ଘନେଇଲା ବାତ୍ୟା ଭୟ !

ଭୁବନେଶ୍ୱର; ବର୍ତ୍ତମାନ ରାଜ୍ୟରେ ପାଗ ଶୁଖିଲା ରହିଛି । ଦିନରେ ପ୍ରବଳ ଖରା ହେଉଛି । ରାତିରେ ଗୁଳୁଗୁଳି ଅନୁଭବ ହେଉଛି । କିନ୍ତୁ ଆଗାମୀ କିଛି ଦିନ ମଧ୍ୟରେ ଲଘୁଚାପ ସମ୍ଭବନା ରହିଛି । ଯାହା ବଡ଼ ବର୍ଷା ଆଣିପାରେ । ଚଳିତ ସପ୍ତାହରେ ବଙ୍ଗୋପସାଗରରେ ସିଷ୍ଟମ୍ ଗଠନ ନେଇ ବଡ଼ ସଙ୍କେତ ମିଳିଥିବା ସୂଚନା ଦେଇଚନ୍ତି ପାଣିପାଗ ବିଶାରତ ପ୍ରଫେସ୍ ସୁରେନ୍ଦ୍ରନାଥ ପଶୁପାଳକ । ଅକ୍ଟୋବରରେ ଆମେରିକାର ନାଓ ବା ନ୍ୟାସନାଲ ଓସେନିକ୍ ଆଣ୍ଡ ଆଟମୋସ୍ପିରିକ ଆଡମିନିଷ୍ଟ୍ରେସନ୍ (National Oceanic and Atmospheric Administration) ୧୪–୨୦ ଅକ୍ଟୋବର ମଧ୍ୟରେ ଉତ୍ତର ଭାରତ ମହାସାଗରରେ ଘୂର୍ଣ୍ଣିବାତ୍ୟା ଗଠନର ସମ୍ଭାବନା ୨୦–୪୦% ବୋଲି ସଙ୍କେତ ଦେଇଥିବା କହିଛନ୍ତି ପାଣିପାଗ ବିଶାରଦ । ଏହି ସିଷ୍ଟମ ଅକ୍ଟୋବର ମଧ୍ୟଭାଗରେ ଗଠନର ସଙ୍କେତକୁ ଅଧିକ ସମର୍ଥନ କରୁଛି । ଏଥିପାଇଁ ବଙ୍ଗୋପସାଗର ଉପରେ ମୌସୁମୀ ବାୟୁ ଦୁର୍ବଳ ହୋଇ ପବନର ଢାଞ୍ଚା ବଦଳୁଛି । ଭାରତ ମହାସାଗର ଉପରେ Madden–Julian Oscillation (MJO) ଅଧିକ ଅନୁକୂଳ ହେବା ଦୁଇଟି ବଡ଼ କାରଣ ହୋଇପାରେ ।
ECMWF ଓ GEFS ମଡେଲ୍ଗୁଡ଼ିକ ଘୂର୍ଣ୍ଣିବାତ୍ୟା ନିଶ୍ଚିତ ଗଠନ ହେବ ବୋଲି ନୁହେଁ, ବରଂ ସିଷ୍ଟମ୍ ଗଠନ ପାଇଁ ପରିବେଶ ଅନୁକୂଳ ହେବା ଉପରେ ଅଧିକ ସହମ ତ। ଦୁଇଟି ମଡେଲ୍ରେ ଭାରତ ମହାସାଗର ଉପରେ MJO ସକ୍ରିୟ ହେବାର ସଙ୍କେତ ରହିଛି । ତେବେ GEFSରେ ଅନିଶ୍ଚିତତା ଅଧିକ।
