ଜାତୀୟ ପୁରସ୍କାର ପାଇଲେ ଓଡ଼ିଶାର ୭ ଶିକ୍ଷା ଅଧିକାରୀ

ଭୁବନେଶ୍ବର: ଶିକ୍ଷା ପ୍ରଶାସନରେ ଓଡ଼ିଶାକୁ ଜାତୀୟ ସ୍ତରରେ ମିଳିଲା ବଡ଼ ସ୍ୱୀକୃତି । ବିଦ୍ୟାଳୟ ଶିକ୍ଷାର ଗୁଣବତ୍ତା ବୃଦ୍ଧି, ଶିକ୍ଷଣ ଫଳାଫଳରେ ସୁଧାର, ବିଦ୍ୟାଳୟ ସୁରକ୍ଷା, ପଠନ ଅଭ୍ୟାସ ବଢ଼ାଇବା ଏବଂ ଡ୍ରପ୍‌ଆଉଟ୍‌ ରୋକିବା ଦିଗରେ ଅଭିନବ ପଦକ୍ଷେପ ପାଇଁ ରାଜ୍ୟର ୭ ଜଣ ଶିକ୍ଷା ଅଧିକାରୀଙ୍କୁ ମିଳିଛି ଜାତୀୟ ପୁରସ୍କାର ।ନୂଆଦିଲ୍ଲୀସ୍ଥିତ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଏଜୁକେସନାଲ ପ୍ଲାନିଂ ଆଣ୍ଡ ଆଡମିନିଷ୍ଟ୍ରେସନ୍ (NIEPA) ପକ୍ଷରୁ ଆୟୋଜିତ ‘ଶିକ୍ଷା ପ୍ରଶାସନରେ ନବସୃଜନ ଏବଂ ଉତ୍ତମ ଅଭ୍ୟାସ’ ପୁରସ୍କାର ସମାରୋହରେ ଏହି ସମ୍ମାନ ପ୍ରଦାନ କରାଯାଇଛି ।ସସ୍ମିତା ସାହୁ, ଯୁଗ୍ମ ନିର୍ଦ୍ଦେଶିକା, OSEPA — ‘FLN ଗ୍ରୀଷ୍ମକାଳୀନ ପାଠ୍ୟକ୍ରମ’ ପାଇଁ ପୁରସ୍କୃତ ହୋଇଛନ୍ତି । ଏହା ମାଧ୍ୟମରେ ଗ୍ରୀଷ୍ମ ଛୁଟି ସମୟରେ ପିଲାଙ୍କ ମୌଳିକ ସାକ୍ଷରତା ଓ ସଂଖ୍ୟାଜ୍ଞାନକୁ ମଜଭୁତ କରିବା ଉପରେ ଗୁରୁତ୍ୱ ଦିଆଯାଉଥିଲା ।ଡ. ରାଧାକାନ୍ତ ଗର୍ତ୍ତିଆ, DEO, ଝାରସୁଗୁଡ଼ା — ‘ଉଦୀୟାନ୍ ତାରା’ ପଦକ୍ଷେପ ପାଇଁ ସମ୍ମାନିତ ହୋଇଛନ୍ତି । ଏହାର ଲକ୍ଷ୍ୟ ଥିଲା ସ୍କୁଲ ଛାତ୍ରଛାତ୍ରୀଙ୍କ ଶିକ୍ଷଣ ଫଳାଫଳରେ ସୁଧାର ଆଣିବା ।ଡ. ମାୟାଧର ସାହୁ, DEO, ଗଜପତି — ‘ପ୍ରୟାସ @ ସୁପର 30 ଗଜପତି’ ପାଇଁ ପୁରସ୍କୃତ ହୋଇଛନ୍ତି । ମେଧାବୀ ଛାତ୍ରଛାତ୍ରୀଙ୍କୁ ପ୍ରତିଯୋଗିତାମୂଳକ ପରୀକ୍ଷା ଓ ଉଚ୍ଚଶିକ୍ଷା ପାଇଁ ପ୍ରସ୍ତୁତ କରିବା ଏହି ପଦକ୍ଷେପର ଉଦ୍ଦେଶ୍ୟ ରହିଥିଲା ।