Garvita Odia
ଖଣ୍ଡଗିରି: ଚନ୍ଦକା ଥାନା ମହୁଲ ଗ୍ରାମରେ ମଙ୍ଗଳବାର ବିଳମ୍ବିତ ରାତିରେ ଏକ ଅଭାବନୀୟ ଘଟଣା ଘଟିଛି। ଛାତ ଉପରେ ଦୁଇ ଭାଇ ବୋମା ଭିଡୁଥିବା ବେଳେ ଭୟଙ୍କର ବିସ୍ପୋରଣ ଘଟି ଗୋଟିଏ ଭାଇ ମୃତ୍ୟୁ ବରଣ କରିଥିବା ବେଳେ ଜଣେ ଗୁରୁତର ଆହତ ହୋଇଛି। ମୃତକଙ୍କ ପରିଚୟ ଜଣାପଡ଼ି ନାହିଁ।
ମିଳିଥିବା ସୂଚନା ଅନୁସାରେ ମହୁଲ ଗ୍ରାମରେ ଗୋଟିଏ ପରିବାରର ଦୁଇ ଭାଇ ଛାତ ଉପରେ ବୋମା ଭିଡୁଥିଲେ। ବୋମା ଭିଡୁଥିବା ସମୟରେ କୌଣସି କାରଣରୁ ବିସ୍ଫୋରଣ ଘଟିଥିଲା। ବିସ୍ଫୋରଣରେ ଗୋଟିଏ ଭାଇର ମୁଣ୍ଡ ଓ ହେହ ଖଣ୍ଡବିଖଣ୍ଡିତ ହୋଇ ପଡ଼ିଥିବା ବେଳେ ଆଉ ଜଣେ ଭାଇ ଗୁରୁତର ଆହତ ହୋଇଥିଲେ। ବିସ୍ଫୋରଣ ଏତେ ଜୋର ଥିଲା ଯେ ଗାଁ ପୂରା ଦୁଲୁକି ପଡ଼ିଥିଲା। ଏତେ ବଡ ଶବ୍ଦ ଶୁଣି ଗ୍ରାମବାସୀ ଭୟଭୀତ ହୋଇପଡ଼ିଥିଲେ। ପାଖ ପଡ଼ିଶାମାନେ ଉଠି ଘଟଣାସ୍ଥଳକୁ ଦୌଡି ଆସିଥିଲେ। ଏନେଇ ଚନ୍ଦକା ଥାନାକୁ ଖବର ଦେଇଥିଲେ। ଖବର ପାଇ ଚନ୍ଦକା ଥାନା ପୁଲିସ ଘଟଣାସ୍ଥଳରେ ପହଞ୍ଚି ମୃତାହତଙ୍କୁ ଉଦ୍ଧାର କରିଥିଲା। ମୃତକଙ୍କ ଶବ ଜବତ କରିବା ସହ ଆହତଙ୍କୁ ଚିକିତ୍ସା ପାଇଁ କ୍ୟାପିଟାଲ ଡାକ୍ତରଖାନା ପଠାଇଥିଲେ। ତେବେ ପ୍ରଶ୍ନ ଉଠୁଛି ମହୁଲ ଗ୍ରାମକୁ ଏତେ ପରିମାଣର ବିସ୍ଫୋରକ ସାମଗ୍ରୀ ଆସିଲା କେମିତି, ସେମାନେ କେତେ ଦିନ ଠାରୁ ଏଭଳି କାମରେ ଲିପ୍ତ ଥିଲେ ସେନେଇ ପୁଲିସ ତଦନ୍ତ ଆରମ୍ଭ କରିଛି।
