Garvita Odia
କେନ୍ଦ୍ର ରେଳ, ସୂଚନା ଓ ପ୍ରସାରଣ ତଥା ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରୀ ତଥା ରାଜ୍ୟସଭା ସାଂସଦ ଅଶ୍ୱିନୀ ବୈଷ୍ଣବ ଓଡ଼ିଶାରେ ସ୍ୱାସ୍ଥ୍ୟସେବା ଭିତ୍ତିଭୂମିର ଉନ୍ନତୀକରଣ ପାଇଁ ସାଂସଦ ଆଞ୍ଚଳିକ ବିକାଶ ପାଣ୍ଠି (MPLADS) ଅଧୀନରେ ୩.୧୦ କୋଟି ଟଙ୍କା ସୁପାରିଶ କରିଛନ୍ତି।ଏହି ସୁପାରିଶ ମଧ୍ୟରେ ନୀଳଗିରି ଉପଖଣ୍ଡ ଚିକିତ୍ସାଳୟ ପାଇଁ ୧.୪୦ କୋଟି ଟଙ୍କା ଏବଂ ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟ ପାଇଁ ୧.୭୦ କୋଟି ଟଙ୍କାର ଉନ୍ନୟନମୂଳକ କାର୍ଯ୍ୟ ସାମିଲ ରହିଛି।୨୦୧୧ ଜନଗଣନା ଅନୁଯାୟୀ ପ୍ରାୟ ୨୩,୨୦,୫୨୯ ଜନସଂଖ୍ୟା ବିଶିଷ୍ଟ ବାଲେଶ୍ୱର ଉତ୍ତର ଓଡ଼ିଶାର ଏକ ଉପକୂଳବର୍ତ୍ତୀ ଜିଲ୍ଲା। ବାଲେଶ୍ୱର ସହରର ଜନସଂଖ୍ୟା ପ୍ରାୟ ୧,୭୪,୦୦୦। ଜିଲ୍ଲା ମୁଖ୍ୟ ଚିକିତ୍ସାଳୟ ଏହି ସହରର ଅନ୍ୟତମ ପ୍ରମୁଖ ସରକାରୀ ହସ୍ପିଟାଲ୍, ଯାହା ସାଧାରଣ ଲୋକଙ୍କୁ ସ୍ୱାସ୍ଥ୍ୟସେବା ସହିତ ଜରୁରୀକାଳୀନ ଚିକିତ୍ସା ସେବା ଯୋଗାଇ ଆସୁଛି।
ନୀଳଗିରି ବାଲେଶ୍ୱର ଜିଲ୍ଲାର ଏକ ସହର ତଥା ଉପଖଣ୍ଡ। ୨୦୧୧ ଜନଗଣନା ଅନୁଯାୟୀ ନୀଳଗିରିର ଜନସଂଖ୍ୟା ପ୍ରାୟ ୧,୩୨,୧୬୮।ନୀଳଗିରି ଉପଖଣ୍ଡ ଚିକିତ୍ସାଳୟ ରେ ପ୍ରସ୍ତାବିତ କାର୍ଯ୍ୟଗୁଡ଼ିକ ମଧ୍ୟରେ ଅନ୍ତଃବିଭାଗ ରୋଗୀ ଚିକିତ୍ସା ବିଭାଗ ଉନ୍ନତୀକରଣ ପାଇଁ ୧୦ ଲକ୍ଷ ଟଙ୍କା, ଔଷଧ ଗୋଦାମ ପାଇଁ ୧୦ ଲକ୍ଷ ଟଙ୍କା, ରୋଗୀ ବିଶ୍ରାମ କକ୍ଷ ପାଇଁ ୫୦ ଲକ୍ଷ ଟଙ୍କା, କାଜୁଆଲ୍ଟି ପାଇଁ ୧୦ ଲକ୍ଷ ଟଙ୍କା, ରିଫ୍ରେଶମେଣ୍ଟ ହଲ୍ ପାଇଁ ୧୫ ଲକ୍ଷ ଟଙ୍କା, ସର୍ଜରୀ ୱାର୍ଡ ଓ ଅପରେସନ୍ ଥିଏଟର (OT) ପାଇଁ ୧୫ ଲକ୍ଷ ଟଙ୍କା, SDMO କାର୍ଯ୍ୟାଳୟ ପାଇଁ ୧୦ ଲକ୍ଷ ଟଙ୍କା ଏବଂ OPD ବ୍ଲକ୍ ପାଇଁ ୨୦ ଲକ୍ଷ ଟଙ୍କାର କାର୍ଯ୍ୟ ସାମିଲ ରହିଛି।
ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟରେ ୧.୭୦ କୋଟି ଟଙ୍କା ବ୍ୟୟରେ ପ୍ରସ୍ତାବିତ କାର୍ଯ୍ୟଗୁଡ଼ିକ ମଧ୍ୟରେ ମେଡିସିନ୍ ବ୍ଲକ୍ର ଉନ୍ନତୀକରଣ ପାଇଁ ୧୦ ଲକ୍ଷ ଟଙ୍କା, ଔଷଧ ଗୋଦାମ ପାଇଁ ୧୦ ଲକ୍ଷ ଟଙ୍କା, ମାତୃ-ଶିଶୁ କମ୍ପ୍ଲେକ୍ସ ପାଇଁ ୧୦ ଲକ୍ଷ ଟଙ୍କା, କାଜୁଆଲ୍ଟି ପାଇଁ ୧୦ ଲକ୍ଷ ଟଙ୍କା, ଆଣ୍ଟି-ରେଟ୍ରୋଭାଇରାଲ୍ ଥେରାପି (ART) କେନ୍ଦ୍ର ପାଇଁ ୧୫ ଲକ୍ଷ ଟଙ୍କା ଏବଂ ସର୍ଜରୀ ୱାର୍ଡ ଓ ଅପରେସନ୍ ଥିଏଟର (OT) ପାଇଁ ୧୫ ଲକ୍ଷ ଟଙ୍କାର କାର୍ଯ୍ୟ ସାମିଲ ରହିଛି। ଏହାସହିତ ୫୦ ଲକ୍ଷ ଟଙ୍କା ବ୍ୟୟରେ ରୋଗୀ ବିଶ୍ରାମ କକ୍ଷ ନିର୍ମାଣ ଏବଂ OPD ବ୍ଲକ୍ରେ ଥିବା ରିଫ୍ରେଶମେଣ୍ଟ ହଲ୍ର ଉନ୍ନତୀକରଣ ପାଇଁ ୫୦ ଲକ୍ଷ ଟଙ୍କାର କାର୍ଯ୍ୟ ମଧ୍ୟ ଏହି ପ୍ରସ୍ତାବରେ ସାମିଲ ରହିଛି।
ନୀଳଗିରି ଏବଂ ବାଲେଶ୍ୱରର ରୋଗୀ ଓ ସେମାନଙ୍କ ପରିବାର ପାଇଁ ଏହି ଭିତ୍ତିଭୂମିର ଉନ୍ନତୀକରଣ ଦୀର୍ଘଦିନର ଆବଶ୍ୟକତାକୁ ପୂରଣ କରିବ। ଏହା ହସ୍ପିଟାଲ୍ ଆସୁଥିବା ରୋଗୀଙ୍କ ଦୈନନ୍ଦିନ ମୌଳିକ ସୁବିଧାଗୁଡ଼ିକୁ ଅଧିକ ସୁବିଧାଜନକ ଓ କାର୍ଯ୍ୟକ୍ଷମ କରିବା ସହିତ ଉନ୍ନତ ଚିକିତ୍ସା ଫଳାଫଳର ଆଶା ସୃଷ୍ଟି କରିବ। ସୁବ୍ୟବସ୍ଥିତ କାଜୁଆଲ୍ଟି ୱାର୍ଡ, ପରିଷ୍କାର ରୋଗୀ ବିଶ୍ରାମ କକ୍ଷ ଏବଂ ପର୍ଯ୍ୟାପ୍ତ ଔଷଧ ମହଜୁଦ ଥିବା ଔଷଧ ଗୋଦାମ ଭଳି ମୌଳିକ ସୁବିଧାଗୁଡ଼ିକୁ ସୁଦୃଢ଼ କରିବା ଉପରେ ଏହି ସୁପାରିଶକୃତ କାର୍ଯ୍ୟଗୁଡ଼ିକର ମୁଖ୍ୟ ଗୁରୁତ୍ୱ ରହିଛି।