ଶ୍ରୀକାନ୍ତ ବେହେରା, ADEO, କେନ୍ଦୁଝର — ‘Reading Tournament and DEAR Programme’ ପାଇଁ ସମ୍ମାନିତ। ସ୍କୁଲ ପିଲାଙ୍କ ମଧ୍ୟରେ ପଠନ ଅଭ୍ୟାସ ବଢ଼ାଇବା ଏହାର ମୁଖ୍ୟ ଲକ୍ଷ୍ୟ । ଏହାରି ଉପରେ ପିଲାମାନଙ୍କୁ ଅଧିକ ଗୁରୁତ୍ୱ ଦେଇଆସୁଥିଲେ ।ସେବାଶ୍ରୀ ଭୋଇ, ADEO, ବଲାଙ୍ଗୀର — ସମ୍ବଲପୁର ଜିଲ୍ଲାର ଧନକୌଡ଼ା ବ୍ଲକର ‘Mission Zero Dropout’ ପାଇଁ ପୁରସ୍କୃତ ହୋଇଛନ୍ତି । ସେ କିଭଳି ଭାବରେ ପ୍ରତି ଗାଁ ଓ ଘର ଲୋକଙ୍କ ସହିତ ଯୋଗାଯୋଗ ରେ ରହି ଡ୍ରପ ଆଉଟ ହେଉଥିବା ପିଲାମାନଙ୍କୁ ପୁଣିଥରେ ସ୍କୁଲକୁ ଫେରାଇ ଆଣିବା ଥିଲା ତାଙ୍କର ମୁଖ୍ୟ ଲକ୍ଷ୍ୟ ।ତ୍ରିଲୋଚନ ସାହୁ, ସମଗ୍ର ଶିକ୍ଷା, ଯାଜପୁରର ଯୋଜନା ସଂଯୋଜକ ଭାବରେ କାର୍ଯ୍ୟରତ । ବିଦ୍ୟାଳୟ ସୁରକ୍ଷା ସମ୍ପର୍କିତ ବିପର୍ଯ୍ୟୟ ପରିଚାଳନା ନିର୍ଦ୍ଦେଶାବଳୀର କାର୍ଯ୍ୟକାରୀ ରୂପାୟଣ ପାଇଁ ସମ୍ମାନିତ ହୋଇଛନ୍ତି ।ସବିତା ସାହୁ, ADEO, ଯାଜପୁର — ‘School Safety Corridor: A Way of Life and a State of Mind’ ପଦକ୍ଷେପ ପାଇଁ ଜାତୀୟ ସ୍ୱୀକୃତି ପାଇଛନ୍ତି । ଛାତ୍ରଛାତ୍ରୀ ଓ ସ୍କୁଲ ସମୁଦାୟ ମଧ୍ୟରେ ସୁରକ୍ଷା ସଚେତନତା ବଢ଼ାଇବା ଏହାର ମୁଖ୍ୟ ଲକ୍ଷ୍ୟ ରହିଛି. ।ଏହି ସଫଳତାକୁ ବିଦ୍ୟାଳୟ ଓ ଗଣଶିକ୍ଷା ବିଭାଗର କମିଶନର ତଥା ଶାସନ ସଚିବ ଡ. ଏନ୍. ତିରୁମାଲା ନାୟକ ପ୍ରଶଂସା କରିଛନ୍ତି । ସାତ ଜଣ ଅଧିକାରୀଙ୍କ ଜାତୀୟ ସ୍ୱୀକୃତି ଓଡ଼ିଶା ପାଇଁ ଗର୍ବର ବିଷୟ ବୋଲି ସେ କହିଛନ୍ତି । ଏହା ସହ ଶିକ୍ଷା ପ୍ରଶାସନରେ ନବସୃଜନ ଓ ଉତ୍ତମ ଅଭ୍ୟାସକୁ ଆହୁରି ପ୍ରୋତ୍ସାହନ ମିଳିବ ବୋଲି ବିଭାଗର କମିଶନର ତଥା ଶାସନ ଆଶା ପ୍ରକାଶ କରିଛନ୍ତି ।