Garvita Odia
ଭୁବନେଶ୍ୱର: ଆଜି ବି ରାଜ୍ୟର କେତେକ ସ୍ଥାନରେ ଦେଖିବାକୁ ମିଳିବ କାଳବୈଶାଖିର ପ୍ରଭାବ । ୨୦ଟି ଜିଲ୍ଲାକୁ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ୟେଲୋ ୱାର୍ଣ୍ଣିଂ ଜାରି । ଆସନ୍ତାକାଲି ଠାରୁ ବଢ଼ିବ ଦିନର ତାପମାତ୍ର, ୪୦ ଡିଗ୍ରି ଡେଇଁବ ପାରଦ । ୧୧ରେ ପାଗ ମୁଖ୍ୟତଃ ଶୁଖିଲା ରହିବା ସହ ତାତି ବଢ଼ିବ । ଅନୁମାନ କରାଯାଉଛି, ୩ ଦିନ ପରେ ତାପମାତ୍ରା ପ୍ରାୟ ୪ରୁ ୬ ଡିଗ୍ରୀ ବଢ଼ିଯିବ । ୧୦ ତାରିଖରେ ଉପକୂଳ ଓଡ଼ିଶାର ଭୁବନେଶ୍ଵରରେ ପାରଦ ୩୮ ଡିଗ୍ରୀ ଏବଂ ପଶ୍ଚିମ ଓଡ଼ିଶାରେ ୪୦ ଡିଗ୍ରୀ ଛୁଇଁପାରେ । ୧୧ ତାରିଖରେ ଝାରସୁଗୁଡ଼ା ୪୧ ଡିଗ୍ରୀ ଛୁଇଁଯିବ । ଅନ୍ୟପଟେ ୧୨ରୁ ଉପକୂଳ ଓଡ଼ିଶା ଗରମ, ଗୁଳୁଗୁଳିରେ ଛଟପଟ ହେବ । ସମସ୍ତ ଉପକୂଳ ଜିଲ୍ଲା ଓ ପାର୍ଶ୍ଵବର୍ତ୍ତୀ ଅଞ୍ଚଳରେ ଗରମ, ଗୁଳୁଗୁଳି ଅନୁଭୂତ ହେବ । ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, ଖୋର୍ଦ୍ଧା, ପୁରୀ, ନୟାଗଡ଼, ଗଞ୍ଜାମ, ଗଜପତି ପାଇଁ ୟେଲୋ ୱାର୍ଣ୍ଣିଂ ଜାରି କରିଛି ପାଣିପାଗ ବିଭାଗ ।
କାଳବୈଶାଖୀ ଉଜାଡ଼ିଦେଲା ଫସଲ, ଚାଷୀ ମନରେ ହତାଶ । ବାଲେଶ୍ବର ସୋର ବାଳଙ୍ଗ ଗ୍ରାମପଞ୍ଚୟାତର ଜୁଳଙ୍ଗିଆ ଗାଁରେ କାଳବୈଶାଖୀର ପ୍ରକୋପରେ ସୂର୍ୟ୍ୟମୁଖୀ ଫସଲ ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ଧାର କରଜ କରି ଚାଷୀମାନେ ପ୍ରଥମେ ଧାନ ଓ ପରେ ସୂର୍ୟ୍ୟମୁଖୀ ଚାଷ କରିଥିଲେ । ଦି ପଇସା ଲାଭ ପାଇବା ଆଶାରେ ଥିବା ଚାଷୀଙ୍କ ମୁହଁରୁ ହଠାତ୍ ପ୍ରକୃତି ଆହାର ଛଡ଼ାଇ ନେଇଛି । ଋଣ ବୋଝରେ ଦବି ରହିଥିବା ଏହି ଚାଷୀମାନେ ଆଶା କରିଥିଲେ ଯେ ସୂର୍ୟ୍ୟମୁଖୀ ଅମଳ କରି ସେମାନେ କିଛି ଆର୍ଥିକ ଉନ୍ନତି କରିବେ । କିନ୍ତୁ ପ୍ରକୃତିର କରାଳ ରୂପ ସବୁକିଛି ଛାରଖାର କରିଦେଇଛି । ପ୍ରଶାସନିକ ସ୍ତରରେ ସହାୟତା ଯୋଗାଇ ଦିଆଯାଉ ବୋଲି ଦାବି କରିଛନ୍ତି କ୍ଷତିଗ୍ରସ୍ତ ଚାଷୀ । ଆଜି ବି ରାଜ୍ୟର କେତେକ ସ୍ଥାନରେ ଦେଖିବାକୁ ମିଳିବ କାଳବୈଶାଖିର ପ୍ରଭାବ ।
