Garvita Odia
ଭୁବନେଶ୍ୱର : ଇଡକୋର ଜୁନିୟର ମ୍ୟାନେଜର ବିଜୟ କୁମାର ଉଦୟସିଂହ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ କଳାଧନର କୁବେର ବାବୁ ବିଜୟ ବୁଧବାର ଭିଜିଲାନ୍ସ ପଞ୍ଝାରେ ପଡ଼ିଛନ୍ତି । ତାଙ୍କ ଅଫିସ୍, ଖୋର୍ଦ୍ଧା ଜଙ୍କିଆରେ ଥିବା ପୈତୃକ ଘର, ପୁରୀରେ ଫ୍ଲାଟ୍, ଭୁବନେଶ୍ୱର ଆର୍ୟ୍ୟବିହାର ଘର ସହ ମୋଟ ୬ଟି ଜାଗାରେ ଚଢ଼ଉ କରିଥିଲା ଭିଜିଲାନ୍ସ । ଚଢ଼ଉ ସମୟରେ ୧୦ କୋଟିରୁ ଅଧିକ ଟଙ୍କା ମୂଲ୍ୟର ସ୍ଥାବର ଅସ୍ଥାବର ସମ୍ପତ୍ତି ଠାବ ହୋଇଛି । ବିଜୟଙ୍କୁ ଭିଜିଲାନ୍ସ ଥାନାରେ ଅଟକ ରଖାଯାଇଛି । ଗୁରୁବାର ତାଙ୍କୁ ଗିରଫ କରି କୋର୍ଟ ଚାଲାଣ କରାଯିବ ବୋଲି ଭିଜିଲାନ୍ସ ଏସ୍ପି ସୂଚନା ଦେଇଛନ୍ତି ।
ସ୍ଥାବର ଅସ୍ଥାବର ସମ୍ପତ୍ତି ମଧ୍ୟରେ ରହିଛି ଭୁବନେଶ୍ୱର ରାଜାରାଣୀ ମଉଜା ପ୍ଲଟ୍ ନମ୍ବର ୫୦୪ରେ ୪ ମହଲା ଘର । ଯାହା ୭୫୦୦ ବର୍ଗଫୁଟ୍ରେ ଠିଆ ହୋଇଛି । ଘରର ସରକାରୀ ମୂଲ୍ୟ ୩.୨୨ କୋଟି ଟଙ୍କା । ଘରେ ଝଲସୁଛି ଇମ୍ପୋର୍ଟେଡ୍ ବିଦେଶୀ ଇଣ୍ଟରିୟର । ଏହି ଘରର ସମସ୍ତ ଦ୍ୱାରରେ ସେନ୍ସର ଲାଗିଛି । ଖଟ, ସୋଫା, କବାଟ, ଝରକା ଓ ଆଲମାରୀଗୁଡିକ ଶାଳ କାଠରେ ହୋଇଛି । ଘରେ ଲାଗିଥିବା ଝୁମର ଥାଇଲାଣ୍ଡରୁ ଆସିଛି । ପାଇଖାନାରେ ବି ସେନ୍ସର ଲାଗିଛି । ସବୁଠାରୁ ଆଶ୍ଚର୍ୟ୍ୟ କଥା ହେଲା ବାବୁ ଗାଧୋଇବା ପାଇଁ ବି ମିନେରାଲ୍ ୱାଟର ବ୍ୟବହାର କରନ୍ତି । ଡ୍ରଇଂ ରୁମ୍ଠାରୁ ଆରମ୍ଭ କରି ବେଡ୍ ରୁମ୍-ସବୁଠି ରହିଛି ସେନ୍ସର ଲକିଂ ବ୍ୟବସ୍ଥା । ଘରର ଡିଜାଇନ ଆଖି ଖୋସିଲା ଭଳି ହୋଇଛି । ଗୋଟିଏ ଗୋଟିଏ ଫ୍ୟାନ୍ର ମୂଲ୍ୟ ୨୦ ହଜାରରୁ ଅଧିକ ଟଙ୍କା । ପାଇଖାନାରେ ବି ବାବୁ ଏସି ଲଗାଇଛନ୍ତି ।
ତା’ଛଡ଼ା ପୁରୀ ଜିଲ୍ଲାର ବାଲୁଖଣ୍ଡ ମୌଜାରେ ଏକ ଫ୍ଲାଟ ମିଳିଛି । ଭୁବନେଶ୍ୱର ଓ ଖୋର୍ଦ୍ଧାର ପ୍ରମୁଖ ଅଞ୍ଚଳରେ ୩ଟି ପ୍ଲଟ୍ ଅଛି। ଯାହାର ମୂଲ୍ୟ ପାଖାପାଖି ୪ କୋଟି ହେବ ବୋଲି ଭିଜିଲାନ୍ସ ଜାଣିବାକୁ ପାଇଛି । ବିଜୟଙ୍କ ବ୍ୟାଙ୍କ ଜମା ଓ ବୀମା ୫୫ ଲକ୍ଷ ୧୦ ହଜାର ଟଙ୍କା ଠାବ ହୋଇଛି । ତାଙ୍କ ଘରୁ ନଗଦ ୪ ଲକ୍ଷ ୫୦ ହଜାର ଜବତ ମଧ୍ୟ କରାଯାଇଛି । ସେହିପରି ତାଙ୍କର ଗୋଟିଏ ଚାରିଚକିଆ ଏବଂ ୩ଟି ଦୁଇଚକିଆ ଗାଡ଼ି ରହିଛି । ୨୯ ଲକ୍ଷ ଟଙ୍କା ମୂଲ୍ୟର ସୁନା ଅଳଙ୍କାର ମଧ୍ୟ ଜବତ କରାଯାଇଛି । ବାବୁଙ୍କ ପାସ୍ପୋର୍ଟ ଦେଖି ଭିଜିଲାନ୍ସ ତାଜୁବ ହୋଇଛି । ବିଦେଶ ଖର୍ଚ୍ଚର ହିସାବ ହୋଇ ନାହିଁ । ୫୦ ଲକ୍ଷରୁ ଅଧିକ ହେବ ବୋଲି ଭିଜିଲାନ୍ସ ଅନୁମାନ କରୁଛି । କିଛି ମହିଳାଙ୍କ ନାଁରେ ବେନାମୀ ସମ୍ପତ୍ତି ଠାବ ମଧ୍ୟ ହୋଇଛି । ସେ ମହିଳାମାନେ କିଏ ? ତାଙ୍କ ସହ କ’ଣ ସମ୍ପର୍କ ତାର ଖୋଳତାଡ଼ ହେବ ବୋଲି ଭିଜିଲାନ୍ସ ଏସ୍ପି କହିଛନ୍ତି ।
