ଥମୁନି ରାଜ୍ୟସଭା ନିର୍ବାଚନ ତାତି: ସଭ୍ୟ ପଦ ରଦ୍ଦ ପାଇଁ ସୁପ୍ରିମକୋର୍ଟ ଯିବ ବିଜେଡି

ଭୁବନେଶ୍ୱର: ରାଜ୍ୟସଭା ନିର୍ବାଚନକୁ ସପ୍ତାହେ ବିତିବା ପରେ ବି ଥମୁନି ରାଜନୀତି ତାତି । ପ୍ରତିଦିନ ଲାଗି ରହିଛି ବାଦ ଓ ବିବାଦ । ବିଜେଡିରୁ ନିଲମ୍ବିତ ୬ଜଣ ବିଧାୟକଙ୍କ ସଭ୍ୟପଦ ରଦ୍ଦ ପାଇଁ ସୁପ୍ରିମକୋର୍ଟ ଯିବ ଦଳ । ପ୍ରଥମେ ସଭ୍ୟପଦ ରଦ୍ଦ ପାଇଁ ବାଚସ୍ପତିଙ୍କ ପାଖକୁ ଯିବେ ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ । ଯଦି ବାଚସ୍ପତି କୌଣସି କାର୍ୟ୍ୟାନୁଷ୍ଠାନ ଗ୍ରହଣ ନ କରନ୍ତି ତାହେଲେ ହାଇକୋର୍ଟରୁ ଆରମ୍ଭ କରି ସୁପ୍ରମକୋର୍ଟ ପର୍ୟ୍ୟନ୍ତ ଯିବ ଦଳ । ୬ ଜଣ ବିଧାୟକ ଏହି ଘଟଣାକୁ ସହଜରେ ନ ନିଅନ୍ତୁ ବୋଲି ଚେତାଇ ଦେଇଛନ୍ତି ଦଳର ମୁଖପାତ୍ର ଲେଲିନ ମହାନ୍ତି ।
ଲେନିନ୍ କହିଛନ୍ତି ଯେ, ସେମାନେ ଯଦି ଭାବୁଛନ୍ତି, ଦିଲ୍ଲୀପ ରାୟଙ୍କ ସାହାଯ୍ୟରେ ରକ୍ଷା ପାଇଯିବେ ତାହା ଭୁଲ । ଦିଲ୍ଲୀପଙ୍କ ବିରୋଧରେ ଅନେକ ମାମଲା ରହିଛି । ସେ ନିଜେ କେତେବେଳେ ବି ଫସିଯିବେ । ଏହି ବିଧାୟକମାନେ ଦଳ ପାଇଁ ଅନ୍ୟାୟ କରିଛନ୍ତି, ବିଜେଡି ସେମାନଙ୍କୁ ଛାଡ଼ିବ ନାହିଁ ବୋଲି ଲେନିନ୍ ଗର୍ଜନ କରିଛନ୍ତି ।
ଏ ସମ୍ପର୍କରେ ବିଜେଡିର ବରିଷ୍ଠ ଉପସଭାପତି ଦେବୀ ପ୍ରସାଦ ମିଶ୍ର କହିଛନ୍ତି, ଦଳର ସମ୍ୱିଧାନ ଅନୁଯାୟୀ ଶୃଙ୍ଖଳା ଭାଙ୍ଗିଥିବାରୁ କାର୍ୟ୍ୟାନୁଷ୍ଠାନ ହୋଇଛି । କ୍ରସ୍‌ ଭୋଟିଂ କରିଥିବା ବିଧାୟକଙ୍କ କାରଣ ଦର୍ଶାଅ ନୋଟିସର ଉତ୍ତର ସନ୍ତୋଷଜନକ ନଥିଲା । ଶୃଙ୍ଖଳା କମିଟି କାର୍ୟ୍ୟାନୁଷ୍ଠାନ ପାଇଁ ସୁପାରିସ କରିଥିଲା । ନବୀନ ବାବୁ ରାଜନୈତିକ ବ୍ୟାପାର କମିଟି ଡାକି କଥା ହେଲେ, କମିଟି କାର୍ୟ୍ୟାନୁଷ୍ଠାନ ପାଇଁ ସୁପାରିସ କଲେ, ତେଣୁ ନିଲମ୍ୱନ କରାଗଲା ବୋଲି ଶ୍ରୀ ମିଶ୍ର କହିଛନ୍ତି । ଦଳର ନିଷ୍ପତ୍ତିକୁ ମାନି ନଥିବାରୁ ସଭ୍ୟ ପଦ କାହିଁକି ରଦ୍ଦ କରାନଯିବ । ସେ ନେଇ ବାଚସ୍ପତିଙ୍କ ପାଖରେ ବିଜେଡି ଆବେଦନ କରିବ । ଏହା ସହ ରାଜ୍ୟସଭା ନିର୍ବାଚନରେ ୨ ବିଧାୟକଙ୍କୁ ଦ୍ୱିତୀୟ ବାଲଟ ଦିଆଯାଇଥିବାରୁ ସେମାନଙ୍କ ବିରୋଧରେ ମଧ୍ୟ ବାଚସ୍ପତି ଏବଂ ଓଡ଼ିଶାର ମୁଖ୍ୟ ନିର୍ବାଚନ ଅଧିକାରୀ(ସିଇଓ)ଙ୍କ ପାଖରେ ବିଜେଡି ଫେରାଦ ହେବ ବୋଲି ଶ୍ରୀ ମିଶ୍ର କହିଛନ୍ତି ।

