ଆଜି ୧୨ ଘଣ୍ଟିଆ ଓଡ଼ିଶା ବନ୍ଦ ଡାକରା

ଭୁବନେଶ୍ୱର: ଆଜି ସମସ୍ତ ଅନଲାଇନ୍ ଟ୍ୟାକ୍ସି ସଂସ୍ଥାକୁ ବିରୋଧ କରି ୧୨ ଘଣ୍ଟିଆ ଓଡ଼ିଶା ବନ୍ଦ ଡାକରା ଦେଇଛି ଓଡ଼ିଶା ଅନଲାଇନ୍ ଚାଳକ ମିଳିତ ମଞ୍ଚ । ରାଜ୍ୟରେ ଓଲା, ଉବର, ରାପିଡୋ, ଓଡ଼ିଶା ଯାତ୍ରୀ ସମେତ ଅନ୍ୟାନ୍ୟ ଅନଲାଇନ୍ କମ୍ପାନୀ ଉପରେ ସରକାରୀ ନିୟନ୍ତ୍ରଣ ଲଗାଯାଉ ବୋଲି ସଂଘ ଦାବି କରିଛି । ୨୧ଟି ସଂଗଠନ ସମର୍ଥନରେ ଏହି ବନ୍ଦ ଡାକରା ଦିଆଯାଇଛି। ସମସ୍ତ ଜିଲ୍ଲା ସମେତ କଟକ ଭୁବନେଶ୍ୱରରେ ବନ୍ଦ ଜୋରଦାର ହେବ ବୋଲି ସଂଘ ଚେତାବନୀ ଦେଇଛି । ସଂଘ କହିଛି, ସରକାର ସର୍ବନିମ୍ନ ଏବଂ ସର୍ବାଧିକ ଭଡ଼ା ନିର୍ଦ୍ଧାରଣ କରନ୍ତୁ । ଅର୍ଥାତ ସରକାର ଓ ଅନଲାଇନ ଟ୍ୟାକ୍ସି କମ୍ପାନି ମିଳିତ ଭାବେ ଏକ ନିଦ୍ଧି ର୍ଷ୍ଟ ସୀମା ଭିତରେ ଭଡ଼ା ନିର୍ଦ୍ଧାରଣ କରନ୍ତୁ । ଯାହାଠାରୁ କୌଣସି କମ୍ପାନି କମ୍ କିମ୍ବା ବେଶୀ ଟଙ୍କା ନେଇପାରିବେ ନାହିଁ । ଗ୍ରାହକଙ୍କୁ ଯଦି କୌଣସି ଅଫର କିମ୍ବା ରିହାତି ଦେବାର ଅଛି, ତେବେ କମ୍ପାନି ନିଜେ ସେହି ଟଙ୍କା ଦିଅନ୍ତୁ । ଅନଲାଇନ୍ ଡ୍ରାଇଭରଙ୍କଠାରୁ ନୁହେଁ । ୨-୩ କିଲାମିଟର ଦୂରତା ଯିବା ପରେ ଗ୍ରାହକ ରାଇଡ୍ କ୍ୟାନ୍ସଲ କଲେ, କମ୍ପାନି ଗ୍ରାହକଙ୍କ ଠାରୁ କ୍ୟାସ୍ କଲେକ୍ସନ୍ ଫି ଆଦାୟ କରେ । କିନ୍ତୁ ସେହି କ୍ୟାନ୍ସଲେସନ ଫି’ ଅନଲାଇନ୍ ଡ୍ରାଇଭରଙ୍କୁ ଦିଆଯାଏ ନାହିଁ ।
ଏମିତିରେ ଡ୍ରାଇଭରଙ୍କୁ କ୍ଷତି ସହିବାକୁ ପଡ଼ିଥାଏ । ତେଲ ଖର୍ଚ୍ଚ ମଧ୍ୟ ହୋଇଥାଏ । ତେଣୁ ଏହି କ୍ୟାନ୍ସଲେସନ୍ ଫି’ର ପୂରା ଟଙ୍କା ଡ୍ରାଇଭରଙ୍କୁ ମିଳିବା ଦରକାର ବୋଲି ସଂଘର ଦାବି । କମ୍ପାନି ଦ୍ୱାରା ଅନିୟନ୍ତ୍ରିତ ଭାବେ ନୂଆ ଗାଡ଼ି ସାମିଲ କରାଯାଉଥୁବାରୁ ଚାହିଦା ଓ ଯୋଗାଣ ମଧ୍ୟରେ ସନ୍ତୁଳନ ବିଗିଡ଼ିଯାଇଛି । ଅତ୍ୟଧିକ ଯୋଗାଣ ଯୋଗୁ ପୂର୍ବରୁ ଥିବା ଡ୍ରାଇଭରମାନଙ୍କ ଆୟ ଗୁରୁତର ଭାବେ ପ୍ରଭାବିତ ହେଉଛି । ତେଣୁ ନୂଆ ଗାଡ଼ି ସାମିଲ କରିବା ଉପରେ ତୁରନ୍ତ ରୋକ୍ ଲଗାଯାଉ । ପ୍ରତିବର୍ଷ ଏକ ନିର୍ଦ୍ଦିଷ୍ଟ ଟାର୍ଗେଟ୍ ରଖି ଗାଡ଼ି ସାମିଲ କରାଯାଉ ବୋଲି ସଂଘ ଦାବି କରିଛି।