Garvita Odia
ଭୁବନେଶ୍ୱର: ରାଜ୍ୟସଭା ନିର୍ବାଚନକୁ ନେଇ ଗତକାଲି ଚତୁର୍ଥ ଆସନ ପାଇଁ ବିଜେପି ସମର୍ଥିତ ସ୍ୱାଧୀନ ପ୍ରାର୍ଥୀ ଦିଲ୍ଲୀପ ରାୟ ନାମାଙ୍କନ ଭରିଥିବାବେଳେ ତାଙ୍କର ପ୍ରାର୍ଥିପତ୍ର କାଏମ ରହିଛି । ତେବେ ସେ ଏହି ନିର୍ବାଚନରେ ନିଶ୍ଚିତ ବିଜୟ ଲାଭ କରିବେ ବୋଲି ଗତକାଲି କହିଥିବାବେଳେ ଆଜି ତାଙ୍କୁ ବିବେକାନୁମୋଦିତ ଭୋଟ ମିଳିବ ବୋଲି କହିଛନ୍ତି ।
ଏହାଛଡ଼ା ସେ କହିଛନ୍ତି ଯେ ୨୦୦୨ରେ ମୁଁ ଯୋଜନା ମୁତାବକ ଲଢ଼ିଥିଲି । ସେତେବେଳେ ୨ ମାସ ଗ୍ରାଉଣ୍ଡ ୱାର୍କ ହୋଇଥିଲା । କିନ୍ତୁ ଏଥର ମୁଁ ପ୍ରସ୍ତୁତ ନଥିଲି, ଠାତ ପ୍ରାର୍ଥୀ ହେଲି । ୨ ଦିନର ଗ୍ରାଉଣ୍ଡ ୱାର୍କ ବି ହୋଇନି, ତଥାପି ପ୍ରସ୍ତୁତି ଚାଲିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଗୃହମନ୍ତ୍ରୀ ଅମିତ ଶାହ, ମୁଖ୍ୟମନ୍ତ୍ରୀ ମୋହନ ମାଝୀ ଓ ବିଜେପି ରାଜ୍ୟସଭାପତି ମନମୋହନ ସାମଲଙ୍କ ସମର୍ଥନ ରହିଛି । ଭଲ ସପୋର୍ଟ ତ ଅଛି, ବିବେକାନୁମୋଦିତ ଭୋଟ ମିଳିବ ବୋଲି ଦିଲ୍ଲୀପ ରାୟ କହିଛନ୍ତି ।
ଗତକାଲି ନାମାଙ୍କନ ପରେ ଦିଲ୍ଲୀପ ରାୟ କହିଥିଲେ ଯେ ‘ପ୍ରଧାନମନ୍ତ୍ରୀ, ଗୃହ ମନ୍ତ୍ରୀ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ, ଓ ମୁଖ୍ୟମନ୍ତ୍ରୀଙ୍କ ସମର୍ଥନ ରହିଛି’ । ବିଜେପି ନାମାଙ୍କନ ଭରିବା ପାଇଁ ପୂରା ସମର୍ଥନ ଯୋଗାଇ ଦେଇଛି । ଆସନ୍ତାକାଲିଠୁ ପ୍ରଚାର, ୨୦୦୨ ପରି ଜିତାପଟ ହାସଲ କରିବି । କଂଗ୍ରେସ-ବିଜେଡି ହାତ ମିଶାଇବା ପ୍ରଶ୍ନରେ ପ୍ରତିକ୍ରିୟା ରଖି କହିଥିଲେ, ଆମେ ବି ହାତ ମିଶାଇ ଦେବୁ । ଏମିତି କହି ବିଚକ୍ଷଣ ମନ୍ତବ୍ୟ ରଖିଥିଲେ ଦିଲ୍ଲୀପ ।