ପୂର୍ବରୁ ଦିଆଯାଇଥିବା ଦୀର୍ଘମିଆଦି ସଙ୍କେତ ଏବେ ମଧ୍ୟ ମୋଟାମୋଟି ଭାବେ ରହିଛି । ୧୨ ଅକ୍ଟୋବର ପାଖାପାଖି ଉତ୍ତର ଆଣ୍ଡାମାନ ସାଗରରେ ଘୂର୍ଣ୍ଣି ପ୍ରବାହ । ତା’ପରେ ଆଣ୍ଡାମାନ ସାଗରରେ ଲଘୁଚାପ କ୍ଷେତ୍ର (LPA) ଗଠନ ହୋଇପାରେ । ଏହା ପରେ ସିଷ୍ଟମ୍ କେତେ ଶକ୍ତିଶାଳୀ ହେବ ଓ କେଉଁ ଦିଗକୁ ଯିବ, ତାହା ଏବେ ଅନିଶ୍ଚିତ ।
ଘୂର୍ଣ୍ଣି ପ୍ରବାହ ବା ଲଘୁଚାପ ଗଠନ ହେଲେ ଦୁଇଟି ପ୍ରଶ୍ନ ଗୁରୁତ୍ୱପୂର୍ଣ୍ଣ ହେବ । ଲଘୁଚାପ କେଉଁଠାରେ ଗଠିତ ହେବ ? ଯଦି ଏହା ଅଧିକ ଉତ୍ତରକୁ ସରି ପୂର୍ବ-ମଧ୍ୟ ବଙ୍ଗୋପସାଗରରେ ସଂଗଠିତ ହୁଏ, ତେବେ ଓଡ଼ିଶା ପାଇଁ ଏହାର ଗୁରୁତ୍ୱ ବଢ଼ିବ । ଭର୍ଟିକାଲ ୱିଣ୍ଡ ସେୟାର କମିବ କି ? ୮୫୦–୨୦୦ ଏଚପିଏ ସ୍ତର ମଧ୍ୟରେ ପବନର ବେଗ ଓ ଦିଗର ପାର୍ଥକ୍ୟ କମି ଅନୁକୂଳ ହେଲେ ସିଷ୍ଟମ୍ ଅଧିକ ଶକ୍ତିଶାଳୀ ହେବାର ସମ୍ଭାବନା ବଢ଼ିବ । ୧୦–୧୨ ଅକ୍ଟୋବର ପାଖାପାଖି ଚିତ୍ର ଅଧିକ ସ୍ପଷ୍ଟ ହୋଇପାରେ । ଭୟଭୀତ ହେବାର କାରଣ ନାହିଁ । ବର୍ତ୍ତମାନ ଓଡ଼ିଶା ପାଇଁ ସିଧାସଳଖ ବିପଦର କୌଣସି ବିଶ୍ୱସନୀୟ ସଙ୍କେତ ନାହିଁ ।
ଚାଷୀମାନେ ସ୍ଥାନୀୟ ମାଟି ଓ ଫସଲର ଅବସ୍ଥା ଦେଖି ସାଧାରଣ କୃଷି କାମ ଜାରି ରଖିପାରିବେ । ଧାନ ଜମି ଉପଯୁକ୍ତ ଥିଲେ ଏବଂ ତୁରନ୍ତ ପ୍ରବଳ ବର୍ଷାର ସମ୍ଭାବନା ନଥିଲେ ଆବଶ୍ୟକ ଉପର ସାର ଦିଅନ୍ତୁ । ମାଟିରେ ଉପଯୁକ୍ତ ବତର ଥିଲେ ରବି ଫସଲ ପାଇଁ ଜମି ପ୍ରସ୍ତୁତି ଓ ବୁଣାବୁଣି ଜାରି ରଖନ୍ତୁ । ମାଟି ଶୁଖିଯାଇଥିଲେ ଆବଶ୍ୟକତା ଅନୁସାରେ ଜଳସେଚନ କରନ୍ତୁ । ପାଣି ଜମିଥିବା ବା ଅତ୍ୟଧିକ ଓଦା ଜମିରେ ଅନାବଶ୍ୟକ ଜଳସେଚନ ଓ ଭାରୀ କୃଷି କାମରୁ ବିରତ ରୁହନ୍ତୁ ।