ଆନ୍ଦୋଳନରୁ ଓହରିଲା ପାଚିକା ସଂଘ

ଭୁବନେଶ୍ଵର:ପାଚିକାମାନଙ୍କ ଦୀର୍ଘଦିନର ଦାବି ଉପରେ ଶେଷରେ ସକାରାତ୍ମକ ପଦକ୍ଷେପ ନେଲେ ରାଜ୍ୟ ସରକାର । ୭ ଦଫା ଦାବି ମଧ୍ୟରୁ ୩ଟି ମୁଖ୍ୟ ଦାବି ଯଥା ବକେୟା ଟଙ୍କା ପ୍ରଦାନ, ପରିଚୟ ପତ୍ର ଯୋଗାଣ ଏବଂ ଯଥୋଚିତ ଦରମା ଦେବାକୁ ମାନିନେବା ପାଇଁ ସରକାର ପକ୍ଷରୁ ପ୍ରତିଶୁତି ଦିଆଯାଇଛି । ଏହି ଆଶ୍ୱାସନ ପରେ ପାଚିକା ସଂଘ ନିଜ ଧାରଣା ଆନ୍ଦୋଳନରୁ ଓହରି ଯାଇଛି । ଗତ ଚାରି ଦିନ ଧରି ଦିବା-ରାତ୍ରି ଧାରଣାରେ ବସି ରହିଥିବା ପାଚିକାମାନେ ନିଜ ଅଧିକାର ପାଇଁ ଜୋରଦାର ଆନ୍ଦୋଳନ କରୁଥିଲେ । ସରକାର ସହିତ ଆଲୋଚନା ପରେ ଏହି ୩ଟି ଦାବି ପୂରଣ ନେଇ ସକାରାତ୍ମକ ସଙ୍କେତ ମିଳିବାରୁ ସେମାନେ ଆନ୍ଦୋଳନକୁ ସ୍ଥଗିତ କରିଛନ୍ତି ।

ପ୍ରକାଶଯୋଗ୍ୟ, ଚାରି ଦିନ ଧରି ଧାରଣାରେ ବସିଥିବା ହଜାର ହଜାର ପାଚିକା ଟାଣ ଖରା ସହିତ ରାତିର କାକରରେ ବିକ୍ଷୋଭ ପ୍ରଦର୍ଶନ କରି ସରକାରଙ୍କୁ ନ୍ୟାୟ ମାଗିଆସୁଥିଲେ । ଦୀର୍ଘ ୩୦ ବର୍ଷ ଧରି ମଧ୍ୟାହ୍ନ ଭୋଜନ ଯୋଜନାରେ କାମ କରିଲେ ମଧ୍ୟ ତାଙ୍କ ଅବସ୍ଥାରେ କୌଣସି ସୁଧାର ହୋଇନାହିଁ ବୋଲି ଅଭିଯୋଗ କରିଥିଲେ ।ଦିନକୁ ମାତ୍ର ୮୦ ଟଙ୍କା ମଜୁରୀ, ମାସକୁ ପ୍ରାୟ ୩ ହଜାର ଟଙ୍କା ଓ ବର୍ଷକୁ ୩୦ ହଜାର ଟଙ୍କାରେ ପରିବାର ଚଳାଇବା କଷ୍ଟକର ହୋଇପଡ଼ିଛି । ତା ସହ ତିନି ମାସର ଦରମା ବକେୟା ରହିଥିବା ଅଭିଯୋଗ କରିଥିଲା ପାଚିକା ସଂଘ । ରାନ୍ଧଣା, ସଫାସୁଫା, ପିଲାଙ୍କୁ ଖୁଆଇବା ଭଳି ଅନେକ କାମ କରୁଥିବା ସତ୍ତ୍ୱେ କୌଣସି ପରିଚୟ ପତ୍ର କିମ୍ବା ସାମାଜିକ ସୁରକ୍ଷା ନଥିବା କହିଥିଲା ସଂଘ ।