ଓଡ଼ିଶା ଆଧାରିତ ଜ୍ୟାକଫ୍ରୁଟ ବ୍ରାଣ୍ଡ ବିକଶିତ କରାଯିବ- ଉପମୁଖ୍ୟମନ୍ତ୍ରୀ

ଭୁବନେଶ୍ୱର: ମହାରାଷ୍ଟ୍ରର ଜ୍ୟାକଫ୍ରୁଟକିଙ୍ଗ ଆଗ୍ରୋ ପ୍ରଡ୍ୟୁସର କମ୍ପାନୀ ଲିମିଟେଡର ଅଧ୍ୟକ୍ଷ ଶ୍ରୀ ମିଥିଲେଶ ଦେଶାଇ ଆଜି ଲୋକସେବା ଭବନରେ ମାନ୍ୟବର ଉପମୁଖ୍ୟମନ୍ତ୍ରୀ ତଥା କୃଷି ଓ କୃଷକ ସଶକ୍ତିକରଣ, ଶକ୍ତିମନ୍ତ୍ରୀ ଶ୍ରୀ କନକ ବର୍ଦ୍ଧନ ସିଂହଦେଓଙ୍କୁ ସୌଜନ୍ୟମୂଳକ ସାକ୍ଷାତ କରିଛନ୍ତି। ରାଜ୍ୟରେ ପଣସ ଚାଷ ଏବଂ ଏହାର ପ୍ରକ୍ରିୟାକରଣ ସମ୍ପର୍କରେ ଆଲୋଚନା ହୋଇଥିଲା।

ମାନ୍ୟବର ଉପମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ସରକାରଙ୍କ ପ୍ରମୁଖ ସଚିବ ଡ଼ ଅରବିନ୍ଦ କୁମାର ପାଢୀ, ଉଦ୍ୟାନ କୃଷି ନିର୍ଦ୍ଦେଶକ ଶ୍ରୀ କାଲୁଙ୍ଗେ ଗୋରଖ ୱାମନ ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀଙ୍କ ଉପସ୍ଥିତିରେ ଏହି ଆଲୋଚନା ହୋଇଥିଲା।

ପଣସ କ୍ଲଷ୍ଟରକୁ ପିପିପି ମୋଡ୍ ଆଧାରରେ ବିକଶିତ କରାଯିବା ଏବଂ କନ୍ଧମାଳ, କେନ୍ଦୁଝର, କୋରାପୁଟ ସମେତ ଅନୁଗୁଳ, ଢେଙ୍କାନାଳ, ଗଜପତି, ମୟୂରଭଞ୍ଜ, ରାୟଗଡ଼ା ଏବଂ ସୁନ୍ଦରଗଡ଼ ଭଳି ୬ଟି ମିଶନ ଜିଲ୍ଲା ସହିତ ପ୍ରକ୍ରିୟାକରଣ ସୁବିଧା ମଧ୍ୟ ବିକଶିତ କରାଯିବା ନେଇ ଆଲୋଚନା ହୋଇଥିଲା। ଆବଶ୍ୟକ ହେଲେ ରାଜ୍ୟରେ ପଣସର କ୍ଷେତ୍ର ପ୍ରସାରଣ ପାଇଁ କୃଷି/ଉଦ୍ୟାନ କୃଷି ଫାର୍ମକୁ କମ୍ପାନୀକୁ ଯୋଗାଇ ଦେବା ନିମନ୍ତେ ଆଲୋଚନା କରାଯାଇଥିଲା।

କୃଷି-ଜୈବ ବିବିଧତା ହେତୁ ଜ୍ୟାକଫ୍ରୁଟ୍ ମିଶନ ଅଧୀନରେ ବରଗଡ଼ ଜିଲ୍ଲାର ପଦ୍ମପୁର ଉପଖଣ୍ଡ ଏବଂ ବଲାଙ୍ଗିର ଜିଲ୍ଲାର ପାଟନାଗଡ଼ ଉପଖଣ୍ଡକୁ ସାମିଲ କରିବାକୁ ମଧ୍ୟ ନିଷ୍ପତ୍ତି ନିଆଯାଇଥିଲା। ପଣସର ବ୍ୟବସାୟିକ ଇକୋସିଷ୍ଟମକୁ ଭଲ ଭାବରେ ବୁଝିବା ପାଇଁ ମହାରାଷ୍ଟ୍ରର ରତ୍ନଗିରି ଅଞ୍ଚଳର ଚାଷୀ/ଏଫପିଓମାନଙ୍କୁ ଏକ୍ସପୋଜର ଭିଜିଟର ବ୍ୟବସ୍ଥା କରାଯିବ। ପଣସ ମିଶନକୁ ସଫଳ କରିବା ନିମନ୍ତେ ସମନ୍ୱୟ ଉପରେ ବିଶେଷ ଧ୍ୟାନ ଦିଆଯିବ। ଓଡ଼ିଶା ଆଧାରିତ ଜ୍ୟାକଫ୍ରୁଟ ବ୍ରାଣ୍ଡ ବିକଶିତ କରାଯିବ ବୋଲି ମାନ୍ୟବର ଉପ-ମୁଖ୍ୟମନ୍ତ୍ରୀ ଶ୍ରୀ ସିଂହଦେଓ କହିଛନ୍ତି।