Garvita Odia
ଭୁବନେଶ୍ୱର: ରାଜ୍ୟସଭା ନିର୍ବାଚନରେ ବିଜେଡିକୁ ଘାରିଛି ଘୋଡ଼ା ବେପାର ଚିନ୍ତା । ୨୦୦୨ ମସିହାର ଘଟଣା ପୁନରାବୃତ୍ତି ହେବା ଆଶଙ୍କା ସୃଷ୍ଟି ହୋଇଛି । ତେଣୁ ଘୋଡ଼ା ବେପାର କଥା ବିଜେଡି ସଭାପତିଙ୍କ ନିଦ ହଜେଇ ଦେଇଛି । ତେଣୁ ଦଳର ବିଧାୟକଙ୍କୁ ଏକଜୁଟ କରି ରଖିବା ପାଇଁ ବିଭିନ୍ନ ପଦକ୍ଷେପ ନେଉଛନ୍ତି ନବୀନ । ସେହିପରି ଘୋଡ଼ା ବେପାର କଥା ଉଠାଇ ଶାସକ ବିଜେପିକୁ କାଠଗଡାକୁ ଟାଣିବା ପାଇଁ ନବୀନ ଚେଷ୍ଟା କରିଛନ୍ତି । ନବୀନ କହିଛନ୍ତି, “ରାଜ୍ୟରେ ଅନେକ ପ୍ରସଙ୍ଗ ରହିଛି । ମଧ୍ୟପ୍ରାଚ୍ୟ ଦେଶରେ ଯୁଦ୍ଧ ପରିସ୍ଥିତିରେ ପ୍ରବାସୀ ଓଡ଼ିଆ ଫସି ରହିଛନ୍ତି । ଏଭଳି ଜଟିଳ ପରିସ୍ଥିତିରେ ବିଜେପି ସରକାର ଆସନ୍ତା ରାଜ୍ୟସଭା ନିର୍ବାଚନ ଲାଗି ଘୋଡା ବେପାରରେ ମାତିଛନ୍ତି । ନବୀନଙ୍କ ଏହି ଉକ୍ତି ରାଜ୍ୟ ରାଜନୈତିକ ପରିବେଶକୁ ଉଷ୍ମ କରି ଦେଇଛି ।
ବିଜେପି ବିଧାୟକ ଜୟନାରାୟଣ ମିଶ୍ର କହିଛନ୍ତି, ‘ଘୋଡ଼ା ବେପାର ନା ବିବେକାନୁମୋଦିତ ଭୋଟ, ଆମକୁ ଜିତେଇବା ପାଇଁ ନବୀନ ବାବୁ ସାହାଯ୍ୟ କରୁଛନ୍ତି । ସେଥିପାଇଁ ନବୀନ ବାବୁଙ୍କୁ ଧନ୍ୟବାଦ । ନବୀନ ବାବୁ ଅନେକ ବିଧାୟକଙ୍କୁ ସସପେଣ୍ଡ କରିଛନ୍ତି । ସେମାନଙ୍କ ଭୋଟ ଆମ ଆଡେ ଆସିବ । ଆମେ ଘୋଡ଼ା କେଉଁଠି ରଖୁନାହୁଁ । ବେପାର କେମିତି କରିବୁ । ଆମେ ବିବେକାନୁମୋଦିତ ଭୋଟ ଦେବାକୁ ଅନୁରୋଧ କରୁଛୁ । ବିଜେଡିର ଦୁଇ ଜଣ ଅଚଳ ପ୍ରାର୍ଥୀ ଦେଇଛି ।”
