ଶସ୍ତା ହେବ କ୍ୟାନସର ଔଷଧ

ନୂଆଦିଲ୍ଲୀ : କ୍ୟାନସର ରୋଗୀଙ୍କୁ ମହଙ୍ଗା ଔଷଧରୁ ଆଶ୍ୱସ୍ତି ଦେବାକୁ କେନ୍ଦ୍ର ସରକାର ବଡ଼ ପଦକ୍ଷେପ ଗ୍ରହଣ କରିଛନ୍ତି । ସମସ୍ତ ନନ୍-ସିଡ୍ୟୁଲ୍ଡ (ଅଣ-ଅନୁସୂଚିତ) କ୍ୟାନସର ଔଷଧ ଉପରେ ବ୍ୟବସାୟିକ ଲାଭ (ଟ୍ରେଡ ମାର୍ଜିନ୍ ) ୩୦% ଭିତରେ ସୀମିତ ରଖିବାକୁ ସରକାର ନିଷ୍ପତ୍ତି ନେଇଛନ୍ତି । ଫଳରେ କିଛି କ୍ୟାନ୍ସର ଔଷଧର ମୂଲ୍ୟ ୭୦ ପ୍ରତିଶତ ପର୍ଯ୍ୟନ୍ତ ଶସ୍ତା ହେବ । ଚଳିତମାସ ଶେଷବେଳକୁ ଏହା ଲାଗୁ ହେବ । ସରକାରଙ୍କ ଏଭଳି ପଦକ୍ଷେପ ଯୋଗୁ କ୍ୟାନ୍ସରର ସେହିସବୁ ଔଷଧ ଉପରେ ପଡିବ ଯାହାର ମୂଲ୍ୟକୁ ନେଇ ପ୍ରସ୍ତୁତକର୍ତ୍ତାଙ୍କ ଠାରୁ ଆରମ୍ଭ କରି ବିତରକ ଓ ଖୁଚୁରା ବିକ୍ରେତାଙ୍କ ପର୍ଯ୍ୟନ୍ତ ଭିନ୍ନ ଭିନ୍ନ ସ୍ତରରେ ବଡ଼ ଲାଭ ଦେଖିବାକୁ ମିଳିଥାଏ ।
ସରକାରଙ୍କ ଏହି ନିଷ୍ପତ୍ତି କୌଣସି ଗୋଟିଏ କ୍ୟାନ୍ସର ଔଷଧ ଉପରେ ସୀମିତ ରହିବ ନାହିଁ । ଅନେକ ବ୍ରାଣ୍ଡେଡ ଓ ଜେନେରିକ, ଅନୁସୂଚିତ ଓ ଅଣ-ଅନୁସୂଚିତ ଏବଂ ପ୍ୟାଟେଣ୍ଟ ଓ ଅଣପ୍ୟାଟେଣ୍ଟଯୁକ୍ତ କ୍ୟାନସର ନିରୋଧୀ ଔଷଧ ଏହାର ପରିସରକୁ ଆସିବ । ସେହିଭଳି ଭାରତରେ ପ୍ରସ୍ତୁତ ଔଷଧ ସହିତ ବିଦେଶରୁ ଆସୁଥିବା ଔଷଧ ମଧ୍ୟ ଏହାର ପରିସରକୁ ଆସିବ ।
ସରକାରଙ୍କ କହିବାନୁଯାୟୀ ଔଷଧର ବିକ୍ରି ଓ ବିତରଣ ସମୟରେ ହେଉଥିବା ଅତ୍ୟଧିକ ମୂଲ୍ୟବୃଦ୍ଧିକୁ ହ୍ରାସ କରିବା ଲାଗି ଏହି ନିଷ୍ପତ୍ତି ନିଆଯାଇଛି । ଏଥିସହ ଔଷଧର ମୂଲ୍ୟ ହ୍ରାସ କରାଯିବା ଫଳରେ କ୍ୟାନ୍ସର ଭଳି ଜୀବନ ରକ୍ଷାକାରୀ ଔଷଧ ବଜାରରେ ପର୍ଯ୍ୟାପ୍ତ ମାତ୍ରାରେ ଉପଲବ୍ଧ ରଖିବାକୁ ସୁନିଶ୍ଚିତ କରାଯାଇପାରିବ । ମିଳିଥିବା ସୂଚନା ଅନୁସାରେ ୩୫ଟି ପ୍ୟାଟେଣ୍ଟ ଔଷଧ ସମେତ ମୋଟ ୧୧୦ଟି କ୍ୟାନସର ନିରୋଧୀ ଔଷଧ ଶସ୍ତା ହେବ । ଜଣେ ଅଧିକାରୀଙ୍କ କହିବାନୁଯାୟୀ ସରକାରଙ୍କ ଏଭଳି ନିଷ୍ପତ୍ତି ଫଳରେ କ୍ୟାନସର ରୋଗୀମାନଙ୍କର ବର୍ଷକୁ ପ୍ରାୟ ୨,୫୦୦ କୋଟି ଟଙ୍କା ସଞ୍ଚୟ ହୋଇପାରିବ । ଯେଉଁମାନେ ଦୀର୍ଘ ସମୟ ଧରି ଅଧିକ ମୂଲ୍ୟର ଔଷଧ ବ୍ୟବହାର କରୁଛନ୍ତି ସେମାନେ ବିଶେଷ ଭାବେ ଉପକୃତ ହୋଇପାରିବେ । ଅଧିକାଂଶ କ୍ଷେତ୍ରରେ କ୍ୟାନ୍ସର ଚିକିତ୍ସା ବହୁଦିନ ଧରି ଚାଲେ । ସେଥିରେ ସର୍ଜରୀ, କେମୋଥେରାପି, ରେଡିଏସନ ଓ ଔଷଧ ଖର୍ଚ୍ଚକୁ ମିଶାଇଲେ ଏକ ବଡ଼ ଆର୍ଥିକ ବୋଝ ପରିବାର ଉପରେ ପଡିଥାଏ ।