Garvita Odia
କଟକ : ୩୧ ସପ୍ତାହର ଗର୍ଭଧାରଣ ସମୟରେ ଗର୍ଭପାତ କରାଇଲେ ନାବାଳିକାଙ୍କର ଜୀବନ ପ୍ରତି ବିପଦ ସୃଷ୍ଟି ହେବା ସହ ବିଭିନ୍ନ ଜଟିଳତା ହୋଇପାରେ ବୋଲି ଏମ୍ସ ଭୁବନେଶ୍ୱରର ମେଡିକାଲ ବୋର୍ଡ ହାଇକୋର୍ଟଙ୍କୁ ଜଣାଇଛନ୍ତି। ଏହି ସମ୍ପର୍କିତ ରିପୋର୍ଟ ବୁଧବାର ଓଡ଼ିଶା ହାଇକୋର୍ଟରେ ଦାଖଲ ହୋଇଛି। ମାମଲାର ଶୁଣାଣି କରି ଜଷ୍ଟିସ ବି.ପି. ରାଉତରାୟ ଆବେଦନକାରୀଙ୍କ ଓକିଲଙ୍କୁ ମେଡିକାଲ ରିପୋର୍ଟର କପି ଯୋଗାଇବାକୁ ନିର୍ଦେଶ ଦେବା ସହ ମାମଲାର ପରବର୍ତ୍ତୀ ଶୁଣାଣିକୁ ମେ ୭କୁ ଧାର୍ୟ୍ୟ କରିଛନ୍ତି। ହାଇକୋର୍ଟଙ୍କ ପୂର୍ବ ନିର୍ଦେଶ ଅନୁଯାୟୀ ଏମ୍ସ ଭୁବନେଶ୍ୱରର ୯ ଜଣ ବିଶେଷଜ୍ଞ ଡାକ୍ତରଙ୍କୁ ନେଇ ଗଠିତ ମେଡିକାଲ ବୋର୍ଡ ନାବାଳିକାଙ୍କୁ ପରୀକ୍ଷା କରିଥିଲା। ବୋର୍ଡର ରିପୋର୍ଟରେ କୁହାଯାଇଛି ଯେ, ନାବାଳିକା ୩୧ ସପ୍ତାହର ଗର୍ଭବତୀ ଅଛନ୍ତି। ଏପରି ସ୍ଥିତିରେ ଗର୍ଭପାତ କରାଇଲେ ଅତ୍ୟଧିକ ରକ୍ତସ୍ରାବ, ସଂକ୍ରମଣ, ସିଜେରିଆନ୍ ଆବଶ୍ୟକତା, ଆଇସିୟୁରେ ଭର୍ତ୍ତି, ରକ୍ତ ଦେବା ଆବଶ୍ୟକତା ଏବଂ ମାତୃମୃତ୍ୟୁର ଆଶଙ୍କା ରହିଛି। ସୁରକ୍ଷିତ ପରିଣାମ ପାଇଁ ଗର୍ଭଧାରଣକୁ ୪୦ ସପ୍ତାହ ପର୍ୟ୍ୟନ୍ତ ଜାରି ରଖିବା ସହ ଠିକ୍ ଆଣ୍ଟିନେଟାଲ କେୟାର କରାଯିବା ଉଚିତ ବୋଲି ମେଡିକାଲ ବୋର୍ଡ ସୁପାରିସ କରିଛି। ଆବେଦନକାରିଣୀଙ୍କ ପକ୍ଷରୁ ଆଇନଜୀବୀ ରମାକାନ୍ତ ଷଡ଼ଙ୍ଗୀ ମାମଲା ପରିଚାଳନା କରୁଛନ୍ତି।
