ରାଜ୍ୟସଭା ନିର୍ବାଚନ: ଭୋଟ୍ ଗ୍ରହଣ ଆରମ୍ଭ, ସନ୍ଧ୍ୟାରେ ଆସିବ ଫଳାଫଳ

ନୂଆଦିଲ୍ଲୀ,: ସାମ୍ପ୍ରତିକ ରାଜନୈତିକ ହଟଚମଟ ମଧ୍ୟରେ ଆଜି ଓଡ଼ିଶା ସମେତ ୩ଟି ରାଜ୍ୟର ୧୧ଟି ରାଜ୍ୟସଭା ଆସନ ପାଇଁ ମତଦାନ ଆରମ୍ଭ ହୋଇଛି । ବିହାର, ହରିୟାଣା ଏବଂ ଓଡ଼ିଶାରେ ଚାଲିଥିବା ଏହି ନିର୍ବାଚନକୁ ନେଇ ସାରା ଦେଶର ନଜର ରହିଛି । ବିଶେଷ କରି ଓଡ଼ିଶାରେ ‘ହର୍ସ ଟ୍ରେଡିଂ’ ବା ବିଧାୟକ କିଣାବିକା ଅଭିଯୋଗ ଏହି ଲଢ଼େଇକୁ ଆହୁରି ରୋଚକ କରିଦେଇଛି । ଓଡ଼ିଶାର ୪ଟି ରାଜ୍ୟସଭା ଆସନ ପାଇଁ ୫ ଜଣ ପ୍ରାର୍ଥୀ ମଇଦାନକୁ ଓହ୍ଲାଇଛନ୍ତି । ସଂଖ୍ୟା ଗରିଷ୍ଠତା ଦୃଷ୍ଟିରୁ ସମୀକରଣ ସ୍ପଷ୍ଟ ଥିଲେ ମଧ୍ୟ ‘କ୍ରସ୍ ଭୋଟିଂ’ ଆଶଙ୍କା ରାଜନୈତିକ ପାଣିପାଗକୁ ସରଗରମ କରିଛି । ବିଜେଡି ସୁପ୍ରିମୋ ନବୀନ ପଟ୍ଟନାୟକ ବିଜେପି ବିରୋଧରେ ଘୋଡ଼ା ବେପାରର ସାଂଘାତିକ ଅଭିଯୋଗ ଆଣିଛନ୍ତି । ବିଧାୟକମାନଙ୍କୁ ପ୍ରଲୋଭିତ କରାଯାଉଥିବା ନେଇ ସେ ଚେତାବନୀ ଦେଇଛନ୍ତି । ୪ଟି ଆସନ ପାଇଁ ୫ ଜଣ ପ୍ରାର୍ଥୀ ରହିଥିବାରୁ ଏଠାରେ ଭୋଟ୍ ଗ୍ରହଣ ଜରୁରୀ ହୋଇପଡ଼ିଛି ।

ବିହାରର ୫ଟି ଆସନ ପାଇଁ ଭୋଟ୍ ଗ୍ରହଣ ଜାରି ରହିଛି । ଏଠାରେ ଏନଡିଏ ଏବଂ ଆରଜେଡି ମଧ୍ୟରେ କଡ଼ା ଟକ୍କର ଦେଖିବାକୁ ମିଳୁଛି । ଆରଜେଡି ନେତା ତେଜସ୍ୱୀ ଯାଦବ ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ଟାର୍ଗେଟ କରି କହିଛନ୍ତି ଯେ, “ନୀତିଶଙ୍କ ପ୍ରତି ମୋର ପୂର୍ଣ୍ଣ ସମବେଦନା ଅଛି ।” ଏହି ବୟାନ ବିହାର ରାଜନୀତିରେ ଚର୍ଚ୍ଚାର ବିଷୟ ପାଲଟିଛି । ନିଜେ ମୁଖ୍ୟମନ୍ତ୍ରୀ ନୀତିଶ କୁମାର ଏବଂ ବିଜେପି ରାଷ୍ଟ୍ରୀୟ ସମ୍ପାଦକ ନିତିନ ନବୀନ ଏହି ନିର୍ବାଚନରେ ପ୍ରାର୍ଥୀ ଅଛନ୍ତି ।
ହରିୟାଣାର ୨ଟି ଆସନ ପାଇଁ ୩ ଜଣ ପ୍ରାର୍ଥୀ ଥିବାରୁ ଲଢ଼େଇ ବେଶ୍ ଜୋରଦାର ହୋଇଛି । ବିଧାୟକମାନେ ଯେପରି ଅନ୍ୟ ଦଳକୁ ଭୋଟ୍ ନଦେବେ, ସେଥିପାଇଁ କଂଗ୍ରେସ ନିଜର ବିଧାୟକମାନଙ୍କୁ ହିମାଚଳ ପ୍ରଦେଶ ପଠାଇ ଦେଇଥିଲା । ସ୍ୱାଧୀନ ପ୍ରାର୍ଥୀ ସତୀଶ ନାନ୍ଦଲଙ୍କୁ ବିଜେପିର ପରୋକ୍ଷ ସମର୍ଥନ ଥିବାରୁ କଂଗ୍ରେସର ଅଡ଼ୁଆ ବଢ଼ିଯାଇଛି । ସକାଳ ୯ଟାରୁ ଆରମ୍ଭ ହୋଇଥିବା ଏହି ମତଦାନ ସନ୍ଧ୍ୟା ୫ଟା ପର୍ୟ୍ୟନ୍ତ ଚାଲିବ । ଏହା ପରେ ତୁରନ୍ତ ଭୋଟ୍ ଗଣତି ହୋଇ ଆଜି ରାତି ସୁଦ୍ଧା ଫଳାଫଳ ପ୍ରକାଶ ପାଇବାର ସମ୍ଭାବନା ରହିଛି ।