ତେବେ କ୍ୟାନ୍ସର ଔଷଧ ଉପରେ ଲାଭ ସୀମା ୩୦ ପ୍ରତିଶତ ଧାର୍ଯ୍ୟ କରିବା ନିଷ୍ପତ୍ତି ପ୍ରଥମ ନୁହେଁ । ଏହା ପୂର୍ବରୁ ୨୦୧୯ରେ ସରକାର ୪୨ଟି ଅଣ-ଅନୁସୂଚିତ କ୍ୟାନସର ଔଷଧ ଉପରେ ଲାଭ ସୀମା ୩୦ ପ୍ରତିଶତ ଧାର୍ଯ୍ୟ କରିଥିଲେ । ସରକାରଙ୍କ ନିଷ୍ପତ୍ତି ଫଳରେ ୫୨୬ଟି ବ୍ରାଣ୍ଡେଡ ଔଷଧର ମୂଲ୍ୟ ପ୍ରାୟ ୫୦ ପ୍ରତିଶତ ପର୍ଯ୍ୟନ୍ତ ହ୍ରାସ ପାଇଥିଲା । ଏ ବାବଦରେ ରୋଗୀଙ୍କର ପ୍ରାୟ ୯୮୪ କୋଟି ଟଙ୍କା ସଞ୍ଚୟ ହୋଇପାରିଥିଲା ।ଭାରତରେ ମୂଲ୍ୟ ନିୟନ୍ତ୍ରଣ ଉଦ୍ଦେଶ୍ୟରେ ଔଷଧକୁ ୨ଟି ଭାଗରେ ବିଭକ୍ତ କରାଯାଇଛି । ଅନୁସୂଚିତ ଔଷଧଗୁଡ଼ିକ ସରକାରଙ୍କର ଜାତୀୟ ଅତ୍ୟାବଶ୍ୟକ ଔଷଧ ତାଲିକାରେ ରହିଛି । ଏହାର ଲାଭ ସୀମା ପ୍ରତିବର୍ଷ ସରକାର ଧାର୍ଯ୍ୟ କରିଥାନ୍ତି । ଏହା ବାଦ୍ ଯେତିକି ଔଷଧ ରହିଲା ସେଗୁଡ଼ିକ ଅଣ-ଅନୁସୂଚିତ ଔଷଧ ଭାବେ ପରିଗଣିତ ହୋଇଥାଏ । ଭାରତରେ ଯେତିକି ଔଷଧ ବ୍ୟବହାର କରାଯାଉଛି ସେଥିରୁ ୮୨ ପ୍ରତିଶତ ହେଉଛି ଅଣ-ଅନୁସୂଚିତ । ସେଥିରୁ ଅନେକ ଔଷଧ ହେଉଛି କ୍ୟାନ୍ସର ନିରୋଧୀ । ତେଣୁ ଏହାର ମୂଲ୍ୟ ଅଧିକ ହୋଇଥିବାରୁ ପରିବାର ଉପରେ ଆର୍ଥିକ ବୋଝ ପଡ଼େ ।ନିକଟରେ କେନ୍ଦ୍ର ସରକାର କେତେକ ପ୍ୟାଟେଣ୍ଟଯୁକ୍ତ ଔଷଧ ଉପରୁ ଜିଏସ୍ଟି ଛାଡ଼ କରିଥିଲେ । କିନ୍ତୁ ସୁଲଭ ମୂଲ୍ୟରେ କ୍ୟାନ୍ସର ଔଷଧ ମିଳିବା ବେଶ୍ କଷ୍ଟକର ହୋଇଛି । ଭାରତରେ ପ୍ରତିବର୍ଷ ୧୫ ଲକ୍ଷ ନୂଆ କ୍ୟାନ୍ସର ରୋଗୀ ସୃଷ୍ଟି ହେଉଥିବା ଜଣାପଡିଛି । ଏହି ସଂଖ୍ୟା ମଧ୍ୟ ଏବେ ପ୍ରତିବର୍ଷ ବଢ଼ିବାରେ ଲାଗିଛି । ଗତ ସେପ୍ଟେମ୍ବର ୨୯ରେ ଏକ ମାମଲାର ଶୁଣାଣି ବେଳେ ସୁପ୍ରିମକୋର୍ଟ ୨୭୦୦ ଟଙ୍କାର କ୍ୟାନସର ଔଷଧକୁ ରୋଗୀଙ୍କୁ ୨୭ ହଜାର ଟଙ୍କାରେ ବିକ୍ରି କରାଯାଉଥିବା ସମ୍ପର୍କରେ ଅବଗତ ହେବା ପରେ କେନ୍ଦ୍ର ସରକାରଙ୍କୁ କଡ଼ା ସମାଲୋଚନା କରିଥିଲେ । କହିଥିଲେ ଏହା ରୋଗୀଙ୍କୁ ଲୁଟ୍ । ସବୁ ଔଷଧ ଉପରେ ୧୬ ପ୍ରତିଶତ ବ୍ୟବସାୟିକ ଲାଭ ସୀମା ରଖିବା ଉପରେ ବିଚାର କରିବାକୁ ମଧ୍ୟ ସୁପ୍ରିମକୋର୍ଟ ସରକାରଙ୍କୁ ପରାମର୍ଶ ଦେଇଥିଲେ ।