Garvita Odiaନୂଆଦିଲ୍ଲୀ : ଦେଶରେ ପିତୃତ୍ୱ ଅବକାଶକୁ ନେଇ ସୁପ୍ରିମକୋର୍ଟ ମଙ୍ଗଳବାର ଗୁରୁତ୍ୱପୂର୍ଣ୍ଣ ଟିପ୍ପଣୀ କରିଛନ୍ତି । କେନ୍ଦ୍ର ସରକାରଙ୍କୁ କୋର୍ଟ କହିଛନ୍ତି ଯେ, ପିତୃତ୍ୱ ଅବକାଶକୁ ସାମାଜିକ ସୁରକ୍ଷା ଲାଭ ଭାବେ ମାନ୍ୟତା ଦେବା ପାଇଁ ଆଇନ ଆସିବା ଉଚିତ । ପିଲାଙ୍କ ପାଳନ-ପୋଷଣ କେବଳ ମା’ଙ୍କର ଦାୟିତ୍ୱ ନୁହେଁ । ପିଲାର ବିକାଶ ଲାଗି ମା’ କେନ୍ଦ୍ରୀୟ ଭୂମିକା ନିର୍ବାହ କରିଥାନ୍ତି । କିନ୍ତୁ ପିତାଙ୍କ ଭୂମିକାକୁ ଅଣଦେଖା କରାଯିବା ଅନୁଚିତ୍ । ପ୍ରାଥମିକ ସମୟରେ ଉଭୟଙ୍କ ଉପସ୍ଥିତି ପିଲାର ବିକାଶ ଲାଗି ଜରୁରି । ପିତୃତ୍ୱ ଅବକାଶ ଦ୍ୱାରା ପିତା ପିଲାର ଦେଖାଶୁଣାରେ ସକ୍ରିୟ ଭୂମିକା ନିର୍ବାହ କରିବା ସହ ପରିବାରର ଦାୟିତ୍ୱ ସେୟାର କରିପାରିବେ । ଏହାଦ୍ୱାରା ସମାଜରେ ପାରମ୍ପରିକ ଚିନ୍ତାଧାରା ମଧ୍ୟ ବଦଳିବ । ପରିବାର ଏବଂ କାର୍ୟ୍ୟସ୍ଥଳ ଉଭୟ ସ୍ଥାନରେ ଲିଙ୍ଗଗତ ସମାନତାକୁ ପ୍ରୋତ୍ସାହନ ମିଳିବ ।
ସୋସିଆଲ୍ ସିକ୍ୟୁରିଟି କୋଡ୍, ୨୦୨୦ ସହ ଜଡି଼ତ ମାମଲାର ଶୁଣାଣି ସମୟରେ ଜଷ୍ଟିସ୍ ଜେବି ପାରଦିୱାଲା ଏବଂ ଜଷ୍ଟିସ୍ ଆର ମହାଦେବନଙ୍କ ଖଣ୍ଡପୀଠ ଏହି ଟିପ୍ପଣୀ କରିଥିଲେ । ଏହି ସମୟରେ ଖଣ୍ଡପୀଠ ଆହୁରି କହିଥିଲେ ଯେ, ଯେକୌଣସି ବୟସର ଶିଶୁଙ୍କୁ ପୋଷ୍ୟ କଲେ ମହିଳାଙ୍କୁ ୧୨ ସପ୍ତାହର ମାତୃତ୍ୱ ଅବକାଶ ମିଳିବ । କେବଳ ୩ ମାସରୁ କମ୍ ବୟସର ଶିଶୁଙ୍କୁ ପୋଷ୍ୟ କଲେ ଛୁଟି ଦେବା ନିୟମ ଠିକ୍ ନୁହେଁ । ହମସାନନ୍ଦିନି ନନ୍ଦୁରୀ ନାମ୍ନୀ ଜଣେ ମହିଳା ଏଥିନେଇ ଜନସ୍ୱାର୍ଥ ଆବେଦନ ଦାଖଲ କରିଥିଲେ । ସେଥିରେ ସେ ଦର୍ଶାଇଥିଲେ ଯେ, ଶିଶୁଙ୍କ ବୟସ ଆଧାରରେ ମାତୃତ୍ୱ ଅବକାଶ ଦେବା ଭୁଲ୍ । ଏହା ସମ୍ବିଧାନର ଧାରା୧୪(ସମାନତା ଅଧିକାର)ର ଉଲ୍ଲଂଘନ ।
