ ଅସୁରକ୍ଷିତ ହୋଇପଡିଛନ୍ତି । ନ୍ୟାୟ ନପାଇ ମହିଳାମାନେ ଆତ୍ମାହୁତି କରିବାକୁ ପଛାଉ ନାହାନ୍ତି । ମହିଳାମାନେ ଆଜି ଭୟରେ ଅଛନ୍ତି । ବିଜେପି ସରକାରରେ ମହିଳାମାନେ ତଳକୁ ତଳକୁ ଯାଉଛନ୍ତି । ରାଜ୍ୟର ମହିଳା ମାନଙ୍କୁ ସୁରକ୍ଷା ଦେବା ପାଇଁ ସଂକଳ୍ପ ନେବ ବିଜୁ ମହିଳା ଜନତା ଦଳ। ମହିଳା ସମସ୍ୟା ପାଇଁ ଲଢ଼େଇ କରିବା ଲାଗି ବିଜେଡି ଆଗରେ ରହିବ ବୋଲି କହିଛନ୍ତି ନୂଆ ସଭାନେତ୍ରୀ ସ୍ନେହାଙ୍ଗିନୀ ଛୁରିଆ ।