ଉନ୍ନତ ମାତୃ-ଶିଶୁ କମ୍ପ୍ଲେକ୍ସ ଦ୍ୱାରା ପ୍ରସବ ସମୟରେ ମା’ ଓ ଶିଶୁଙ୍କ ପାଇଁ ଅଧିକ ସୁରକ୍ଷିତ ଚିକିତ୍ସାସେବା ସୁନିଶ୍ଚିତ ହୋଇପାରିବ। ସୁଦୃଢ଼ ଆଣ୍ଟି-ରେଟ୍ରୋଭାଇରାଲ୍ ଥେରାପି (ART) କେନ୍ଦ୍ର ଦୀର୍ଘକାଳୀନ ଚିକିତ୍ସା ନେଉଥିବା ରୋଗୀମାନଙ୍କୁ ପ୍ରତିଥର ଚିକିତ୍ସା ପାଇଁ ଆସିବା ସମୟରେ ଅଧିକ ସୁବିଧାଜନକ ପରିବେଶ ପ୍ରଦାନ କରିବ। ଉନ୍ନତ ରୋଗୀ ବିଶ୍ରାମ କକ୍ଷ ଦ୍ୱାରା ଅସୁସ୍ଥ ରୋଗୀଙ୍କ ସହ ଆସୁଥିବା ପରିବାର ସଦସ୍ୟମାନଙ୍କୁ ଆଉ ହସ୍ପିଟାଲ୍ର କରିଡର୍ରେ ତଳେ ବସି କିମ୍ବା ଅପେକ୍ଷା କରି ରହିବାକୁ ପଡ଼ିବ ନାହିଁ। ଏହିସବୁ ଗୁରୁତ୍ୱପୂର୍ଣ୍ଣ ପଦକ୍ଷେପ ସରକାରୀ ସ୍ୱାସ୍ଥ୍ୟସେବାକୁ ସାଧାରଣ ଲୋକେ ତୃଣମୂଳସ୍ତରରେ କିପରି ଅନୁଭବ କରୁଛନ୍ତି, ତାହାକୁ ପ୍ରଭାବିତ କରିବ।
ସାଂସଦ ପାଣ୍ଠି (MPLADS) ରୁ ଯାଞ୍ଚ ଏବଂ ମଞ୍ଜୁରୀ ପାଇଁ ଏହି ସୁପାରିଶଗୁଡ଼ିକ କରାଯାଇଛି। ଆବଶ୍ୟକ ଯାଞ୍ଚ ପରେ ବୈଷୟିକ, ଆର୍ଥିକ ଏବଂ ପ୍ରଶାସନିକ ମଞ୍ଜୁରୀ ପ୍ରଦାନ କରାଯିବ । ମଞ୍ଜୁର ପ୍ରାପ୍ତ କାର୍ଯ୍ୟଗୁଡ଼ିକୁ ସାଂସଦ ପାଣ୍ଠି (MPLADS)ନିର୍ଦ୍ଦେଶାବଳୀର ବ୍ୟବସ୍ଥା ଅନୁଯାୟୀ ହାତକୁ ନିଆଯାଇ ସମ୍ପୂର୍ଣ୍ଣ କରାଯିବ।ଏହି ପଦକ୍ଷେପ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ନିଜ ରାଜ୍ୟର ସ୍ୱାସ୍ଥ୍ୟ ଆବଶ୍ୟକତା ସହ ଜଡ଼ିତ ରହିବାର ଏକ ନିରନ୍ତର ପ୍ରୟାସ, ଯାହା ଦ୍ୱାରା ଏହି କାର୍ଯ୍ୟଗୁଡ଼ିକ ମଞ୍ଜୁର ଏବଂ ସମ୍ପୂର୍ଣ୍ଣ ହେବା ପରେ ନୀଳଗିରି ଏବଂ ବାଲେଶ୍ୱରର ଜିଲ୍ଲାସ୍ତରୀୟ ସ୍ୱାସ୍ଥ୍ୟସେବାରେ ଉଲ୍ଲେଖନୀୟ ସୁଧାର ଆସିବ ବୋଲି ଆଶା କରାଯାଉଛି।
