Garvita Odia
ଭୁବନେଶ୍ୱର : ପଶ୍ଚିମବଙ୍ଗ ନିର୍ବାଚନ ପରେ ଦେଶବ୍ୟାପୀ ଆଞ୍ଚଳିକ ଦଳର ଭବିଷ୍ୟତ ନେଇ ଆରମ୍ଭ ହୋଇଛି ଚର୍ଚ୍ଚା । ଏହା ଭିତରେ ବିଜେଡିକୁ ନେଇ ବି ଆରମ୍ଭ ହୋଇଛି ଅନେକ ଚର୍ଚ୍ଚା ଓ ଆକଳନ । ୨୪ ବର୍ଷ ଧରି ନିରଙ୍କୁଶ ଶାସନ କ୍ଷମତାରେ ଥିବା ବିଜେଡିକୁ ଗାଦିରୁ ହଟାଇଲା ବିଜେପି । ତା’ ପରଠାରୁ ବିଜେଡିର ସବୁ ଅଙ୍କ ଭୁଲ୍ ହେବାରେ ଲାଗିଛି । ବ୍ଲକରୁ ରାଜ୍ୟସଭା ଯାଏଁ ବିଜେଡି ପତିଆରା ଖସିବାରେ ଲାଗିଛି । ଦଳ ଭିତରେ ଅସନ୍ତୋଷ, କନ୍ଦଳ ପ୍ରବଳ । ବିଧାୟକମାନେ ବିଦ୍ରୋହ କରୁଛନ୍ତି । ରାଜ୍ୟସଭା ସାଂସଦ ଦଳ ଛାଡ଼ୁଛନ୍ତି । ଅପରେସନ ଲୋଟସ୍କୁ ନେଇ ଦଳ ଭିତରେ ନାନା ଆଶଙ୍କା । ଅନ୍ୟପଟେ ଦଳରୁ ବିତାଡ଼ିତ ଓ ଉପେକ୍ଷିତ ଅନେକ ଭେଟେରାନ୍ ନେତାଏ ମେଳି ବାନ୍ଧିଲେଣି ।
ପଶ୍ଚିମବଙ୍ଗରେ ମମତା ବାନାର୍ଜୀଙ୍କ ଟିଏମସି, ତାମିଲନାଡ଼ୁରେ ଡିଏମକେ, ଏଆଇଡିଏମକେ ଝଟକା ଖାଇଲେ । ପୂର୍ବରୁ ଆମ୍ ଆଦମୀ ଦିଲ୍ଲୀ ହାରିବା ପରଠାରୁ ଦଳର ଅସ୍ତିତ୍ୱ ସଙ୍କଟ ଦେଇ ଗତି କରୁଛି । ମହାରାଷ୍ଟ୍ରରେ ଏନସିପି ଓ ଶିବସେନା ଦୁଇ ଭାଗ ହୋଇସାରିଛି । ଉଭୟ ପକ୍ଷର ବଳ ବି କମିଛି । ପଞ୍ଜାବରେ ଶିରୋମଣି ଅକାଳି ଦଳ, ଉତ୍ତରପ୍ରଦେଶରେ ମାୟାବତୀଙ୍କ ବିଏସପି ଏକପ୍ରକାର ଚର୍ଚ୍ଚାରୁ ହଜିଗଲେଣି । ଆରଜେଡି ଗତ ନିର୍ବାଚନରେ ଶକ୍ତ ଝଟକା ପାଇବା ପରେ ସଂଘର୍ଷ କରୁଛି । ନୀତିଶ କୁମାର ମୁଖ୍ୟମନ୍ତ୍ରୀ ପଦ ଛାଡ଼ିବା ପରଠାରୁ ଜେଡିୟୁକୁ ନେଇ ବି ନାନା ଆଶଙ୍କା । ଏମିତିରେ ଆଗକୁ ଓଡ଼ିଶାରେ ଆଞ୍ଚଳିକ ଦଳର ସ୍ଥିତି କ’ଣ ହେବ? ବିଜେଡି ବଳ ବଢ଼ିବ ନା ଛିଡ଼ିବ? ଏସବୁ ଚର୍ଚ୍ଚା ଭିତରେ ମହମ୍ମଦ ମୋକିମଙ୍କ ଓଡ଼ିଶା ଜନତା କଂଗ୍ରେସର ଭବିଷ୍ୟତକୁ ନେଇ ବହୁ ଆଶଙ୍କା । ଖାଲି ସେତିକି ନୁହେଁ, ବିଜୁ ଲିଗାସୀ ନେଇ ଯେଉଁ ନୂଆ ଦଳର ପରିକଳ୍ପନା ସମ୍ପର୍କରେ ଗତ କିଛି ମାସ ହେବ ଚର୍ଚ୍ଚା ଉଡ଼ି ବୁଲୁଛି, ତାହାକୁ ନେଇ ମଧ୍ୟ ଅନିଶ୍ଚିତତା । ତାମିଲନାଡ଼ୁର ସୁପରଷ୍ଟାର ଥାଲାପତି ବିଜୟଙ୍କ ଟିଭିକେ ଭଳି ଓଡ଼ିଶାରେ ଯାଦୁ ଦେଖାଇବା ଏତେ ସହଜ ନୁହେଁ ।
ମନ୍ତ୍ରୀ ମୁକେଶ ମହାଲିଙ୍ଗ ଗଣମାଧ୍ୟମକୁ କହିଛନ୍ତି, ଆଞ୍ଚଳିକ ଦଳର ବୟସ ପ୍ରାୟ ୧୫ରୁ ୨୫ ବର୍ଷ । ଏଠି ବିଜେଡିର ଆୟୁଷ ଗଲା, ଦଳ କ୍ଷମତାରୁ ହଟିଲା । ଦେଶରେ ଏବେ ଆଞ୍ଚଳିକ ଦଳ ଓ କମ୍ୟୁନିଷ୍ଟ ଦଳର ଯୁଗ ସରିଲା । ଦେଶବାସୀ ବିଜେପିକୁ ଭରସା କରୁଛନ୍ତି । ବିଜେଡି ବିଧାୟକ ଡ. ଅରୁଣ କୁମାର ସାହୁ କହିଛନ୍ତି, ବିଜେପି ଅର୍ଥ ବଳ, କେନ୍ଦ୍ରୀୟ ସଂସ୍ଥାର ଦୁରୁପଯୋଗ କରି ନିର୍ବାଚନ ଜିତୁଛି । ସେମାନଙ୍କର ମଧ୍ୟ ଅନ୍ତ ଆସିବ । ଓଡ଼ିଶାବାସୀଙ୍କର ବିଜେଡି ପ୍ରତି ଭଲ ପାଇବା ଅଛି । ଆଗକୁ ପରିବର୍ତ୍ତନ ହେବ । ଓଡ଼ିଶା ଜନତା କଂଗ୍ରେସ ସଭାପତି ମହମ୍ମଦ ମୋକିମ କହିଛନ୍ତି, ତାମିଲନାଡ଼ୁ ସନ୍ଦେଶ ଦେଇଛି, ସମସ୍ତଙ୍କ ପାଇଁ ରାଜନୀତିରେ ଜାଗା ଅଛି । ପିସିସି ସଭାପତି ଭକ୍ତ ଦାସ କହିଛନ୍ତି, ଆଞ୍ଚଳିକ ଦଳ ବିରୋଧରେ ବିଜେପି ଷଡ଼ଯନ୍ତ୍ର କରୁଛି । ଜେଡିୟୁ ପରେ ଆଗକୁ ଆନ୍ଧ୍ରର ପାଳି । ବିଜେପି ଏକଛତ୍ରବାଦ ରାଜନୀତି ଚଳାଇଛି ।
