Garvita Odia
ଭୁବନେଶ୍ୱର : ବାନ୍ଧାହେବେ ପୂର୍ବତନ ଶରଣକୁଳ ଥାନା ଆଇଆଇସି ସୁଜିତ କୁମାର ଦାସ । ଦୁଷ୍କର୍ମ ମାମଲାରେ ଅଭିଯୁକ୍ତ ହେବା ପରେ ଫେରାର ଅଛନ୍ତି ସୁଜିତ କୁମାର । ସୁଜିତଙ୍କୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି କ୍ରାଇମବ୍ରାଞ୍ଚ CAW । ଆଗୁଆ ଜାମିନ ଖାରଜ କରିବା ସହ ତଳ କୋର୍ଟରେ ଆତ୍ମସମର୍ପଣ କରିବା ପାଇଁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ । ଜଣେ ମହିଳାଙ୍କୁ ଦୁଷ୍କର୍ମ କରିଥିବା ନେଇ ଅଭିଯୋଗ ପରେ ସୁଜିତଙ୍କୁ ନିଲମ୍ବନ କରାଯାଇଥିଲା । ଏହାପରେ ଶରଣକୁଳ ଥାନାରେ ଦୁଷ୍କର୍ମ ମାମଲା ରୁଜୁ କରାଯିବା ସହ ପୋଲିସ ତଦନ୍ତ କରିଥିଲା । ଏହାପରେ ଏହି ମାମଲା କ୍ରାଇମବ୍ରାଞ୍ଚ୍ ର CAW କୁ ହୋଇଥିଲା ହସ୍ତାନ୍ତର ।
କ୍ରାଇମବ୍ରାଞ୍ଚ୍ ତଦନ୍ତ କରିବା ସହ ସୁଜିତଙ୍କ ବିରୋଧରେ ଆସିଥିବା ଅଭିଯୋଗର ସତ୍ୟତା ପାଇବା ସହ ପ୍ରାଥମିକ ପ୍ରମାଣ ହାସଲ କରିଥିଲା । ଏହ ମଧ୍ୟରେ ଆଗୁଆ ଜାମିନ ଆବେଦନ କରିଥିବାରୁ ଅନ୍ତରୀଣ ସୁରକ୍ଷା ପ୍ରଦାନ କରିଥିଲେ ହାଇକୋର୍ଟ । ପରେ କୋର୍ଟଙ୍କ ନିର୍ଦ୍ଦେଶ କ୍ରମେ ସୁଜିତ୍ କ୍ରାଇମବ୍ରାଞ୍ଚ୍ ନିକଟରେ ହାଜର ହୋଇଥିଲେ। ତଦନ୍ତ କାରୀ ସଂସ୍ଥା ସୁଜିତଙ୍କ ଡାକ୍ତରୀ ମାଇନା କରିବା ସହ ତାଙ୍କ ଷ୍ଟେଟମେଣ୍ଟ ରେକର୍ଡ କରିଥିଲା । ତେବେ ଅନ୍ତରୀଣ ସୁରକ୍ଷା ହଟାଇବା ପାଇଁ କ୍ରାଇମବ୍ରାଞ୍ଚ୍ କୋର୍ଟଙ୍କୁ ଅନୁରୋଧ କରିବା ସହ ସମସ୍ତ ତଥ୍ୟ ପ୍ରମାଣ ଦାଖଲ କରିଥିଲା । ସମସ୍ତ ତଥ୍ୟ ପ୍ରମାଣ ସହ ଗତ ୨୦ ତାରିଖ ଦିନ ଏହି ମାମଲାର ଶୁଣାଣି କରିବା ସହ ସୁଜିତ କୁମାର ଦାସଙ୍କ ଅନ୍ତରୀଣ ସୁରକ୍ଷା ହଟାଇ ଦେଇଛନ୍ତି ହାଇକୋର୍ଟ । ପରେ ଗିରଫଦାରୀ ଭୟରେ ସୁଜିତ୍ ଫେରାର ହୋଇଯାଇଥିବା ଜଣାପଡିଛି ।