ଅପରପକ୍ଷେ କ୍ରସ୍ ଭୋଟିଂ କରିଥିବା ବିଧାୟକଙ୍କ ଘର ଆଗରେ ବିକ୍ଷୋଭ ପ୍ରଦର୍ଶନ ହେଲାଣି ତ ପୁଣି କାହା ବିରୋଧରେ ବିଷୋଦଗାର ଜାରି ରହିଛି । ପ୍ରଥମେ ବିଜେଡି ସମର୍ଥକମାନେ ବାଙ୍କି ବିଧାୟକ ଦେବୀରଞ୍ଜନ ତ୍ରିପାଠୀଙ୍କ ଘର ଆଗରେ ବିକ୍ଷୋଭ କରିଥିଲେ । ପରେ ଦେବୀଙ୍କ ସମର୍ଥକମାନେ ମାଷ୍ଟରକ୍ୟାଣ୍ଟିନରେ ବିକ୍ଷୋଭ ପ୍ରଦର୍ଶନ କରିଥିଲେ । ପୁଣି ବିଜେଡି ପକ୍ଷରୁ ଦେବୀଙ୍କ ସମର୍ଥକ ଥିବା କିଛି ଛାତ୍ର ଓ ଯୁବନେତାଙ୍କୁ ନିଲମ୍ବନ କରାଯାଇଥିବାରୁ ସେମାନେ ବରିଷ୍ଠ ନେତା ପ୍ରତାପ ଜେନାଙ୍କ ଘର ସାମ୍ନାରେ ବିକ୍ଷୋଭ କରିଥିଲେ । ସେମାନଙ୍କ ମଧ୍ୟରୁ ୨ଜଣ ଛାତ୍ରନେତା ଗିରଫ ହୋଇଛନ୍ତି । ବିଜେଡି ଓ କଂଗ୍ରେସର ବହୁ ନେତା ଦୁଇ ଭାଗ ହୋଇ ପରସ୍ପର ବିରୋଧରେ ମନ୍ତବ୍ୟ ଦେଉଥିବା ଦେଖିବାକୁ ମିଳୁଛି । ଇତିମଧ୍ୟରେ କ୍ରସ୍ ଭୋଟିଂ କରିଥିବା ବିଧାୟକମାନେ ନିଜ ନିଜ ଅଞ୍ଚଳରେ ରୋଡ୍ ସୋ, ବଡ଼ ବୈଠକ କରି ସାଙ୍ଗଠନିକ ପତିଆରା ଦେଖାଇବା ଆରମ୍ଭ କରିଛନ୍ତି ।

ବିଜେଡିରେ ବିବାଦ ଟିକେ ଉଗ୍ର ରୂପ ଧାରଣ କରିଥିବା ବେଳେ ଦଳୀୟ ଅନ୍ତଃକନ୍ଦଳ ଏବେ ରାଜରାସ୍ତାକୁ ଆସିଯାଇଛି । ହେଲେ କଂଗ୍ରେସର ଏହି କନ୍ଦଳ କେବଳ କଥା କଟାକଟିରେ ସୀମିତ ରହିଛି । କଂଗ୍ରେସରୁ ନିଲମ୍ବିତ ସାନଖେମୁଣ୍ଡି ବିଧାୟକ ରମେଶ ଜେନା ପିସିସି ସଭାପତି ଭକ୍ତଚରଣ ଦାସ ଏବଂ ତାଙ୍କ ପୁଅ ସାଗର ବିରୋଧରେ ବର୍ଷୁଥିବା ବେଳେ ପ୍ରତି ଜବାବରେ ଭକ୍ତ ଓ ସାଗର ମଧ୍ୟ ରମେଶଙ୍କ ବିରୋଧରେ ନାନା ଅଭିଯୋଗ ବାଢ଼ିଛନ୍ତି । କେବଳ ସେତିକିରେ ସୀମିତ ନରହି ସାନଖେମୁଣ୍ଡି, କଟକ ବାରବାଟି ଓ ମୋହନାରେ କଂଗ୍ରେସ ବିକଳ୍ପ ନେତା ତିଆରି କରିବାରେ ଲାଗିପଡ଼ିଛି । ସମ୍ପୃକ୍ତ ଅଞ୍ଚଳର ପୁରୁଖା କଂଗ୍ରେସ ନେତାଙ୍କୁ ଆଣି କଂଗ୍ରେସ ଭବନରେ ପ୍ରତିଦିନ ବୈଠକ କରି କସରତ ଜାରି ରଖିଛି ।

ବିଜେଡିରୁ ନିଲମ୍ବିତ ବିଧାୟକ ଚକ୍ରମଣି କହଁର କହିଛନ୍ତି, ଏ ନିଲମ୍ୱନ ନିର୍ଦ୍ଦେଶକୁ ମୁଁ ଗ୍ରହଣ କରିପାରୁନି । ଭାବିଚିନ୍ତି ଭୋଟ ଦେଇଛି । ବିଜୁ ଲିଗାସୀକୁ ଭୋଟ ଦେଇଛି । ପ୍ରଥମ ଭୋଟ ଦଳର ନିର୍ଦ୍ଦେଶରେ ଦେଇଛି । ଦ୍ୱିତୀୟ ଭୋଟ ସ୍ୱାଧୀନ ପ୍ରାର୍ଥୀଙ୍କୁ ଦେଇଛି । ଦଳର ନିର୍ଦ୍ଦେଶକୁ କେବେ ଅବହେଳା କରିନି । ଏବେ ଦଳ ନିଷ୍ପତ୍ତି କ’ଣ କରିବ, ସେଇଟା ସେମାନେ ନିଷ୍ପତ୍ତି ନେବେ । ରାଜ୍ୟସଭାରେ ହ୍ୱିପ ଲାଗୁ ହୁଏ ନାହିଁ । ମୁଁ ବିଶ୍ୱାସଘାତକତା କରି ନାହିଁ ବୋଲି ଶ୍ରୀ କହଁର କହିଛନ୍ତି ।